وبلىس بويىنشا وسى جىلدىڭ 1-17 قاراشا ارالىعىندا كوروناۆيرۋس ينفەكتسياسىمەن اۋىرعاندار سانى 871 ادامعا جەتتى. ناۋقاستاردىڭ باسىم كوپشىلىگى, ياعني 517-ءسى كوكشەتاۋ قالاسىندا تىركەلىپ وتىر. ودان سوڭ ستەپنوگور قالاسى. وڭىردەگى سارالاۋ قورىتىندىلارىندا كوكشەتاۋ مەن ستەپنوگورسك قالالارى جانە ساندىقتاۋ اۋدانى «قىزىل ايماقتا» تۇر. سونىمەن بىرگە ىندەت ءورشىپ تۇرعان بۇل وڭىرلەرمەن بۋراباي جانە زەرەندى اۋداندارى دەڭگەيلەس. ال «سارى ايماقتا» استراحان اۋدانى تۇر. قالعان اۋداندار جاسىل ايماققا ەنىپتى. جۋىردا مەملەكەت باسشىسى قاسىم-جومارت توقاەۆ وبلىستا ىندەتتى جاسىرۋ فاكتىلەرىنىڭ بار ەكەنىن ەسكەرتكەن بولاتىن.
– ناۋرىز ايىنان بەرى الاتىن بولساق, ىندەتتىڭ انىقتالۋى تۋرالى اقپاراتتاردى ۇلتتىق ساراپتاما ورتالىعى عانا دەرەكقورعا ەنگىزەتىن, كەيىن مۇنداي تەستىلەۋدى «وليمپ» كلينيكالىق-دياگنوستيكالىق ەمحاناسى دا جۇرگىزە باستادى. ودان كەيىن باسقا دا لابوراتوريالار قوسىلدى. ولاردىڭ بارلىعى ءبىر دەرەكقورعا مالىمەتتەردى بىردەن ەنگىزىپ وتىرۋى ءتيىس. الايدا جوعارىدا ايتىپ وتكەنىمىزدەي, ۋاقىتىنان كەشىكتىرىپ وتىرعان. سونداي-اق سۋبەكتيۆتى تۇرعىدان دا ولقىلىقتار ورىن الدى. بۇل رەتتە مەديتسينالىق ۇيىمدار دا شۇعىل جاعدايلاردى ۋاقىتىندا جەتكىزبەگەن. اقىلى تۇردە تەكسەرىستەردەن وتكەندەر بويىنشا دا اقپاراتتار ۋاقىتى بەرىلمەگەن. قازىرگى ۋاقىتتا بىرىكتىرىلگەن اقپاراتتىق دەرەكقوردى جەتىلدىرۋ بويىنشا جۇمىستار جاسالىپ, انىقتالعان فاكتىلەر بويىنشا مالىمەتتەرگە سالىستىرۋلار جۇرگىزىلۋدە, – دەيدى ا.مۋسينا.
سوڭعى اپتادا وبلىستا ىندەتتىڭ تارالۋى ازداپ بولسىن تومەندەپ وتىر. وتكەن تاۋلىكتە 41 وقيعا تىركەلگەن. ونىڭ 30-ىندا ىندەت بەلگىلەرى بايقالسا, 11-ىندە سيمپتومسىز تۇردە وتۋدە. دەرتتى جۇقتىرعانداردىڭ 22-ءسى – كوكشەتاۋ, 5-ەۋى – ستەپنوگور قالاسىندا. استراحان, بۋراباي اۋداندارىندا 4 وقيعادان تىركەلگەن, ساندىقتاۋدا – 3, تسەلينوگرادتا – 2, زەرەندىدە 1 جاعداي انىقتالدى. سونىمەن بىرگە ۆيرۋستىق پنەۆمونيا بويىنشا ەكى وقيعا تسەلينوگراد پەن اقكول اۋداندارىندا انىقتالىپ وتىر.
وقۋ جىلى باستالعالى وبلىستا 47 وقۋشى اتى جامان ىندەتكە شالدىققان. ولاردىڭ 11-ءى ءداستۇرلى رەجىمدە وقىپ جۇرگەندەر بولسا, قالعانى – قاشىقتان ءبىلىم الىپ جاتقاندار. ال مەكتەپكە دەيىنگى ۇيىمداردا 20 بۇلدىرشىننەن ىندەت انىقتالدى. مۇندا دا باسىم بولىگى, ياعني 15-ءى – كوكشەتاۋ قالاسىندا, قالعانى – استراحان, ارشالى, بۋراباي, جارقايىڭ اۋداندارىندا. ءبىلىم مەكەمەلەرىندە ءتيىستى سانيتارلىق-ەپيدەميالىق شارالار ۇيىمداستىرىلىپ, كارانتيندىك تالاپتار بويىنشا شەكتەۋلەر قولدانىلعان. وسىعان وراي قازىرگى ۋاقىتتا 193 ادام ءۇي كارانتينىندە ەم قابىلداۋدا.
ا.مۋسينانىڭ ايتۋىنشا, كوكشەتاۋ مەن بىرنەشە اۋداننىڭ مەكتەپتەرىنە ەنگىزىلگەن كارانتيندىك شەكتەۋلەردى جەڭىلدەتۋ, ولارداعى ءارى قارايعى وقۋ رەجىمى بويىنشا ماسەلە وبلىستىق ءبىلىم باسقارماسىمەن بىرلەسە قاراستىرىلۋدا. وبلىستاعى 6 لابوراتوريادا كوروناۆيرۋس جۇقپاسىن انىقتاۋ بويىنشا كۇنىنە 1600-1800 زەرتتەۋ جۇرگىزىلىپ جاتىر. سونىمەن قاتار بۇل لابوراتوريالار اقىلى تەكسەرۋلەر دە قولعا الىنعان. قازىرگى ۋاقىتتا ءوز ەركىمەن بارىپ, پتر تەستىنى اقىلى ءوتىپ جاتقاندار سانى كوبەيگەن. وسىلايشا اقىلى تەستىدەن وتكەن 9 مىڭعا جۋىق ادامنىڭ 228-ىنەن ىندەت انىقتالىپتى.
بۇگىندە وبلىس بويىنشا ىندەتتىڭ ەكىنشى تولقىنىنا ازىرلەنگەن توسەكتىك ورىنداردىڭ 28 پايىزى كادەگە اسۋدا. ىندەت جۇقتىرۋشىلار سانى ازايىپ كەلە جاتقاندىقتان, كەيبىر قوعامدىق تاماقتانۋ, ازىق-ت ۇلىك دۇكەندەرى سەكىلدى مەكەمەلەردىڭ جۇمىس ۋاقىتىن ۇزارتۋ بويىنشا سوڭعى قاۋلىعا وزگەرتۋلەر ەنگىزىلىپتى.
اقمولا وبلىسى
