شارا بارىسىندا ىلە-الاتاۋ پاركى اۋماعىندا قالدىقتاردى ءبولىپ جيناۋ الاڭدارى تانىستىرىلدى. وسىلايشا, ىلە-الاتاۋ قاتتى تۇرمىستىق قالدىقتاردى بولەك جيناۋدىڭ ينفراقۇرىلىمىن تولىققاندى جاساقتاعان قازاقستانداعى العاشقى ۇلتتىق پارك بولىپ وتىر.
ەكولوگيا, گەولوگيا جانە تابيعي رەسۋرستار مينيسترلىگىنىڭ تاپسىرماسىمەن پارك اۋماعىندا بارلىعى 31 جاڭا قالدىق الاڭدارى ورناتىلىپ, وكم وپەراتورى 225 كونتەينەر قويدى. قۇرعاق جانە دىمقىل قالدىقتى ەكى بولەك سالىپ اكەتۋ ءۇشىن قازاقستاندا بالاماسى جوق كولىكتىك تەحنيكا قۇراستىرىلدى.
"2019 جىلى ۇلتتىق پارككە 300 901 ادام كەلدى. بۇل كورسەتكىش ارتادى دەپ كۇتىلۋدە. سوندىقتان 2030 جىلعا دەيىن پارك اۋماعىنداعى قاتتى تۇرمىستىق قالدىقتاردى سۇرىپتاۋ دەڭگەيىن 85% - عا دەيىن جەتكىزۋدى جوسپارلاپ وتىرمىز.
قالدىق الاڭدارى الما – اراسان, مۇزتاۋ, قيماسار, اققايىن, قاسكەلەڭ, اقساي, ەسىك, تۇرگەن جانە ت. ب. شاتقالداردا ورناتىلدى", دەدى "ىلە-الاتاۋ" مۇتپ باس ديرەكتورى دامير مالگەلديەۆ.
ەكولوگيا ۆيتسە-ءمينيسترى ەرلان نىسانباەۆ شارا بارىسىندا سونىمەن بىرگە ىلە-الاتاۋ ۇلتتىق پاركىندە 30 "ەكو-سەرگەك" كامەراسى ورناتىلاتىنىن حابارلادى. بۇل جوبا جەرگىلىكتى اكىمدىكپەن بىرگە جۇزەگە اسىرىلادى.
ء"بىز ازاماتتارىمىزدىڭ تابيعاتتا وزدەرىن ۇستاۋ مادەنيەتىنە قاراپ, وسىنداي شارالار قابىلداۋعا ءماجبۇرمىز. كەلۋشىلەر ءوز ارتتارىنان ءجيى قوقىس قالدىرادى, تەمەكى تۇقىلىن تاستايدى, جاققان وتتارىن وشىرمەي, ورتكە سەبەپكەر بولادى. ۆانداليزم فاكتىلەرى دە كەزدەسەدى. ارينە, "ەكو-سەرگەكتى" ەنگىزۋدەگى باستى ماقساتىمىز ايىپپۇل سالۋ ەمەس, اعارتۋ, ءتۇسىندىرۋ جۇمىستارىن جۇرگىزۋ", دەپ اتاپ ءوتتى ەرلان نىسانباەۆ.
كامەرالار تەك تۋريستەردى تارتىپكە سالىپ قانا قويماي, ءورت شىققان كەزدە جەدەل دابىل قاعىپ, جىلدام ارەكەت ەتۋگە, براكونەرلەردى انىقتاۋعا سەپتەسپەك.
قوقىستى سۇرىپتاپ تاستاۋ الاڭدارى مەن "ەكو-سەرگەك" تاجىريبەسىن بىرتىندەپ باسقا ۇلتتىق پاركتەرگە دە ەنگىزۋ جوسپاردا بار.
ايتىلعان ۇسىنىستار قوعامدىق كەڭەس مۇشەلەرى تاراپىنان تولىق قولداۋ تاپتى. تۇرگەن, الما-اراسان شاتقالدارىندا بولعان ەكوتۋريزم ينفراقۇرىلىمى, ەكولوگيالىق ءبىلىم ماسەلەلەرىن تالقىلاپ, ۇسىنىستارىن ءبىلدىردى.
