جەر جۇزىندە COVID-19-عا ارنالعان ۆاكتسينانى ءوز تۇرعىندارىنىڭ سانىنان ارتىق مولشەردە ساتىپ الۋدان كانادا ەڭ الدىڭعى ورىندا كورىنەدى. سوندىقتان ارتىلىپ قالعان ۆاكتسينانىنىڭ ءبىر بولىگىن دۇنيەجۇزىلىك دەنساۋلىق ساقتاۋ ۇيىمى ارقىلى گۋمانيتارلىق كومەك رەتىندە كەدەي ەلدەرگە تاراتىپ بەرەمىز دەگەن ويدا ەكەن.
* * *
الەم بويىنشا ىندەت ىلمەگىنە ءدال اقش ءتارىزدى تۇسكەن ەل كەمدە-كەم. وسى كۇندەرى COVID-19-دان كوز جۇمعاندار سانى جارتى جىلداعى ەڭ جوعارى كورسەتكىشكە جەتتى.
حوپكينس اتىنداعى ۋنيۆەرسيتەتتىڭ مالىمەتىنە قاراعاندا, 14 مامىردان بەرگى ىندەتتەن اجال قۇشقاندار ستاتيستيكاسى بويىنشا قاراشادا قارالى ساننىڭ باسىمدىعى ارتىپ, 17 قاراشادا 1 707 پاتسيەنت COVID-19 كەسىرىنەن ومىرمەن قوشتاسقان. ال 19 قاراشاداعى مالىمەت بويىنشا پاندەميا باستالعالى بەرى ۆيرۋستى 11 468 739 ادام ىندەت جۇقتىرىپ, 249 935 امەريكالىق كوز جۇمىپتى.
وسىنداي جاعدايعا بايلانىستى اقش قور نارىعى يندەكسىنىڭ دە ءباسى كوتەرىلە الماي جاتىر. قاراشانىڭ 18-ءى كۇنگى كەشكى جابىلۋدا ۋولل-ستريتتە Dow Jones 344,93-كە (1,16%) ءتۇسىپ, S&P 500 41,74-كە (1,16%) تومەندەگەن.
* * *
رەسەي عالىمدارى جاساعان COVID-19-عا قارسى ۆاكتسينا مارە سىزىعىنا تاياعانى جايلى REGNUM حاباردار ەتەدى.
«سپۋتنيك V» ۆاكتسيناسىن جاساۋشىلار جاڭا ۆاكتسينانى باعالاۋ ءۇشىن بارلىق ماتەريالدى ددۇ قۇزىرىنا وتكىزىپتى. ول جايىندا 18 قاراشا كۇنى ددۇ-نىڭ رەسەي فەدەراتسياسىنداعى وكىلى مەليتا ۆۋينوۆيچ ايتتى. «قازىر ۆاكتسينانى جاساۋشىلار مەن ددۇ-نىڭ اراسىندا ساراپتاۋدى جۇرگىزۋ ءتارتىبى بويىنشا اڭگىمە وتۋدە, ال ۆاكتسيناعا ساراپتاما قورتىندىسى شىققان كەزدە ددۇ ءوز مالىمدەمەسىن جاسايدى», دەدى ول. م.ۆۋينوۆيچ 2021 جىلدىڭ اياعىنا دەيىن جەر جۇزىندە 2 ملرد ادام ۆاكتسينا الىپ, اۋرۋدان قورعانادى دەگەن ۇمىتتە ەكەنىن دە ايتتى.
* * *
دارىگەرلەر كوروناۆيرۋسپەن اۋىرعان پاتسيەنتتەردى ەمدەۋ بارىسىندا تەمەكى شەگۋشىلەرگە ىندەتتىڭ الدەقايدا اۋىر تيەتىنىن بايقاعان.
تەمەكى وكپە جۇمىسىنا انشەيىندە دە كەدەرگى كەلتىرەدى. ال ينفەكتسيا جۇققاندا كۇرەسۋگە دارمەنى دە ازايادى ەكەن. ونىڭ ۇستىنە تەمەكى تارتقان ۋاقىتتا اۋىز بەن مۇرىننىڭ اشىق بولۋى سەبەپتى تەمەكىمەن بىرگە ۆيرۋستى جۇتۋ قاۋپى دە بار.
كاتالونياداعى Cognitive Neurolab زەرتتەۋ توبىنىڭ عالىمى ديەگو رەدولار COVID-19-دان كوز جۇمعان ايەلدەر مەن ەرلەر اراسىنداعى ايىرماسىنا توقتالىپ, بارلىق ەلدە ۆيرۋس جۇعۋى ەكى جىنىس ءۇشىن دە ءبىرشامادا بولعانىمەن, ايەلدەرگە قاراعاندا ەر ادامدار كوبىرەك اجال قۇشقانىن جازادى. عالىم ەرلەردىڭ وكپەسى تەمەكى شەگۋ سالدارىنان ۆيرۋس ەكپىنىنە شىداي الماي جاتقانىن العا تارتقان.
