"قاجىمۇقان مۇڭايت پاس ۇلى ءبىزدىڭ اتاقتى جەرلەسىمىز. كەلەر جىلى مەرەيتويى وتەدى. سوعان بايلانىستى جۇرتشىلىقتىڭ ۇسىنىسىمەن ورداباسى اۋدانىندا قاجىمۇقان اتامىزدىڭ ۇلكەن مەموريالدى كەشەنىن سالۋ قاجەت دەگەن باستاما كوتەرىلدى. وعان ارنايى قارجى ءبولىپ, ءتيىستى قۇجاتتارىن دايىندادىق. قازىر سمەتالىق-جوبالاۋ قۇجاتى دايىن. ءتيىستى مينيسترلىك ارقىلى ۇكىمەتكە ۇسىندىق. ول جەردە قارجى ماسەلەسى شەشىلەتىن بولسا, وندا كەلەسى جىلى كەشەن قۇرىلىسىن باستايمىز", دەدى ومىرزاق شوكەەۆ ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.
ايتا كەتەيىك, 2021 جىلى قازاقتىڭ بەلگىلى پالۋانى قاجىمۇقان مۇڭايتپاس ۇلىنىڭ 150 جىلدىق مەرەيتويى وتەدى. سوعان وراي تۇركىستان وبلىسى, ورداباسى اۋدانىندا قاجىمۇقانعا مەموريالدىق كەشەن سالىناتىن بولىپ جوسپارلانعان. زاماناۋي ۇلگىدە بوي كوتەرەتىن نىساننىڭ قۇرىلىس جۇمىستارى وسى جىلدىڭ قاراشا ايىندا باستالىپ, 2021 جىلدىڭ قازان ايىندا اياقتالۋى ءتيىس ەدى.
الايدا, تاياۋدا سەناتور ءالىمجان قۇرتاەۆ قر پرەمەر-ءمينيسترى اسقار مامينگە دەپۋتاتتىق ساۋال جولداپ, وندا ق. مۇڭايتپاس ۇلىنىڭ مەموريالدىق كەشەنىن سالۋعا رەسپۋبليكالىق بيۋدجەتتەن قارجى بولىنبەي وتىرعانىن ايتقان بولاتىن.
