ەكونوميكا • 16 قاراشا، 2020

كومىرىمىز كوپ ەكسپورتتالاتىن ەلدەر

277 رەت كورسەتىلدى

وتكەن جىلدىڭ قورىتىندىسى بويىنشا قازاقستان تاس كومىر ەكسپورتتاۋشىلاردىڭ ۇزدىك وندىعىنا ەندى. الەمدىك ەكسپورتتىڭ 1،7 پايىزى ءبىزدىڭ ەلگە تيەسىلى ەكەن. ال قوڭىر كومىر (ليگنيت) ەكسپورتى بويىنشا ۇزدىك ۇشتىكتىڭ قاتارىندامىز. بۇل رەتتە قازاقستان الەمدىك ەكسپورتتىڭ 2،6 پايىزىن وتەپ وتىر.

ينفوگرافيكانى جاساعان امانگەلدى قياس، «ەQ»

«QazTrade» ساۋدا ساياساتىن دامىتۋ ورتالىعىنىڭ مالىمەتىنشە، تاس كومىردى ەكسپورتتايتىن العاشقى وندىقتىڭ قاتارىندا قازاقستاننان بولەك، اقش، رەسەي، اۋستراليا، يندونەزيا، وڭتۇستىك افريكا، كولۋمبيا، موڭعوليا، كانادا جانە موزامبيك بار. ال قوڭىر كومىر ەكسپورتتاۋدان ءبىزدىڭ ەل رەسەي مەن يندونەزيادان كەيىن جايعاسىپ، ۇشتىككە ەندى.

قازاقستان سوڭعى ون جىلدا ورتاشا ەسەپپەن جىل سايىن 25-30 ملن توننا كومىر ەكسپورتتاپ كەلەدى. ماسەلەن، 2010 جىلى تاس جانە قوڭىر كومىردى قوسا ەسەپتەگەندە 30،1 ملن توننا ءونىم شەكارادان اسىرىلعان. 2015 جىلعا دەيىنگى ەكسپورت كولەمى 30 ملن توننادان تومەندەگەن ەمەس. 2016 جىلى شامامەن 4 ملن تونناعا ازايعان. سودان بەرى 30 ملن-دىق مەجە باعىنباي كەلەدى.

 بىلتىر 25،8 ملن توننا كومىر سىرتقا شىعارىلدى. وسى جىلدىڭ سەگىز ايىنداعى كورسەتكىش – 16،2 ملن توننا. بۇل وتكەن جىلدىڭ سايكەس كەزەڭىمەن سالىستىرعاندا 6،3 پايىزعا از. دەمەك COVID-19 پاندەمياسى بۇل باعىتقا دا ءوز سالدارىن تيگىزگەن.

– 2020 جىلدىڭ قاڭتار-تامىز ارالىعىندا قازاقستاننان ەكسپورتتالاتىن شيكىزاتتىق تاۋار­لاردىڭ ىشىندە كومىر جەتىنشى ورىنعا تۇراقتادى. سەگىز ايدا 246،9 ملن دوللاردىڭ ءونىمى شەتەل اسىرىلعان. جالپى، كومىر ەكسپورتىنىڭ نەگىزگى بولىگىن تاس كومىر قۇرايدى. ونى بيىلعى ستاتيستيكادان دا اڭعارۋعا بولادى. 2020 جىلدىڭ سەگىز ايىنداعى كومىر ەكسپورتىنىڭ 86،8 پايىزى تاس كومىرگە تيەسىلى. بۇل دەگەنىمىز – 14،05 ملن توننا. بىلتىرعى كەزەڭ­مەن سالىستىرعاندا كورسەتكىش 10،2 پايىزعا كەم. ال قوڭىر كومىردىڭ ەكسپورتى 32،2 پايىزعا ۇلعايىپ، 2،14 ملن تونناعا جەتتى، – دەيدى «QazTrade» ساۋدا ساياساتىن دامىتۋ ورتالىعى» اق باس ساراپشىسى باقىتبەك امانتاەۆ.

قاڭتار-تامىز ارالىعىندا قازاقستاننان ەكسپورتتالعان شيكىزاتتىق تاۋارلاردىڭ العاشقى وندىعىنا كومىردەن بولەك، شيكى مۇناي (17 148،7 ملن دوللار)، تابيعي گاز (1 378،0 ملن دوللار)، مىس كەندەرى (936،3 ملن دوللار)، بيداي (621،5 ملن دوللار)، باعالى مەتالدار (459،7 ملن دوللار)، تەمىر كەندەرى (376،9 ملن دوللار)، زىعىر تۇقىمى (111،3 ملن دوللار)، ارپا (109،5 ملن دوللار) جانە مىرىش كەندەرى (102،0 ملن دوللار) بار.

قازاقستان كومىرىن كوپ تۇتى­ناتىن ەل – رەسەي. 2020 جىلدىڭ سەگىز ايىنداعى ەكسپورتتىڭ 82،8 پايىزى نەمەسە 13،4 ملن تونناسى سولتۇستىكتەگى كورشىمىزگە باعىتتالعان. ودان كەيىنگى ورىنداردا وزبەكستان – 1،2 ملن توننا (7،4 پايىز)، ۋكراينا – 532،8 مىڭ توننا (3،3 پايىز)، قىرعىزستان – 467،9 مىڭ توننا (2،9 پايىز)، بەلارۋس – 390،8 مىڭ توننا (2،4 پايىز) جانە قىتاي – 165،4 مىڭ توننا (1 پايىز) تۇر. قازاقستان كومىرىن يمپورتتايتىن ەلدەردىڭ قاتارىندا پولشا، گرەتسيا، گرۋزيا، لاتۆيا مەملەكەتتەرى دە بار. قاڭتار-تامىز ارالىعىندا اتالعان ءتورت ەلگە بارلىعى 20،7 مىڭ توننا كومىر جەتكىزىلگەن.

– ءبىزدىڭ كومىر رەسەيگە ەڭ تومەنگى باعامەن جەتكىزىلەدى – ورتاشا ەسەپپەن تونناسىنا 9،8 دوللار. ال ءبىر تونناسىنا وزبەكستان – 18،3 دوللار، قىرعىزستان – 25،6 دوللار، بەلارۋس – 26 دوللار، ۋكراينا – 96،7 دوللار، قىتاي 114،6 دوللار تولەيدى. اتاپ وتەرلىگى، قازاقستاندىق كومىردىڭ ورتاشا باعاسى الەمدىك نارىقتاعىدان ءۇش ەسە ارزان. سونداي-اق ءبىزدىڭ ءونىمنىڭ باعاسى الەمدىك نارىقپەن سالىستىرعاندا الدەقايدا تۇراقتى. قاڭتار-تامىز ارالىعىندا قازاقستاندىق كومىردىڭ ورتاشا ەكسپورتتىق باعاسى تونناسىنا 15 دوللاردى قۇرادى. بۇل 2019 جىلدىڭ سايكەس كەزەڭىمەن سالىستىرعاندا 21،3 پايىزعا تومەن. ال سەگىز ايدىڭ ىشىندە الەمدىك نارىق­تاعى كومىردىڭ ءبىر تونناسى 44،5 دوللارعا تەڭ بولدى.كور­سەتكىش بىلتىرعى جاعدايدان 28،7 پايىزعا تومەن، – دەيدى ب.امانتاەۆ.

ستاتيستيكاعا سۇيەنسەك، 2020 جىلدىڭ قاڭتار-قىركۇيەك ارالىعىندا قازاقستاندا 78 ملن توننا كومىر وندىرىلگەن. بۇل وتكەن جىلدىڭ سايكەس كەزەڭىمەن شامالاس. ال قازاقستانعا اكەلىنەتىن يمپورتتىق كومىردىڭ كولەمى 483،7 مىڭ توننانى قۇرادى. كور­سەتكىش بىلتىرعى جاعدايمەن سا­لىستىرعاندا 7،6 پايىزعا جوعا-
رى.

سوڭعى جاڭالىقتار

سينگاپۋردىڭ سوڭعى اۋىلى

الەم • بۇگىن، 17:55

پەتر يان ۇزدىكتەر قاتارىنا ەندى

جەكپە-جەك • بۇگىن، 16:05

ۇقساس جاڭالىقتار