2020 جىلعى 18 قاراشا كۇنى جانىبەك اۋىلىنىڭ سولتۇستىك-باتىس جاعىنداعى كول بەتىندە اققۋلار قاتىپ قالعانى تۋرالى حابار تارادى. جانىبەك اۋىلدىق وكرۋگى اكىمىنىڭ ورىنباسارى ءلاززات ايتقاليقىزى جەرگىلىكتى قۇتقارۋشىلارعا حابارلاسىپ, جابايى قۇستاردى قۇتقارۋدى سۇراعان.
جەرگىلىكتى تۇرعىنداردىڭ سوزىنە قاراعاندا اققۋلار سۋ ايدىنىنىڭ ءالى قاتا قويماعان كىشكەنە بولىگىندە توپتالىپ ءجۇزىپ جۇرگەن. بىراق تاڭعى ايازدا كول بەتى تۇگەل قاتىپ, قۇستاردىڭ باۋىرى مۇزعا جابىسىپ قالعان. اۋىل تۇرعىندارى ءازيحان زينەكەشەۆ پەن اناتولي دۋيۋنوۆ اققۋلاردى قۇتقارماق بولىپ, مۇزدى ويىپ, بوساتقان ەكەن. بىراق قۇستار جىلى جاققا ۇشۋعا ارەكەت جاساماعان. ال سۋ بەتىندە وسىلاي تاعى ءبىر كۇن قالسا, بايعۇس قۇستاردىڭ اجال تاباتىنى انىق ەدى.
وقيعا ورنىنا باتىس قازاقستان وبلىستىق توتەنشە جاعدايلار دەپارتامەنتى ء"ورت ءسوندىرۋ جانە اپاتتان قۇتقارۋ جۇمىستارى قىزمەتىنە" قاراستى №21 ءورت ءسوندىرۋ بەكەتىنىڭ قۇتقارۋشىلارى كەلدى. جاعدايدى باعامداعان سوڭ ولار ارنايى قۇرالدارمەن جابايى قۇستاردى ۇستاپ, سۋدان الىپ شىقتى. حالىق قۇتقارۋشىلار تۇراربەك وتەنعاليەۆ پەن نۇرمۇحان عابدەنوۆتىڭ ەپتىلىگىنە ريزا بولدى.
"قازىرگى ۋاقىتتا قۇستار جانىبەك اۋىلى تۇرعىنىنىڭ جىلى قوراسىنا جەتكىزىلىپ, ورنالاستىرىلدى. ولاردى كوكتەمگە, كۇن جىلىعانعا دەيىن ۇستاي تۇراتىن ورىن ماسەلەسىن ويلاستىرىپ جاتىرمىز", دەپ حابارلادى باتىس قازاقستان توتەنشە جاعدايلار دەپارتامەنتىنىڭ ءباسپاسوز قىزمەتى.
