ءانشى اجەلەردىڭ ەل مادەنيەتىن دامىتۋداعى ەڭبەگى ەلەنىپ, جۋىردا انسامبل رەسپۋبليكالىق «ارداگەرلەر ۇيىمى» قوعامدىق بىرلەستىگىنىڭ ورتالىق كەڭەسى تاراپىنان ارداگەرلەر ۇجىمى جۇمىسىنا سىڭىرگەن ەڭبەگى مەن ەلىمىزدىڭ مادەني دامۋىنا بەلسەندى قاتىسقانى ءۇشىن العىس حاتپەن ماراپاتتالدى.
– «مۇنايشى» ونەر ورداسى ونەرپازدارىنىڭ جەتىستىكتەرىمەن جوعارى بەلەسكە قول جەتكىزىپ كەلەدى. تۇرعىندار ىقىلاسىنا بولەنگەن, ۇلتتىق ونەردىڭ ناسيحاتتاۋشىسى ءارى جاناشىرى «التىن داريا» حالىقتىق ۇجىمىنىڭ رەسپۋبليكالىق «ارداگەرلەر ۇيىمىنىڭ» العىس حاتىمەن ماراپاتتالۋى زور جاڭالىق بولدى. انالاردىڭ ەڭبەكتەرى ەلدىك دارەجەدە ەلەنىپ, حالقىمىزدىڭ العىسىن الىپ وتىر, – دەيدى جاڭاوزەن قالالىق مəدەنيەت جəنە تىلدەردى دامىتۋ ءبولىمىنىڭ باسشىسى ۇلبازار ورىنباەۆا.
جاڭاوزەن قالاسىنىڭ مادەنيەتى – تامىرى تەرەڭدەپ, جاپىراعى جايقالعان سالا. مۇنايلى قالاداعى ونەر وشاقتارى بيىك بەلەستەردى باعىندىرىپ ءجۇر. قازىرگى ۋاقىتتا «مۇنايشى» مادەنيەت ۇيىندە 26 ۇجىم, 11 حالىقتىق ۇجىم جانە 36 ۇيىرمە تۇراقتى تۇردە جۇمىس اتقارادى. «اسىل داريا» اجەلەر ءانسامبلى – سولاردىڭ ءبىرى.
– العاش مادەنيەت سالاسىنا قادام باسىپ ونەر ورتاسىنا تۇسكەننەن باستاپ ءتۇرلى تالانتتاردىڭ بار ەكەندىگىن كوردىم. كەز كەلگەن ونەر يەسى ءۇشىن حالىقتىڭ ىستىق ىقىلاسىنان ارتىق ماراپات جوق. حالقىمىزدىڭ ءداستۇرلى ءان-كۇي ونەرىنىڭ دارىپتەلۋى ءۇشىن بۇل ءانسامبلدىڭ ماڭىزى زور. وسى ۇجىمدا ءجۇرىپ, ولكەمىزدىڭ كەز كەلگەن اۋقىمدى مادەني ءىس-شارالارىندا ونەر كورسەتىپ جۇرگەنىمە ريزامىن. ارىپتەستەرىمنىڭ ورتاسىندا شىنايى ونەر يەسىنە دەگەن قۇرمەتتى يەلەنىپ, ەلىمنىڭ سۇيىسپەنشىلىگىنە بولەنۋ – ۇلكەن باقىت, – دەدى ۇجىم جەتەكشىسى ماحبۋزا شومانوۆا.
شىعارماشىلىقتىڭ شامشىراعىن جارقىراتىپ, سول ارقىلى ءداستۇر ساباقتاستىعىن جالعاۋدى ماقسات ەتكەن اجەلەر قانداي قۇرمەتكە دە لايىق.
ماڭعىستاۋ وبلىسى
