13 قاراشا كۇنى كوممۋنالدىق قىزمەتتەر 30 مىڭ تەكشە مەترگە جۋىق قار شىعارعان. نۇر-سۇلتان قالاسى اكىمىنىڭ ورىنباسارى نۇرلان سولتامبەكوۆ قالاداعى كوشەلەردى قاردان تازالاۋ جۇمىستارى قالاي جۇرگىزىلىپ جاتقانىن ايتتى.
"كوشەلەردى تازالاۋدىڭ ەكى ءتۇرى بار: مەحانيكالاندىرىلعان جانە قولمەن. ءبىرىنشى كەزەكتە, ەرەجە بويىنشا, جولداردا كەپتەلىس بولماۋى ءۇشىن قوزعالىس وتە كوپ جولدار تازارتىلادى. ودان ءارى ورتاشا قوزعالىس ۋچاسكەلەرى – الاڭدار, ۆوكزال ماڭىنداعى اۋماقتار قاردان تازارتىلادى. مەحانيكالاندىرىلعان سىپىرۋ مەن قار كۇرەۋ سىپىرۋ-جيناۋ ماشينالارىمەن جانە سىپىرۋ تراكتورلارىمەن جۇرگىزىلەدى. ياعني الدىمەن قار جۇرەتىن جولدان جول جيەكتەرىنە جينالادى, سول جەردەن جول جۇمىسشىلارى قاردى ساموسۆالدارعا جينايدى. ەلەستەتىپ كورىڭىزشى, 20 توننالىق كاماز ەكى مينۋت ىشىندە قالىڭ قارمەن تولادى. سونداي-اق, جاياۋ جۇرگىنشىلەر جولى مەن الەۋمەتتىك نىساندار اۋماقتارىن تازارتۋعا ەرەكشە نازار اۋدارامىز", دەدى نۇرلان سولتامبەكوۆ.
قالا جولدارىنىڭ جاياۋ جۇرەتىن بولىگى تايعاققا قارسى ماتەريالدارمەن وڭدەلەدى, ول قار جاۋا باستاعاننان سەبىلەدى. ءبىرىنشى كەزەكتە, كولىك قوزعالىسى ءۇشىن ەڭ قاۋىپتى ماگيسترالدار مەن كوشەلەردىڭ ۋچاسكەلەرى – ءور جانە ەڭىس جولدار, كوپىرلەر, ەستاكادالار, توننەلدەر, كوشە قيىلىستارىنداعى جانە قوعامدىق كولىك ايالدامالارىنداعى تەجەۋ الاڭدارى وڭدەلەدى. ەگەر ءبىرىنشى تسيكل اياقتالعاننان كەيىن قار جاۋا بەرسە, قاجەتتى جۇمىستار قايتالانا بەرەدى.
“سودان كەيىن بارلىق قار پوليگوندارعا شىعارىلادى, وندا ورىندى ۇنەمدەۋ ءۇشىن ارنايى تەحنيكا ونى تىعىزدايدى. قالا بويىنشا قار 24/7 رەجيمدە تازارتىلادى. ءبىزدىڭ پوليگوندا باقىلاۋعا ارنالعان فوتو جانە بەينەكامەرالار ورناتىلعان. قار جيناۋعا ارنالعان تيەگىشتەر بار, ياعني اۋماقتى ۇتىمدى پايدالانۋ ءۇشىن ارنايى كولىكتەر پيراميدا جاسايدى", دەدى قالا اكىمىنىڭ ورىنباسارى.
كۇن سايىن قالا كوشەلەرىن تازارتۋ ءۇشىن 1 مىڭنان استام ارنايى تەحنيكا مەن 1,5 مىڭ جۇمىسشى شىعادى.
