ءوڭىر باسشىسى كوروناۆيرۋس پاندەمياسى – الەمدە تۋريستىك سالاداعى جاعدايدىڭ كۇردەلەنۋىنە قاراماستان, ىشكى ءتۋريزمنىڭ وسۋىنە ايتارلىقتاي ىقپال ەتكەنىن ايتتى.
"بيىل تەڭىز جاعالاۋىندا بەس جۇلدىزدى قوناقۇيدىڭ اشىلۋىمەن, وڭىرگە كەلگەن تۋريستەر سانىنىڭ ارتقانىن بايقاپ وتىرمىز. كەلگەن ساياحاتتاۋشىلار ماڭعىستاۋدىڭ تابيعي جەرلەرىن دە ارالاپ, اسىرەسە بوزجىرا شاتقالىنا قىزىعۋشىلىق تانىتۋدا. بوزجىراعا تەك تامىز-قازان ارالىعىندا 2 مىڭعا جۋىق ادام بارعان. كەلەر جىلى بۇل سان 5 ەسە وسەدى دەگەن بولجام بار. تۋريستەردىڭ قورىققا بەيبەرەكەت بارىپ, وزدىگىنشە ءجۇرۋى – تابيعاتقا وراسان زيان كەلتىرۋدە. سوندىقتان بوزجىراعا باراتىن جول سالىپ, تۋريستەردىڭ جايلى دەمالۋىنا جاعداي جاساۋىمىز كەرەك. پرەزيدەنت تە وسى جاعدايعا بايلانىستى پىكىرىن ءبىلدىرىپ, ەكوتۋريزمدى وركەنيەتتى جولمەن دامىتۋدى قولدايتىنىن ايتتى. مەملەكەت باسشىسى تاپسىرعانداي, بۇل جوبا ساراپشىلاردىڭ, قوعامدىق كەڭەستەر مەن جاۋاپتى سالا جەتەكشىلەرىنىڭ وي-پىكىرلەرى ەسكەرىلە وتىرىپ جۇزەگە اسىرىلادى", دەدى س.ترۇموۆ.
بوزجىرا اۋماعىندا سافاري-وتەل سالۋ يدەياسىن Rixos قوناقۇي كەشەنىن ىسكە قوسقان ينۆەستورلار ۇسىنعان. قازىر جوبالاۋ جۇمىستارى ءجۇرىپ جاتىر. ينۆەستور بوزجىراداعى قوناقۇيدى شاتقالدان 2 شاقىرىم جەردە سالۋدى ۇسىنىپ وتىر. جوباسى دايىن بولعان سوڭ قوعام تالقىسىنا ۇسىنىلادى.
"بىلە بىلسەك, بۇل – بىزگە بەرىلىپ تۇرعان زور مۇمكىندىك. ءىرى ينۆەستور ەل ءتۋريزمىن دامىتۋعا مول قارجى قۇيعالى وتىر. مۇنايعا عانا تاۋەلدى – بولۋ بولاشاق ءۇشىن قاۋىپتى. كوپ ەلدىڭ تاجىريبەسى كورسەتىپ وتىرعانداي ءتۋريزمدى دامىتۋ ارقىلى, ەكونوميكامىزدى وركەندەتە الامىز. شاعىن جانە ورتا بيزنەستىڭ دامۋىنا, جەرگىلىكتى ازاماتتاردىڭ جۇمىسپەن قامتىلۋىنا جول اشامىز. قۇرمەتتى ازاماتتار, جۋرناليستەر, مەن دە ءوز ەلىمنىڭ پاتريوتىمىن, تۋعان جەرىمنىڭ جاناشىرىمىن. ازاماتتارىمىز تابىس تاۋىپ, جاعدايىن جاقسارتىپ جاتسا – قۋانامىن", دەدى ماڭعىستاۋ وبلىسىنىڭ اكىمى.
