تسەلينوگراد اۋدانىندا بيىل «ەڭبەك» باعدارلاماسى ارقىلى شاعىن نەسيە الىپ, شارۋاسىن تۇزەيمىن دەۋشىلەردىڭ قاتارى كوبەيىپ كەلەدى. اۋىلدا ەكى قولعا ءبىر كۇرەك تابا الماي وتىرعان ازاماتتار مەملەكەتتىك باعدارلامالاردىڭ شاراپاتىنىڭ ارقاسىندا نار تاۋەكەل ەتىپ, نارىق ايدىنىندا الدىمەن انىق باعدار الىپ, ناتيجەلى ىسكە ۇمتىلۋدا. ولاردىڭ اراسىندا تىگىن تسەحتارىن اشىپ, اتا كاسىپ – مال شارۋاشىلىعىمەن اينالىسقىسى كەلەتىندەر از ەمەس. كاسىپكەرلەر ەڭ الدىمەن وڭىردە باسەكەلەستىگى جوق سالالارعا ۇمتىلۋدا. بۇل ابدەن تۇسىنىكتى. ويتكەنى وندىرگەن ونىمدەرى تەز ءوتىپ كەتسە, بيزنەسكە سالعان قاراجاتتارى دا جىلدام قايتارىم بەرەدى. ماسەلەن, اۋداندا ەمدىك قاسيەتى مول ەشكى ءسۇتىن وندىرەمىن دەۋشىلەر دە بار. اسىلىندا ەشكى – ءوسىمتال ت ۇلىك. باعزى زاماندا ەل تىنىسىن ايتقىزباي اڭعاراتىن سۇڭعىلا قاريالار «ەسىڭ كەتسە, ەشكى جي» دەپ نەگە ايتتى دەيسىز.
الدىڭعى جىلى 122 ادام مەملەكەتتىك گرانتقا يە بولدى. ولارعا 36 ملن تەڭگە قاراجات ءبولىندى. شاعىن اۋدان ءۇشىن ءتاپ-ءتاۋىر كورسەتكىش. العا ۇمتىلعان وسىنشا ادامنىڭ ۇيدەگى ويى وڭىنان وڭعارىلىپ كەتسە, كاسىپكەرلىكتىڭ رەتى كەلىپ-اق قالار ەدى. شىڭعىس رومانجاروۆ ەسىمدى كاسىپكەر «بولاشاق» دەپ اتالاتىن وقۋ ورتالىعىن اشىپ وتىر. ورتالىقتى اشۋ سەبەبى, اتا-انالار تاراپىنان كوپتەگەن ءوتىنىش تۇسكەن سوڭ مەكتەپ وقۋشىلارىنا ساباقتان تىس وقۋعا كومەك كورسەتۋ. ءارى وزىنە دە ءتيىمدى. بۇگىندە بۇل ورتالىققا قىرىقتان استام وقۋشى كەلىپ, بىلىمدەرىن ەسەلەي تۇسۋدە.
– جۇمىستى بىلتىر باستادىق, – دەيدى «بولاشاق» ءبىلىم بەرۋ ورتالىعىنىڭ ديرەكتورى شىڭعىس رومانجاروۆ, – «اتامەكەن» ۇلتتىق كاسىپكەرلەر پالاتاسىندا وقىپ, سەرتيفيكات الدىم. ستاندارتقا سايكەس 500 مىڭ تەڭگە كولەمىندە گرانت ءبولىندى. ول قاراجاتقا قاجەتتى تەحنيكالاردى ساتىپ الدىم.
قازىر ورتالىقتا 1-شىدەن 11-ءىنشى سىنىپقا دەيىنگى بالالار ءبىلىم الادى. بۇل جەردە باسىمدىق ماتەماتيكا پانىنە بەرىلگەن. الداعى ۋاقىتتا شاحمات جانە روبوت تەحنيكا ءتارىزدى ۇيىرمەلەر اشۋ دا مەجەلەنىپ وتىر.
بيىل مەملەكەتتىك گرانت الامىن دەپ ۇمىتتەنگەن ادامدارعا 27 ملن تەڭگەدەن استام قاراجات بولىنگەن. ەلۋدەن استام كاسىپكەرلەر ءوز ءىسىن دوڭگەلەتۋدە. ولاردىڭ اراسىندا اتا كاسىپ – مال شارۋاشىلىعىن دامىتۋعا وزىندىك ۇلەستەرىن قوسۋعا ۇمتىلىپ وتىرعاندار دا بارشىلىق. ولار قاتال قىسقا قامدانىپ, مال ازىعىن دايىنداۋدا نۇر-سۇلتان قالاسىنىڭ ىرگەسىندە ءتورت ت ۇلىكتىڭ باسى وسسە, ازىق-ت ۇلىك بەلدەۋىنە دە از دا بولسا شاراپاتى تيەر ەدى. توسىن كاسىپتى باستاۋعا بەل بۋىپ وتىرعاندار دا بار. ماسەلەن, «باستاۋ بيزنەس» باعدارلاماسى ارقىلى زوودۇكەن اشپاقشى بولىپ ۇمتىلىپ وتىرعان ءاسيا بەكنازاروۆا تىڭعا سوقپاق سالماق. ونىڭ ايتۋىنا قاراعاندا, اۋىلدا مۇنداي دۇكەن بۇرىن-سوڭدى مۇلدە بولماعان ەكەن. ءتىپتى كوپشىلىك مۇنداي دۇكەننىڭ نە ساتاتىنىن دا بىلمەيدى. جاڭالىقتان قۇلاقتانعان جۇرت ەندى عانا دۇكەن تابالدىرىعىن اتتاۋدا.
كاسىپتىڭ جامانى جوق. سەپتىگى الدىمەن ەلگە, سودان سوڭ وزىنە تيسە, بيزنەس سالاسىندا باعى جانعانى ەمەس پە؟!
اقمولا وبلىسى,
تسەلينوگراد اۋدانى
