شەكارالىق اۋدانداردىڭ ماسەلەسى «Egemen Qazagstan» گازەتىندە بىرنەشە رەت كوتەرىلگەن دە. ناتيجە جوق ەمەس, شەكاراعا تاياۋ جاتقان بەس اۋداننىڭ 2020-2024 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوسپارى قۇرىلىپ, بىرقاتار جۇمىس قولعا الىندى. كەشەندى جوسپار بويىنشا ءتۇۋ تۇكپىردەگى مارقاكول اۋىلىنا دا ايرىقشا كوڭىل ءبولىنىپ وتىر بۇگىندە. كوڭىل بولىنبەگەندە, حالقى قوپارىلا كوشىپ, اۋىلدارى قاڭىراپ قالعان وڭىرلەردىڭ ءبىرى سول ەدى. ەلىمىز ەتەك-جەڭىن جيىپ, ەڭسەسىن تىكتەگەن سوڭ دا مارقالىقتاردىڭ ماڭدايى شىلقىعان جوق. كۇنى بۇگىنگە دەيىن جەتىمنىڭ كۇيىن كەشىپ كەلگەن. بيىل عانا كەشەندى باعدارلامانىڭ ارقاسىندا مەكتەپتەر, اۋىلدىق اۋرۋحانا, مادەنيەت ءۇيى كۇردەلى جوندەۋدەن ءوتتى. اۋرۋحاناعا ەندى قۇرال-جابدىقتار ساتىپ الىنباق. حيرۋرگ پەن گينەكولوگ ماماندار شاقىرىلىپ, باسپانامەن قامتىلىپتى.
باسپانا دەمەكشى, وبلىس اكىمىنىڭ تىكەلەي تاپسىرماسىمەن مارقاكول اۋىلىنداعى كراحمال كوشەسىنىڭ اياق جاعىندا قوس پاتەرلى 5 تۇرعىن ءۇيدىڭ قۇرىلىسى باستالعان. الداعى ۋاقىتتا بۇل ۇيلەر كوپبالالى انالار مەن از قامتىلعان وتباسىلارعا «شاڭىراق» باعدارلاماسى ارقىلى ساتىلاتىن كورىنەدى. مارقاكول اۋىلدىق وكرۋگىنىڭ اكىمى رۋستەمبەك كەمەشوۆتىڭ ايتۋىنشا, ىرگەتاسى قالانىپ ۇلگەرمەگەن ۇيلەرگە قۇدا تۇسۋشىلەر كوپ سياقتى. سول ءۇشىن دە شىعار, جەكە كاسىپكەرلەردىڭ كۇشىمەن تاعى بەس ءۇي سالۋ جوسپاردا بار ەكەن. الايدا اۋىلدىقتار ۇيلەردىڭ بوس قالىپ جاتقانىنا جاندارى اۋىرادى.
– بۇرىنىراقتا ەل ء«ۇيىم وتسە كوشەمىن» دەپ وتىراتىن. قازىر ساتىپ الۋشى تابىلماسا دا ەسىگىنە قارا ق ۇلىپ ىلەدى دە, كەتە بەرەدى. بوس ۇيلەر كوپ. ال بيۋدجەتتىڭ اقشاسىن شىعىنداپ, جاڭا ءۇي سالىپ جاتقاندارىن تۇسىنبەدىم. اۋىلعا حالىق سىيماي جاتسا جارايدى, ءۇي سالۋعا بولار ەدى. ونىڭ وزىندە قالقايىپ بوس تۇرعان ۇيلەردى جوندەپ بەرسە, الدەقايدا ءتيىمدى بولماي ما؟! ەڭ دۇرىسى, الدىمەن اۋىلدا جۇمىس ورىندارىن اشۋ كەرەك. ايتپەسە مارقاكولدىڭ ورتاسىنا التىننان ساراي سوقسا دا حالىق تۇراقتامايدى, – دەيدى اۋىل تۇرعىنى, زەينەتكەر ابزالبەك مۇحامەتجانوۆ.
مارقاكولدىڭ ورتالىعىنا التىننان ساراي سوعىلماسا دا, نۇر-سۇلتانداعى «بايتەرەكتىڭ» كوشىرمەسى ورنادى, كۇرشىمدەگىدەي ابايدىڭ قولادان قۇيىلعان ەسكەرتكىشى بوي كوتەردى. ءمۇسىننىڭ جان-جاعى اباتتاندىرىلدى, ەلەكتر شامدارى تارتىلدى. سونداي-اق اۋىل اجارىن اشا تۇسەتىندەي اۋەندى سۋبۇرقاق ىسكە قوسىلدى. مۇنداعى مۋزىكالىق سۋبۇرقاقتىڭ ۇزىندىعى 12 مەتر, ەنى 9 مەتردى قۇرادى. اۋىلدىڭ ىشىندەگى جەتى كوشەگە جارىق تارتىلىپ, 8 كوشە اسفالتتالدى, ون كوشەگە قيىرشىق تاس توگىلدى. ءۇش بىردەي بالالاردىڭ ويىن الاڭى سالىندى. فۋتبول الاڭى بار. اۋدان باسشىلىعىنىڭ ايتۋىنشا, سوڭعى وتىز جىلدا مۇنداي جۇمىستار قولعا الىنباعان ەكەن. ءبىزدىڭ دە جەتىمنىڭ كۇيىن كەشتى دەپ وتىرعانىمىز سول ەمەس پە؟!
– اۋىلدا اتقارىلىپ جاتقان جۇمىستاردىڭ بارلىعىنا دەرلىك جەرگىلىكتى ازاماتتار تارتىلدى. گەولوگيالىق زەرتتەۋ ءجۇرىپ جاتقان «ماڭقا» كەن ورنىندا دا اۋىلدىڭ جيىرما شاقتى تۇرعىنى جۇمىس ىستەپ ءجۇر. بيىل مارقاكول اۋىلدىق وكرۋگىندە عانا 1 ملرد-عا جۋىق قارجى يگەرىلدى, – دەيدى وكرۋگ اكىمى رۋستەمبەك كەمەشوۆ.
وكرۋگ اكىمى اۋىلشارۋاشىلىق سالاسىندا اتقارىلعان جۇمىستاردى دا ءتىزىپ شىقتى. ماسەلەن, ەگىستىكتى سۋارۋ ماقساتىنداعى «ششۋكينسكي» جانە «ساندىقتوعان» اتتى ۇلكەن ەكى كانالدىڭ كوزدەرى اشىلعان. سۋ جەتكەن سوڭ بوس جاتقان 600 گەكتار القاپقا بيداي, ارپا, كوپجىلدىق شوپتەر ەگىلگەن. وكرۋگتىڭ شارۋا قوجالىقتارى تەحنيكالارعا قول جەتكىزىپ جاتىر. تارباعاتاي اۋدانىنداعى «ىقىباي» شارۋا قوجالىعىنان اسىل تۇقىمدى 37 بۇقا اكەلىنگەن. ء«نۇرالى» شارۋاشىلىعىنىڭ بازاسىندا ءسۇت فەرماسى سالىنىپ, كەلەر كۇندەرى جۇمىسىن باستاماق نيەتتە. جانىنان 1000 باسقا ارنالعان بورداقىلاۋ الاڭى بوي كوتەرگەن.
سونىمەن قاتار اۋىز سۋ ماسەلەسى دە تولىق شەشىمىن تاپقانعا ۇقسايدى. اۋىلدان بەس شاقىرىمداي جەردەگى ۇشقۇدىق باستاۋىنان شىعىپ جاتقان سۋعا قۇبىر تارتىلىپ, سۋ جيناقتايتىن ورىنعا جەتكىزگەن.
ر.كەمەشوۆ ەرتەڭگى كۇنگە قۇرىلىپ وتىرعان جوسپارلارىمەن دە ءبولىستى.
– دەنە شىنىقتىرۋ-ساۋىقتىرۋ كەشەنىن سالۋ ءۇشىن جەر بەلگىلەنىپ قويدى. كەلەسى جىلى 24 پاتەرلى ۇيلەردىڭ ءبىرىن جوندەپ, اۋىلعا كەلگەن جاس مامانداردى, مۇعالىمدەردى باسپانامەن قامتۋ ويدا بار. سول كوپ قاباتتى ءۇيدى جوندەپ, اشساق قالادا پاتەر جالداپ جۇرگەن جاستار كەلەدى دەپ ويلايمىن. پوشتانىڭ ءۇش قاباتتى عيماراتى اۋكتسيون ارقىلى ساتىپ الىندى. كەلەسى جىلى جوندەلىپ, ساۋدا ورتالىعى رەتىندە اشىلماق. دالاداعى دۇڭگىرشەكتەردىڭ بارلىعىن سوندا جيناقتايمىز. اتقارىلىپ جاتقان جۇمىستاردىڭ بارلىعى بيىلمەن شەكتەلمەي, الداعى ۋاقىتتاردا جالعاسىن تابا بەرەدى, – دەيدى وكرۋگ اكىمى.
ر.كەمەشوۆتىڭ سوزىنە سۇيەنسەك, حالىقتىڭ باسقا جاققا كوشۋى توقتادى. كەرىسىنشە شاعىن اۋىلدارعا كوشىپ كەلىپ, شارۋاشىلىق اشىپ جاتقاندار بار. شارۋاشىلىقتارى شالقىپ جاتسا, نۇر ۇستىنە نۇر, ارينە. بىراق وسىدان بىرنەشە جىل بۇرىن مارقاكولدە شۇجىق تسەحى مەن ءسۇت زاۋىتى اشىلىپ, ءوزىن ءوزى اقتاي الماسا كەرەك, قايتا جابىلىپ قالعان. تۇرعىنداردىڭ پىكىرىنشە, تسەح, زاۋىت سىندى جۇمىس ورىندارىن اشپايىنشا, تۇكپىردەگى حالىقتى ۇستاپ قالۋ قيىن. ونىڭ ۇستىنە وتىن-كومىردىڭ باعاسى دا قىمبات كورىنەدى. اعاش وتىننىڭ تەكشە مەترى 20 مىڭ تەڭگەدەن باستالسا, قاراجىرادان جەتكىزىلەتىن كومىردىڭ تونناسى – 25 مىڭ تەڭگە. قىسى قىتىمىر مارقا ءوڭىرى ءۇشىن بۇل دا – ۇلكەن ماسەلە. قورىتا ايتقاندا, شەكارا شەبىندەگى ەلگە شىنايى جاناشىرلىق كەرەك.
