«باس پروكۋراتۋرانىڭ مالىمەتىنشە, وسى جىلدىڭ 10 ايىندا مال ۇرلىعىنان كەلگەن شىعىن 1 ملرد تەڭگەدەن استى. سوتقا دەيىنگى تەرگەۋ بارىسىندا جابىرلەنۋشىلەرگە تەك 17% وتەلدى. كورشى ەلدەرگە مالدى تابىنىمەن ايداپ اكەتكەن شەكارالاس وبلىستاردا جاعداي اۋىر كۇيىندە قالىپ وتىر», - دەدى سەناتور ۆلاديمير ۆولكوۆ.
وتىرىسقا قاتىسۋشى ىشكى ىستەر, اۋىل شارۋاشىلىعى مينيسترلىكتەرىنىڭ, باس پروكۋراتۋرانىڭ, قازاقستان فەرمەرلەر قاۋىمداستىعىنىڭ جانە شەكارا ماڭىنداعى وڭىرلەردىڭ جەرگىلىكتى اتقارۋشى ورگاندارىنىڭ وكىلدەرى مال ۇرلىعىنىڭ الدىن الۋدا بىرقاتار پروبلەمالاردىڭ بار ەكەنىن اتاپ ءوتىپ, ولاردى شەشۋ جولدارىن ۇسىندى.
وتىرىس بارىسىندا سەنات دەپۋتاتى نۇرلان بەكنازاروۆ قىلمىستىق كودەكسكە وزگەرىستەر ەنگىزىلگەنىن اتاپ ءوتتى. وعان «مال ۇرلىعى» اتتى جاڭا باپ ەنگىزىلىپ, 8 ملن تەڭگەگە دەيىن ايىپپۇل سالۋ نەمەسە مۇلكىن تاركىلەۋ جانە 5 جىلعا دەيىنگى مەرزىمگە باس بوستاندىعىنان ايىرۋ كوزدەلگەن. الايدا مۇنداي ىستەردىڭ اشىلۋى وتە تومەن دەڭگەيدە جانە قىلمىستاردىڭ 41%-ىن قۇرايدى. اشىلماعان قىلمىستاردىڭ نەگىزگى بولىگى الەۋمەتتىك قاۋىپ توندىرەتىن قىلمىستىڭ ۇيىمداسقان تۇرىنە جاتادى.
«پوليتسيا قىزمەتكەرلەرىنىڭ مالدىڭ ەركىن جايىلۋى ءۇشىن يەسىنىڭ قاراۋسىز قالدىرعانىنا سىلتەمە جاساي وتىرىپ مال ۇرلىعى تۋرالى ارىزداردى تىركەۋدەن باس تارتىپ وتىر, ءسويتىپ, قىلمىستى جاسىرۋدىڭ تەرىس تاجىريبەسى جالعاسىپ كەلەدى», - دەپ اتاپ ءوتتى سەناتور.
نۇرلان بەكنازاروۆ سونداي-اق جەرگىلىكتى اتقارۋشى ورگانداردىڭ اۋىلدىق جەرلەردە مال جايۋ ماسەلەلەرى ءتيىستى تۇردە شەشىلمەگەنىن اتاپ ءوتتى. ءسويتىپ, مال يەسى ءوز مالىنىڭ قاۋىپسىزدىگىن قامتاماسىز ەتۋدە ءتيىستى ارەكەت ەتە المايدى.
كوميتەت توراعاسى ۆلاديمير ۆولكوۆ وتىرىستى قورىتىندىلاي كەلىپ, مال ۇرلىعىنا قارسى ءىس-قيمىل تەك پوليتسيانىڭ عانا ەمەس, مەملەكەتتىك ورگانداردىڭ, قوعامنىڭ جانە فەرمەرلەردىڭ بىرلەسكەن جۇمىسىن تالاپ ەتەتىن ماڭىزدى ماسەلەلەردىڭ ءبىرى ەكەنىن اتاپ ءوتتى. دەر كەزىندە ارەكەت ەتۋ كەرەك ەكەنى ايتىلدى.
وتىرىس قورىتىندىسى بويىنشا ۇسىنىمدار ازىرلەندى جانە ول ۇكىمەت پەن مەملەكەتتىك ورگاندارعا جىبەرىلەتىن بولادى.
