ەل جايى ەسىنەن شىقپايتىن مەيرامبەك اعا ۇلى وتان سوعىسىنىڭ 65 جىلدىق مەرەيتويىنا وراي, سازگەر-جاۋىنگەر رامازان ەلەباەۆتىڭ تۋعانىنا 100 جىل, قۇدىقاعاش اۋىلىنىڭ قۇرىلعانىنا 80 جىل تولۋىنا ارنالعان «رامازان ەلەباەۆتىڭ ەلى» دەپ اتالاتىن كىتابىن شىعاردى. اتالمىش جيناقتا اۋدان مەن اۋىلدىڭ بەلگىلى ادامدارى جايىندا ءسوز بولادى. بۇل اۋىل – كوكىرەگىڭدى ماقتانىش كەرنەپ, كەڭىنەن قامتىپ ايتۋعا تۇرارلىقتاي ەلدى مەكەن. شوق جۇلدىزداي شاعىن ەلدى مەكەننەن ەكى بىردەي مەملەكەتتىك سىيلىقتىڭ لاۋرەاتى, ەكى عىلىم دوكتورى, بەس عىلىم كانديداتى شىققان ەكەن. ولاردىڭ ءومىر جولى, ىستەگەن ىستەرى كەيىنگى ۇرپاق ءۇشىن ۇلكەن ونەگە. ۇلى جەڭىستىڭ 70 جىلدىعى مەرەكەسى قارساڭىندا ەل اقساقالى ءمالتاي جۇنىسوۆپەن بىرلەسە اۋىل ورتاسىنداعى ەسكەرتكىشتى جاڭارتىپ, ۇلكەن ءىس-شارا وتكىزدى. شوق جۇلدىزداي شاعىن اۋىلدان ۇشىپ شىعىپ, ارقايسىسى ءار قيىردا ەڭبەك ەتىپ جۇرگەن وسى جەردىڭ پەرزەنتتەرى تۇگەلگە جۋىق جينالدى.
اۋىلدىڭ كىرە بەرىسىندە «قۇدىقاعاش 1929» دەگەن جازۋى بار, بيىكتىگى 17 مەترلىك اسپانعا ۇمتىلعان ستەللا تۇر. بۇل ستەللانى تۇرعىزعان وسى اۋىلدىڭ تۋماسى ومىربەك ەلۋباەۆ. ءبىر قۋانىشتىسى, اعايىندى اسىلحان, سەيىلحان شارىپوۆتەر ءوز قاراجاتتارىنا جاڭا مەشىت سالىپ بەردى. توي بارىسىندا قانشاما شارۋا اتقارىلدى.
مەيرامبەك اعا الاشتىڭ ايتۋلى ازاماتى, عۇلاما عالىم قانىش ساتپاەۆتىڭ بەلسەندى ناسيحاتشىسى. جالعىز ناسيحاتشىسى عانا ەمەس, زەردەلەي زەرتتەگەن زەرتتەۋشىسى. ۇلىنى ۇلگى ەتۋدىڭ ارقاسىندا 2006 جىلى عالىمدى ونەگە تۇتقان, سولاي بولماققا ۇمتىلعان 19 مەكتەپ تۇلەگى سەمەيدەگى كەن بارلاۋ كوللەدجىنە وقۋعا ءتۇستى. 2011 جىلدان بەرى «التىن ساقا» ۇلتتىق ويىنىن جانداندىرۋدا الدەنەشە سايىس وتكىزىلدى. وبلىس تۇرماق رەسپۋبليكالىق دەڭگەيدە. بۇل ارادا ۇلتىمىزدىڭ ۇمىت بولعان سالت-ءداستۇرىن تىرىلتسەم دەگەن ماقسات جاتىر.
– «قازاقتانۋ» عىلىمي-اعارتۋشىلىق جوباسىنىڭ نەگىزگى ماقساتى – «رۋحاني جاڭعىرۋ» باعدارلاماسىن جۇزەگە اسىرۋ اياسىندا بارشا قازاقستاندىقتاردىڭ ورتاق مادەني كودىنىڭ, ءبىرتۇتاس قۇندىلىقتارىنىڭ جانە جالپىۇلتتىق تاريحي ساناسىنىڭ نەگىزىندە حالىقتىڭ بىرلىگىن نىعايتۋ, – دەيدى مەيرامبەك اعا, – «رۋحاني جاڭعىرۋ» باعدارلاماسى اياسىنداعى بۇل جوبا قازاقتىڭ مادەنيەتىن, تاريحىن, سونداي-اق, قازاق حالقىنىڭ ۇلتتىق قۇندىلىقتارىن ناسيحاتتاۋعا باعىتتالىپ وتىر. ونىڭ ىشىندە قوناقجايلىلىق, سەنىم مەن دوستىق سياقتى قاسيەتتەردى دارىپتەۋ ارقىلى جاستاردىڭ بويىندا ەلجاندىلىق سەزىمىن وياتۋ.
العاشقىدا قازاقستان حالقى اسسامبلەياسىنىڭ ورتالىق اپپاراتىنان حات كەلىپ, «رۋحاني جاڭعىرۋ» – «قازاقتانۋ» اتتى ۇلكەن عىلىمي-اعارتۋشىلىق جوباسىنىڭ جۇمىسىن جۇرگىزۋ ءىسى مەيرامبەك اعاعا تاپسىرىلعان. ويتكەنى, اعانىڭ بۇگىنگە دەيىن اتقارىپ كەلە جاتقان جۇمىسى قازاق ءتىلى مەن مادەنيەتىن جاس ۇرپاقتىڭ ساناسىنا ءسىڭىرۋ.
البەتتە, جوبا اياسىندا كوپتەگەن ءىس-شارالار ۇيىمداستىرىلدى. قازاق حالقىنىڭ قۇندىلىقتارىن ءتۇسىنىپ, ناسيحاتتاۋ ءۇشىن بەلسەندى تۇردە جاستاردى تارتۋ – جوبانىڭ نەگىزگى مىندەتتەرىنىڭ ءبىرى بولىپ سانالادى.
كوكشە جۇرتشىلىعىنىڭ كوزى ۇيرەنگەن ءبىر سۋرەت بار. ۇلتقا قاتىستى, بولاشاققا بايلانىستى كەز-كەلگەن ۇلكەندى-كىشىلى جيىننىڭ ناق ورتاسىندا ەل مۇراتىن كوكسەگەن, جۇرت بىرلىگىن ارمانداعان تىنىمسىز ءبىر جان جۇرەدى. ول – مەيرامبەك قيىقوۆ. پەندە عۇمىر – سوقتىقپالى سوقپاق. ادام – جولاۋشى. ىزدەگەن جوعى ەلىنىڭ ەستە جوق كەزەڭدەگى ءىنجۋ-مارجان ىسپەتتى سالت-ءداستۇرى, ادەت-عۇرپى.
كوكشەتاۋ
