"جفب" باعدارلاماسىنا جوعارى بۋىننىڭ 50 مەملەكەتتىك قىزمەتشىسى: ۆيتسە-مينيسترلەر, وبلىس, قالا جانە اۋدان اكىمدەرىنىڭ ورىنباسارلارى, قر پرەزيدەنتى اكىمشىلىگىنىڭ ءبولىم باسشىلارى, سونداي-اق پرەزيدەنتتىك جاستار كادر رەزەرۆىنىڭ رەزەرۆيستەرى قاتىستى.
جابىلۋ راسىمىنە قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل, نازارباەۆ ۋنيۆەرسيتەتىنىڭ جوعارى مەملەكەتتىك ساياسات مەكتەبىنىڭ دەكانى ۆەنگ تات حۋەي, كاسىبي دامۋ ينستيتۋتىنىڭ ديرەكتورى مارگاريتا قادىروۆا, سونداي-اق پروفەسسور, نازارباەۆ ۋنيۆەرسيتەتىنىڭ جوعارى مەملەكەتتىك ساياسات مەكتەبىنىڭ اكادەميالىق ماسەلەلەر جونىندەگى دەكانىنىڭ ورىنباسارى كولين نوكس قاتىستى.
"بارلىعى 10 مودۋل, 240 وقىتۋ ساباعى بولدى. جاتتىقتىرۋشىلار ءبىلىم تراەكتورياسىن, وقىتۋ باعىتتارىن, كۋرس ادىستەمەلەرىن ازىرلەۋ ءۇشىن بىرقاتار سەسسيالار وتكىزدى. وقىتۋدىڭ نەگىزگى ماقساتى تىڭداۋشىلاردىڭ بويىندا جاڭا فورماتسياداعى باسشىلارعا قاجەتتى داعدىلاردى دامىتۋ ەدى. وقۋدان وتكەن ءاربىر تىڭداۋشى قاجەتتى ءبىلىمدى يگەرىپ, ءوز الەۋەتى مەن قۇزىرەتتىلىكتەرىن ودان ءارى دامىتا الدى دەپ سەنەمىن", دەدى مەملەكەتتىك باسقارۋ اكادەمياسىنىڭ رەكتورى ەرلان ءابىل.
ء"بىز ءتيىمدى مەملەكەتتىك باسقارۋدىڭ ماڭىزى زور ەكەندىگىنە كامىل سەنەمىز جانە قازاقستاندىقتاردىڭ ءومىرىن جاقسارتۋ بويىنشا ميسسيامىزدى جۇزەگە اسىرۋدا ىلگەرى ءجۇرۋىمىز ءۇشىن اكادەميامەن ورناتىلعان ارىپتەستىك اياسىندا بەرىلگەن مۇمكىندىككە ريزامىز. قاتىسۋشىلار ستسەنارلىق جوسپارلاۋداعى جانە پەرسپەكتيۆالىق ويلاۋداعى جاڭا تەندەنتسيالارمەن, مەملەكەتتىك ساياساتقا قاتىستى شەشىمدەر قابىلداۋدا مىنەز-ق ۇلىقتىق ينسايتتاردى پايدالانۋمەن جانە باعدارلامالاردى قۇرۋدا يننوۆاتسيالاردى ەنگىزۋدىڭ ءتۇرلى ادىستەرىمەن, مەملەكەتتىك قىزمەتتەردى ۇسىنۋمەن جانە سىزدەردىڭ قازاقستان حالقىنا قىزمەت ەتۋلەرىڭىزدىڭ تيىمدىلىگىن ارتتىرۋعا مۇمكىندىك بەرەتىن باسقارۋمەن تانىستى دەپ ۇمىتتەنەمىز", دەدى نازارباەۆ ۋنيۆەرسيتەتىنىڭ جوعارى مەملەكەتتىك ساياسات مەكتەبىنىڭ دەكانى ۆەنگ تات حۋەي.
10 اپتالىق كۋرس بارىسىندا تىڭداۋشىلار نەگىزگى قىزمەتتەرىنەن قول ۇزبەي, "جاھاندىق كوزقاراس", ء"تيىمدى كوممۋنيكاتسيالار" جانە "ترانسفورماتسيالىق كوشباسشىلىق" سىندى قۇزىرەتتىلىكتەردىڭ ءۇش نەگىزگى باعىتى بويىنشا الەۋەتتەرىن ارتتىرىپ, ءبىلىم كوكجيەكتەرىن كەڭەيتتى. ونلاين پلاتفورمالاردىڭ كەڭ مۇمكىندىكتەرى ساباقتاردى ستراتەگيالىق سەسسيالاردان, ينتەراكتيۆتى پىكىرتالاستاردان, ترەنينگتەردەن باستاپ كەيس-ستادي جانە شاعىن توپتارداعى جۇمىستارعا دەيىنگى ءتۇرلى فورماتتاردا وتكىزۋگە ىقپال ەتتى.
ونلاين وقىتۋ بارىسىندا مەملەكەتتىك قىزمەتشىلەر باسقارۋ تەحنولوگيالارى, ساياساتتى ازىرلەۋ ونەرى مەن عىلىمى, ستسەنارلىق جوسپارلاۋ, ديزاين-ويلاۋ, ەموتسيونالدىق ينتەللەكت جانە كوشباسشىلىق, كوۋچينگ جانە مەنتورلىق كومەك, داعدارىستىق كوممۋنيكاتسيا بويىنشا كۋرستاردان ءوتتى.
ساباقتاردى جەتەكشى وتاندىق بيزنەس-جاتتىقتىرۋشىلار جانە مەملەكەتتىك باسقارۋ اكادەمياسىنىڭ كوۋچتارى وتكىزدى, ولاردىڭ اراسىندا قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل, CREATA كونسالتينگتىك كومپانياسىنىڭ ديرەكتورى داۆيد تۋگانوۆ, ICU قازاقستانداعى, ورتا ازياداعى جانە ءباا-دەگى وكىلدىگى ورتالىعىنىڭ باسشىسى, ماستەر-كوۋچ عاليا باعدات, «نيكا» شەشەندىك ونەر ورتالىعىنىڭ جەتەكشىسى مەرۋەرت جۇنىسبەك, جۋرناليست, تەلە- جانە راديو جۇرگىزۋشىسى ماحاببات ەسەن, شەشەندىك ونەر جانە كوممۋنيكاتسيالار جونىندەگى جاتتىقتىرۋشى جاننا يبراەۆا بولدى. نازارباەۆ ۋنيۆەرسيتەتىنىڭ جوعارى مەملەكەتتىك ساياسات مەكتەبى اتىنان نۋ جمسم ۆيتسە-دەكاندارى كولين نوكس پەن ريكاردو پەليتسو, نۋ جمسم اسسيستەنت پروفەسسورى يفتيكحار لودحي, سونداي-اق سينگاپۋر مەن گونكونگتان شاقىرىلعان پروفەسسورلار: لي كۋان يۋ اتىنداعى سينگاپۋر ۇلتتىق ۋنيۆەرسيتەتىنىڭ مەملەكەتتىك ساياسات مەكتەبىنەن كەلگەن باسسكاران ناير جانە ەدريان كۋا, گونكونگ عىلىم جانە تەحنولوگيالار ۋنيۆەرسيتەتىنەن كەلگەن دونالد لوۋ ترەنەرلەر رەتىندە قاتىستى.
كۋرس ترەنەرى جاننا يبراەۆانىڭ ايتۋىنشا, جوعارى ءبىلىمدى, ومىرلىك جانە باسقارۋشىلىق تاجىريبەسى بار مەملەكەتتىك قىزمەتشىلەرگە ارنالعان جاڭا وقۋ باعدارلاماسىن ازىرلەۋ ۇلكەن ەڭبەكتى قاجەت ەتتى. اسىرەسە, سىرتقى ورتا قارقىندى وزگەرىستەرگە ۇشىراپ جاتقاندا بۇل وڭاي بولمادى. مەملەكەتكە توپتىڭ مۇشەسىنە اينالا الاتىن, ستاندارتتى ەمەس جاعدايلاردا تەز شەشىم قابىلداي بىلەتىن, تاپتاۋرىندار شەڭبەرىنەن شىعا الاتىن باسشىلار قاجەت.
"سىني ويلاۋ, كرەاتيۆتىلىك, شىعارماشىلىق قابىلەتتەر جانە قويىلعان مىندەتتەردى ورىنداۋداعى ستاندارتتى ەمەس, كرەاتيۆتى تاسىلدەمە بۇل – مەملەكەتتىك رەفورمالاردى تابىستى جۇزەگە اسىرۋدىڭ ءبىر شارتى", دەپ اتاپ ءوتتى ترەنەر.
نازارباەۆ ۋنيۆەرسيتەتىنىڭ جوعارى مەملەكەتتىك ساياسات مەكتەبىنىڭ اكادەميالىق ماسەلەلەر جونىندەگى ۆيتسە-دەكانى كولين نوكس ەكى جارىم ايعا سوزىلعان ونلاين كۋرس بارىسىندا اكادەميكتەر مەن پراكتيكتەر اراسىندا اكادەميالىق قىزمەت سالاسىندا جاڭا يدەيالاردى جۇزەگە اسىرۋعا جانە مەملەكەتتىك سەكتوردا حالىقارالىق رەفورمالار مەن يننوۆاتسيالاردى جالعاستىرۋعا ىقپال ەتەتىن ۇشجاقتى پىكىرتالاس تۋىنداعانىن اتاپ ءوتتى.
ءۇي تاپسىرمالارىن ورىنداۋ بارىسىندا توپتار ءبىر-ءبىرىن, كۋرس ترەنەرلەرىن دە تاڭقالدىرىپ, شابىتتاندىرۋعا تىرىستى. ونلاين وقىتۋ بارىسىندا تىڭداۋشىلار كرەاتيۆتىلىك تانىتىپ, تاۆتوگرامما تۇرىندە ولەڭ جازۋدان باستاپ, ساباق تۋرالى ءوز ويلارىن رەپ مانەرىندە جەتكىزۋگە دەيىن ەرەكشەلەنە الدى, ونلاين ءىس-شارا سوڭىندا بۇلاردىڭ بارلىعى كۋرس قوناقتارى مەن ترەنەرلەرىنە كورسەتىلدى.
پاۆلودار وبلىسى اكىمىنىڭ ورىنباسارى ساكەن شاياحمەتوۆ: "بارلىق ۇيىمداستىرۋشىلارعا جانە جاتتىقتىرۋشىلارعا زور العىسىمدى بىلدىرەمىن! بۇل ءبىزدىڭ كوكجيەگىمىزدى كەڭەيتۋگە, جاڭا قۇرالدارعا يە بولۋىمىزعا مۇمكىندىك بەرگەن كەرەمەت جوبا بولدى. ەڭ باستىسى بۇل – ءبىزدى لايىقتى ادامدار مەن ءوز وتانىن شىنايى سۇيەتىن جاندار قورشاپ جۇرگەندىگىنىڭ كەزەكتى ءبىر دالەلى! بارلىعىنا ساتتىلىك پەن تابىس تىلەيمىن! ءبىزدىڭ جەتىستىكتەرىمىز – بۇل ءبىزدىڭ ەلىمىزدىڭ جەتىستىكتەرىنە قوسىلعان ۇلەس!", دەپ ءوز ەموتسيالارىمەن جانە وقۋدان العان اسەرىمەن ءبولىستى.
سونداي-اق, پرەزيدەنتتىك جاستار كادر رەزەرۆىنىڭ رەزەرۆيستى, "QAZEXPOCONGRESS" ۇلتتىق كومپانياسى اق ۇيىمداستىرۋشىلىق-كادر جۇمىسى دەپارتامەنتىنىڭ ديرەكتورى ماركەن احمەتوۆ تە وقۋدان العان اسەرىمەن ءبولىستى: "قىزىقتى وتكەن 10 اپتا بارىسىندا ءبىز جەتەكشى وتاندىق جانە شەتەلدىك ماماندارمەن بىرگە بىرەگەي كۋرستان وتتىك, بۇل كۋرس ءبىزدىڭ ءوز-وزىمىزگە ۇڭىلۋىمىزگە, دۇرىس پايدالانا العان جاعدايدا مەملەكەتتىك باسقارۋ جۇيەسىن قايتا ىسكە قوسۋعا نەگىز بولا الاتىن ساپالى ينسايتتار الۋىمىزعا مۇمكىندىك بەردى. ۇسىنىلعان تاقىرىپتاردىڭ ارقايسىسى تەرەڭ زەردەلەۋدى قاجەت ەتەتىن ىرگەلى ءپاندى تانىتاتىندىقتان, ەگجەي-تەگجەيلى قاراستىرۋدى تالاپ ەتەدى. قازىردىڭ وزىندە ءبىز يگەرگەن قۇرالدارىمىزدى ءوزىمىزدىڭ كۇندەلىكتى قىزمەتىمىزدە قولدانۋدامىز".
ساياسي قىزمەتشىلەرگە ارنالعان "جاڭا فورماتسياداعى باسشى" وقۋ باعدارلاماسىنىڭ ونلاين جابىلۋىنىڭ سوڭىندا اكادەميا رەكتورى ەرلان ءابىل تىڭداۋشىلاردىڭ كەيىنگى ەڭبەك قىزمەتتەرىنە تابىس تىلەپ, ولاردىڭ بىلىكتىلىكتى ارتتىرۋ كۋرستارىنان وتكەندىكتەرىن راستايتىن ەلەكتروندىق سەرتيفيكاتتارىن تابىس ەتتى.
"جاڭا فورماتسياداعى باسشى" باعدارلاماسىن العاش رەت تۇڭعىش پرەزيدەنت نۇرسۇلتان نازارباەۆ ءوزىنىڭ 2018 جىلعى 5 قازانداعى "قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ" اتتى جولداۋىندا جاريالاعان ەدى. ەلباسى نۋ جمسم-نە مەملەكەتتىك باسقارۋ اكادەمياسىمەن بىرلەسە وتىرىپ, ساياسي باسقارۋشىلار مەن مەملەكەتتىك قىزمەتشىلەر ءۇشىن ترەنينگتەر وتكىزۋگە تاپسىرما بەردى.
