ەكونوميكا • 19 قاراشا، 2020

حالىقارالىق ۆاليۋتا قورى كوروناۆيرۋسقا قارسى شارالاردى جوعارى باعالادى

حالىقارالىق ۆاليۋتا قورى قازاقستانداعى ەكونوميكالىق جاعداي، سونداي-اق پاندەميا سالدارىن ازايتۋ جانە حالىق پەن بيزنەستى قولداۋ بويىنشا جۇرگىزىلىپ جاتقان ساياسات بويىنشا ساراپتامالىق باعالاۋدى ۇسىندى، دەپ حابارلايدى Egemen.kz

ايىم ءداۋىت

حۆق ۇلتتىق ەكونوميكاداعى ناقتى سەكتوردىڭ وڭ ديناميكاسىن جانە تۇراقتاندىرۋشى ءرولىن اتاپ ءوتتى.

بيىل 10 ايدىڭ قورىتىندىسى بويىنشا وڭدەۋ ونەركاسىبىندە ءوسىم 3،2%، ونىڭ ىشىندە ماشينا جاساۋدا - 16،5%، اۆتوموبيل جاساۋدا - 53،6%، تاماق ونىمدەرىن وندىرۋدە - 3،4%، جەڭىل ونەركاسىپتە - 16،4%، فارماتسەۆتيكادا - 39،7% قۇرادى. قۇرىلىستاعى ءوسۋ قارقىنى - 10،7%، اۋىل شارۋاشىلىعىندا 5،2% قۇرادى.

وسى جىلدىڭ قورىتىندىسى بويىنشا حۆق COVID-19 پاندەمياسىنا بايلانىستى شەكتەۋ شارالارىنان تۋىنداعان كورسەتىلەتىن قىزمەتتەر سالاسىنداعى ەكونوميكالىق بەلسەندىلىكتىڭ قىسقارۋى، سونداي-اق وپەك+ اياسىنداعى ۋاعدالاستىقتار شەڭبەرىندە قازاقستاننىڭ مۇناي ءوندىرۋدى ازايتۋ جونىندەگى مىندەتتەمەلەرىن ورىنداۋىنان قر ءجىو-ءنىڭ ءوسۋ قارقىنىنىڭ 2،7%-عا دەيىن باياۋلاۋىن كۇتۋدە.

سونىمەن قاتار، حۆق-نىڭ بۇرىن جاريالانعان بولجامىنا (World Economic Outlook، October 2020) سايكەس، 2020 جىلى قر ەكونوميكاسىنىڭ باياۋلاۋ قارقىنى دامىعان ەلدەرمەن سالىستىرعاندا (-5،8%)، سونداي-اق دامۋشى ەكونوميكالارمەن سالىستىرعاندا (-3،3%) ورتاشا الەمدىك (-4،4%) دەڭگەيدەن تومەن بولادى.

حۆق ميسسياسى ۇكىمەتتىڭ پاندەميا اياسىندا جۇزەگە اسىرىپ جاتقان داعدارىسقا قارسى شارالارىنا جوعارى باعا بەردى.

حۆق بۇل شارالاردىڭ ەلىمىزدەگى الەۋمەتتىك-ەكونوميكالىق جاعدايدىڭ تۇراقتىلىعىن، ونىڭ ىشىندە وسال ءۇي شارۋاشىلىقتارى مەن بيزنەسكە تىكەلەي كومەك كورسەتۋ ارقىلى قامتاماسىز ەتۋدەگى اسا ماڭىزدى ءرولىن اتاپ ءوتتى.

حۆق سونداي-اق اقشا-كرەديت جانە قارجى ساياساتى جەلىسى بويىنشا، اتاپ ايتقاندا، ينفلياتسيالىق تارگەتتەۋگە بەيىلدىلىك ماسەلەسى بويىنشا قر ۇلتتىق بانكىنىڭ شەشىمتالدىعى مەن ۋاقىتتىلىعىن جوعارى باعالادى. بۇل اعىمداعى جىلدىڭ كوكتەمىندەگى وقيعالار سىرتقى كۇيزەلىستەردىڭ امورتيزاتورى رەتىندە كورسەتكەن يكەمدى ايىرباس باعامىن قولداۋدى، سونىمەن قاتار دوللارلاندىرۋ دەڭگەيىن تومەندەتۋگە باعىتتالعان ساياساتتى ىلگەرىلەتۋدى جانە ايىرباس باعامىنىڭ قۇبىلمالىلىعىنىڭ ينفلياتسياعا اسەرىن بىرتىندەپ تومەندەتۋگە باعىتتالعان رەفورمالاردى جۇرگىزۋدى قامتيدى.

حۆق سونداي-اق ۇكىمەت ازىرلەپ جاتقان قازاقستاننىڭ 2025 جىلعا دەيىنگى ستراتەگيالىق دامۋ جوسپارى شەڭبەرىندە جاڭا رەداكتسياسىندا بەلگىلەنگەن قۇرىلىمدىق رەفورمالارعا، ونىڭ ىشىندە ۇلتتىق ءوندىرىستىڭ باسەكەگە قابىلەتتىلىگىن ودان ءارى ارتتىرۋ، مەملەكەتتىڭ ەكونوميكاعا قاتىسۋىن ازايتۋ، وندىرمەيتىن سالالاردى دامىتۋ، مەملەكەتتىك باسقارۋدىڭ تيىمدىلىگىن ارتتىرۋ، دەنساۋلىق ساقتاۋ جانە ءبىلىم بەرۋ جۇيەلەرىن جەتىلدىرۋ جونىندەگى شارالارعا قولداۋ ءبىلدىردى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز