جىل باسىندا جاريالانعان بايقاۋدىڭ شارتىنا سايكەس ەلىمىزدىڭ تۇكپىر-تۇكپىرىنەن جيىرماعا جۋىق سۋرەت كەلىپ تۇسكەن. كارتينالار جازۋشىنىڭ «قۇدايسىزدار», «جىندى جەل», «اعايىندار», «جۇلدىزدى بەلبەۋ», «يت جىلى», «زاۋال» سىندى اڭگىمەلەرىنىڭ جەلىسى بويىنشا جازىلعان. پورترەتىن بەينەلەگەن سۋرەتشىلەر دە بولدى. ال بايقاۋدىڭ جەڭىمپازدارى جازۋشى شىعارماسىن بەينەلەۋ ارقىلى تاقىرىپتى اشا تۇسۋىنە قاراي انىقتالدى. البەتتە, ورىنداۋ تەحنيكاسى, شەبەرلىگى دە باسشىلىققا الىندى. بايقاۋعا ۇسىنىلعان جۇمىستاردى جازۋشى, سۋرەتشى الىبەك اسقاروۆ, «قازاق ەلى» مونۋمەنتىنىڭ اۆتورى سەمبىعالي سماعۇل, بەلگىلى شارج شەبەرى ەركىن نۇرازحان, وزىندىك ەرەكشە قولتاڭبالارى بار سۋرەتشىلەر ادىلعالي باياندين, جەڭىس كاكەن ۇلى باعالادى.
– قالامگەردىڭ شىعارماشىلىعىنا قاتىستى سۋرەت كورمەسى وتە بەرمەيتىن. سوڭعى رەت قىرعىز اعايىندار شىڭعىس ايتماتوۆتىڭ 90 جىلدىعىندا سۋرەتشىلەر كورمەسىن وتكىزگەن ەدى. ەندى مىنە, ديداحمەت ءاشىمحان ۇلىنىڭ اڭگىمەلەرىنىڭ جەلىسى بويىنشا بىرنەشە پولوتنو جازىلىپتى. بۇل جاقسى ءۇردىس, دەپ اتاپ ءوتتى قازاقستان سۋرەتشىلەر وداعىنىڭ مۇشەسى ەركىن نۇرازحان.
ال باس جۇلدە – 500 مىڭ تەڭگەنى ەنشىلەگەن جارمالىق سۋرەتشى ءمادي قايىرحان جازۋشىنىڭ شىعارمالارىنا كومپوزيتسيالىق كارتينا جانە «قۇدايسىزدار» اڭگىمەسىنىڭ جەلىسىنە مايلى بوياۋمەن يلليۋستراتسيا جاساعان.
«قۇدايسىزدار» اڭگىمەسىندە تاقىرىبى ايتىپ تۇرعانداي, كوممۋنيستىك پارتيا تۇسىنداعى باسشىلاردىڭ قۇدايسىز ءىس-ارەكەتتەرى سۋرەتتەلگەن.
جاس سۋرەتشى جازۋشىنىڭ اڭگىمەسىندەگى «ارقالاپ كەتكەن جوق, جەتەكتەپ كەتتى عوي, اعا. مۇنداعى ءبارىمىزدىڭ قاراپ وتىرعانىمىز – ءبىر قىزىل سيىردىڭ ءتورت ەمشەگى ەدى, سونى الىپ كەتتى عوي اپامىز...» دەگەن جولدارىن تەرەزەنىڭ ارعى جاعىندا كورسەتىپ, فيلوسوفيالىق ويدى جەتكىزگەن. بەرگى پلانعا جۇپىنى ءۇيدىڭ تەرەزەسىنەن تەلمىرىپ قاراپ تۇرعان قارا ۇلدى بەينەلەگەن. وتاعاسى تەرەڭ ۋايىمعا باتقانداي. ايەلى قۇنداقتاعى بالاسىنا مەيىرىمىن توگىپ وتىر. قابىرعادا ءستاليننىڭ پورترەتى ىلىنگەن. قىزىل جاعالىلار ەسىكتى شالقاسىنان اشىپ, توبەلەرىنەن ءتونىپ تۇر. مىنە, باس جۇلدە يەگەرى ءمادي قايىرحان اڭگىمەدەگى نەگىزگى ويدى توپتاستىرىپ, ءبىر كارتيناعا سىيعىزعان.
سونىمەن قاتار ءبىرىنشى ورىن العان سۋرەتشىگە – 300 مىڭ, ەكىنشى ورىنعا – 200 مىڭ, ءۇشىنشى ورىنعا 100 مىڭ تەڭگە ۇلەستىرىلدى. ودان بولەك ىنتالاندىرۋ سىيلىقتارى دا ۇسىنىلدى. جازۋشىنىڭ ۇلى داۋلەت ءاشىمحانوۆتىڭ ۇيىمداستىرۋىمەن وتكەن بايقاۋعا دەمەۋشىلىك ەتكەن كاسىپكەر عاني شايماردان ۇلى ەدى.
ەستەرىڭىزگە سالا كەتسەك, جازۋشى, جۋرناليست ديداحمەت ءاشىمحان ۇلى ەڭبەك جولىن شىعىس قازاقستان وبلىسىنىڭ «كوممۋنيزم تۋى», «لەنينشىل جاس» گازەتتەرىندە ءتىلشى بولىپ باستاپ, ءومىرىن جازۋشىلىققا, جۋرناليستيكاعا ارنادى. عۇمىرىنىڭ سوڭىنا دەيىن ۇلتتىڭ جوعىن جوقتاپ, قالىڭ وقىرمانىنىڭ ىستىق ىقىلاسىنا بولەنىپ ءوتتى.
شىعىس قازاقستان وبلىسى
