ساياسات • 24 قاراشا، 2020

اشىقتىق جەمقورلىقتىڭ جولىن كەسەدى

29 رەت كورسەتىلدى

ەلىمىزدە سىبايلاس جەمقورلىققا قارسى زاڭناما جەتىلدىرىلە ءتۇسىپ، قوعام دامۋىن كەرى تارتاتىن قۇبىلىسپەن كۇرەستىڭ جاڭا كەزەڭى باستالدى. بۇل باعىتتا قىزىلوردا وبلىسىندا دا جۇيەلى جۇمىس بار. وبلىس اكىمى گۇلشارا ابدىقالىقوۆا «Antikor Live» جوباسى اياسىندا «اكىمدىكتەردىڭ اشىقتىعى، ەسەپتىلىگى جانە قولجەتىمدىلىگى» تاقىرىبىندا تىكەلەي ەفيردە سۇحبات بەرىپ، جەمقورلىققا قارسى اتقارىلىپ جاتقان شارالار تۋرالى ايتىپ ءوتتى.

 

تىكەلەي ەفيرگە سىبايلاس جەمقورلىققا قارسى ءىس-قيمىل اگەنتتىگى وبلىس بويىنشا دەپار­تامەنتىنىڭ باسشىسى ارداق ەر­سەيىتوۆ پەن سالا قىزمەتكەرلەرى قا­تىستى. ءوڭىر باسشىسىنا وبلىس تۇرعىندارىنىڭ الەۋمەتتىك جەلىدە جيناقتالعان ساۋالدارى قويىل­دى.

– قۇقىقتىق-ستاتيستيكالىق مالىمەتتەرگە جۇگىنسەك، بيىلعى 10 ايدا سىبايلاس جەمقورلىق سيپا­تىندا 81 قىلمىس تىركە­لىپ، بىلتىرعى جىلدىڭ وسى كە­زە­ڭىمەن سالىستىرعاندا 26،4% تومەندەگەنى بايقالادى. رەسپۋب­ليكاداعى 17 ءوڭىردىڭ اراسىندا تەرگەۋ وندىرىسىندە بولعان سىباي­لاس جەمقورلىق سيپاتىنداعى قىل­مىستىق ىستەر بويىنشا ءبىز­دىڭ وبلىس 16-شى پوزيتسياعا ور­نالاسقان. وسى كورسەتكىشتىڭ ءوزى بۇل سالاداعى جۇمىستاردىڭ وڭ ناتيجەسى دەپ بىلەمىن، – دەدى گۇلشارا ابدىقالىقوۆا.

وبلىس اكىمى ازاماتتاردىڭ اقپاراتقا قولجەتىمدىلىگىن قام­­تاماسىز ەتۋ ماقساتىندا مەم­لەكەتتىك ورگاندار تاراپىنان قا­بىل­دانىپ جاتقان ءىس-شارالارعا توق­تالىپ، اشىقتىق ءپرينتسيپى جەم­قورلىقتى بولدىرمايتىن بىر­دەن-ءبىر جول ەكەندىگىن اتاپ ءوتتى.

قازىر وبلىستىق اكىمدىكتىڭ رەس­مي ينتەرنەت-رەسۋرسى ارقىلى كەز كەلگەن ازامات مەملەكەتتىك ور­گاندار جۇمىستارى تۋرالى اق­پاراتتى ەش كەدەرگىسىز الا الادى. سالالىق باسقارمالاردىڭ جۇ­­مىسى تۋرالى مالىمەت، كون­كۋرس­تىق حابارلاندىرۋلار، نور­ما­تيۆتىك-قۇقىقتىق اكتىلەر، ءوڭىر جاڭالىقتارى كۇن سايىن جاڭار­تىلىپ تۇرادى.

اشىقتىق ءپرينتسيپى قارجى سالاسىنا دا اسا قاجەت. وسىعان بايلانىستى اكىمدىكتەردىڭ اشىق بيۋدجەتتەرىنە ارنالعان ينتەراك­تيۆتى كارتا ازىرلەندى. وندا بار­لىق سالالاردىڭ شىعىسى تۋرالى تولىق اقپارات الۋعا مۇمكىندىك بار.

«ەلەكتروندى ۇكىمەت»، «اشىق ديالوگ» egov.kz پورتالىندا وب­لىس اكىمىنىڭ قاتىسۋىمەن تۇراق­تى تۇردە ونلاين رەجىمدە ءتۇرلى تا­قىرىپتاردا ينتەرنەت-كونفەرەنتسيالار وتكىزىلىپ تۇرادى. بيىل 12 ينتەرنەت-كونفەرەنتسيا جوس­پارلانىپ، سونىڭ سەگىزى ءوتتى. تۇس­كەن سۇراقتاردىڭ بارلىعىنا ونلاين رەجىمدە جاۋاپ بەرىلدى.

سونىمەن قاتار ارنايى سايتتا مەم­لەكەت تاپسىرىسى بويىنشا سالىنىپ جاتقان قۇرىلىس نىساندارى تۋرالى تولىق اقپارات ورنالاستىرىپ، حالىققا قولجەتىمدى ەتۋ ماقساتىندا قۇرىلىس سالاسىندا «حالىق مونيتورينگ» ەلەكتروندى جۇيەسى ىسكە قوسىلعان.

تىكەلەي ەفيردە وبلىس اكىمى كاسىپ­كەرلىك سۋبەكتىلەردىڭ زاڭ­دى مۇددەلەرىنىڭ قورعالۋىن قام­تا­ماسىز ەتۋ بويىنشا دا ساۋال­دارعا جاۋاپ بەردى.

– وڭىردە بيزنەس الدىنداعى اكىم­شىلىك كەدەرگىلەردى جانە سىبايلاس جەمقورلىق كورىنىستەرىن جويىپ، كاسىپكەردىڭ زاڭدى قۇقى­عى اياققا تاپتالماۋى ءۇشىن «بيز­نەستى جانە ينۆەستورلاردى قور­عاۋ» جوباسى ىسكە اسىرى­لۋدا. ونىڭ اياسىندا جىل باسىنان بە­رى وبلىستاعى ينۆەستورلار مەن كاسىپكەرلەردى دەمەۋ ءۇشىن 6 شەتەلدىك جانە 15 وتاندىق جوبامەن كەلىسىمشارت جاسالدى. ودان بولەك پاندەميا كەزىندە 51 مىڭنان استام كاسىپكەرگە سا­لىقتىق جەڭىلدىكتەر بەرىلىپ، 4 مىڭ­­نان استام بيزنەسمەن مىندەتتى الەۋ­مەتتىك-مەديتسينالىق ساق­تاندىرۋ تولەمىنەن بوساتىلدى، – دەدى ءوڭىر باسشىسى.

وبلىستا پاندەميا كەزىندە 9 مىڭ ساۋدا الاڭى جالپى سوماسى شامامەن 700 ملن تەڭگەگە جۋىق جالدىق تولەمدى وتەۋدەن بوساتىلعان. ەلدەگى بيزنەس وكىل­دەرىنە تيىمدىلىگى ەسكەرىلىپ، اۋىل كاسىپكەرلەرىن جەڭىلدىكپەن نە­سيە­لەندىرۋگە باعىتتالعان «قىزىل­وردا» وڭىرلىك ينۆەستيتسيالىق ورتالىعىنىڭ قىزمەتى 2025 جىل­عا دەيىن ۇزارتىلىپ وتىر.

تسيفرلى تەحنولوگيا دامىعان سايىن جەمقورلىقتىڭ دا قا­دامى قىسقارا بەرەتىنى داۋسىز. قۇ­جاتىڭدى قولتىقتاپ، ونى تىركەتۋ ءۇشىن بىرەۋدىڭ الدىنا بارىپ جاعداي ايتۋدى قويعان ساتتە جەڭ ۇشىنان جالعاسۋدىڭ دا «داۋرەنى» بىتەدى. وڭىردە وسى جىلى تسيفر­لى تەحنولوگياعا بايلانىستى 7 باعىت بويىنشا 13 جوبا ىسكە اسۋ­دا. ونىڭ ىشىندە ءبىلىم بەرۋ سالا­سىندا «قاۋىپسىز مەكتەپ» پەن دەنساۋلىق ساقتاۋ باعىتىنداعى «DICOM بەينەلەرىن جىبەرۋ جانە مۇراعاتتاۋ ءۇشىن PACS جۇيەسىن ەنگىزۋ» جانە «مەديتسينالىق كۋالاندىرۋدىڭ ەلەكتروندى جۇيەسى» جوبالارى بار.

تىكەلەي ەفيردە ايماق باسشىسى مەملەكەتتىك قىزمەت كور­سەتۋ، ەپيدەميالىق احۋالعا باي­لانىستى بولىنگەن بيۋدجەت قارا­جاتىنىڭ ماقساتقا ساي يگەرى­لۋىن باقىلاۋ باعىتىنداعى جۇ­مىستارعا دا توقتالىپ ءوتتى.

 

قىزىلوردا

 

سوڭعى جاڭالىقتار

ۇقساس جاڭالىقتار