ماعزۇم مىرزاعاليەۆ بۇۇ دامۋ باعدارلاماسىنا قولداۋ كورسەتكەنى ءۇشىن العىس ءبىلدىرىپ, ەكولوگيا جانە قورشاعان ورتانى قورعاۋ سالاسىنداعى بىرلەسكەن جۇمىستىڭ ماڭىزدىلىعىن اتاپ ءوتتى.
ء"بىز قازاقستان رەسپۋبليكاسىنىڭ جاڭا ەكولوگيالىق كودەكسىن دايىندادىق. ونىڭ نەگىزگى پريتسيپتەرىنىڭ ءبىرى - «لاستاۋشى تولەيدى» دەپ اتالادى. سودان كەيىن ەڭ ۇزدىك قولجەتىمدى تەحنولوگيالاردى ەنگىزۋ ماسەلەسى ماڭىزدى. بۇدان بولەك ەكولوگيالىق كودەكس ەكولوگيالىق تولەمدەردى 100% قورشاعان ورتانى قورعاۋ شارالارىنا جۇمساۋعا مۇمكىندىك بەرەدى. جالپى العاندا, ەلىمىزدىڭ ەكولوگيالىق دامۋ كورسەتىشتەرىن جەتىلدىرۋگە باعىتتالعان ءىس-شارالار كەشەنى قابىلدانۋدا. وسى باعىتتا بۇۇدم-مەن بىرلەسكەن جۇمىس ماڭىزدى ءرول اتقارادى. 2021-2025 جىلدارعا ارنالعان ەلدىك باعدارلاما ءتيىمدى ناتيجەلەرگە قول جەتكىزۋگە سەرپىن بەرەدى", دەپ اتاپ ءوتتى ماعزۇم مىرزاعاليەۆ.
"بۇۇ دامۋ باعدارلاماسى قر ەكولوگيا, گەولوگيا جانە تابيعي رەسۋرستار مينيسترلىگىمەن قول جەتكىزگەن ارىپتەستىك دەڭگەيىن جوعارى باعالايدى. ءبىز قازاقستان ۇكىمەتىنىڭ باسقا سالانىڭ دا دامۋىن جەدەلدەتەتىن “جاسىل” ەكونوميكاعا كوشۋگە كۇش سالۋىن قولدايمىز. جاڭا ەلدىك باعدارلامادا ءبىز “جاسىل” ەكونوميكانى باسىم باعىتتاردىڭ ءبىرى رەتىندە قاراستىرامىز. ول ەكونوميكانى ديۆەرسيفيكاتسيالاۋعا, جاڭا ينۆەستيتسيالار تارتۋعا, جۇمىس ورىندارى مەن جاڭا كاسىپورىندار قۇرۋعا ىقپال ەتەدى. جاسىل دامۋ قازاقستان ءۇشىن كەلەشەكتە ورنىقتى دامۋ ءۇشىن ءسوزسىز, جاقسى مۇمكىندىك بەرەدى", دەدى ياكۋپ بەريش.
كەزدەسۋ بارىسىندا تاراپتار قازاقستان ۇكىمەتىنىڭ بيوالۋانتۇرلىلىكتى ساقتاۋ مەن ورنىقتى پايدالانۋدىڭ 2030 جىلعا دەيىنگى تۇجىرىمداماسى جوباسىن بەكىتۋىن تالقىلادى. تۇجىرىمداما تابيعي ەكوجۇيەنى ساقتاۋ مەن قالىپقا كەلتىرۋدىڭ, ستراتەگيالىق قۇجاتىنا اينالادى.
بۇدان بولەك, قازاقستاندا “جاسىل” تەحنولوگيالاردى ەنگىزۋ, كليماتتىڭ وزگەرۋىنە قاتىستى ارەكەت ەتۋ, COVID-19 پاندەمياسىنان كەيىنگى ەكولوگيالىق قالپىنا كەلتىرۋ ستراتەگياسىن جۇزەگە اسىرۋ بويىنشا ارىپتەستىك ماسەلەسى دە تالقىلاندى.
بۇۇدم-نىڭ قازاقستانداعى قىزمەتى ەلدىڭ دامۋىنداعى ستراتەگيالىق باسىمدىقتارعا سايكەس كەلەتىن ەلدىك باعدارلامامەن رەتتەلەدى.
