وبلىستىق قان ورتالىعىنىڭ ماماندارى قازىر وڭىردە قان تاپشىلىعى بايقالىپ وتىرعانىن ايتادى. تۇراقتى دونورلارعا دەگەن سۇرانىس وتە جوعارى. ورتالىق ماماندارىنىڭ ايتۋىنشا, كۇن سۋىتقالى تۇرعىندار اراسىنان ورتالىققا ءوز ەرىكتەرىمەن كەلىپ, قان تاپسىراتىندار دا ازايعان.
وسىعان وراي, وبلىستىق مەملەكەتتىك قىزمەت ىستەرى دەپارتامەنتى مەملەكەتتىك قىزمەتكەرلەر اراسىندا باستاما كوتەرىپ وتىر. وزگە ارىپتەستەرىنە ۇلگى رەتىندە دەپارتامەنت باسشىسى قىزمەتكەرلەرمەن بىرگە قان تاپسىردى. اكتسياعا قر پرەزيدەنتى جانىنداعى مەملەكەتتىك باسقارۋ اكادەمياسىنىڭ وبلىستىق فيليالىنىڭ قىزمەتكەرلەرى دە اتسالىستى.
"بيىلعى جىلدى مەملەكەت باسشىسى "ەرىكتىلەر جىلى" دەپ جاريالاۋىنا وراي وسىنداي باستاما كوتەرىپ وتىرمىز. باستامانىڭ ماقساتى - وبلىستاعى بارلىق مەملەكەتتىك قىزمەتشىلەردى ەرىكتى قان دونورى بولۋعا شاقىرۋ. سول ارقىلى حالىق اراسىندا دونورلىقتى ناسيحاتتاۋ. قان تاپسىرۋ ءاربىر ادامنىڭ قولىنان كەلەتىن ءىس. قينالعان جانداردىڭ ومىرىنە ءۇمىت سىيلايتىن يگىلىكتى باستاماعا ارىپتەستەرىمىز بارىنشا قولداۋ بىلدىرەدى دەپ سەنەمىن, – دەدى دەپارتامەنتتىڭ باسقارما باسشىسى عالىمجان ىلكىباەۆ.
