قاراۋىلتوبە اۋىلدىق وكرۋگىنىڭ اكىمى سەيىلبەك تايمانوۆ ەلدىمەكەندە كاسىپكەرلىك نىساندار سانى ارتىپ, قوسىمشا جۇمىس ورىندارىنىڭ پايدا بولعانىن ايتىپ ءوتتى. جىل باسىنان جول جوندەۋ جۇمىستارى دا قارقىندى جۇرگىزىلگەنىن بايانداپ, وكرۋگتەگى قۇقىق بۇزۋشىلىقتىڭ الدىن الۋ باعىتىنداعى جانە كارانتيندىك تالاپتاردىڭ ساقتالۋىنا نەگىزدەلگەن شارالاردىڭ بارىسىنا توقتالدى. ايتۋىنشا جۇمىستار ءوز دەڭگەيىندە اتقارىلىپ, جوسپارعا ساي جۇرگىزىلۋدە.
دەگەنمەن اۋىلدا مەملەكەتتىك باعدارلامالاردى كادەسىنە جاراتىپ, كاسىپ اشۋدى قولعا العان تۇرعىندار قاتارى ءالى دە كوبەيمەي تۇر. بۇل ماسەلەنى قوزعاعان قالا اكىمى مەملەكەتتىك باعدارلامالاردى تۇرعىندارعا ءتيىستى دەڭگەيدە ءتۇسىندىرىپ, اۋىلدىقتاردى كاسىپ اشۋعا شاقىرۋ جۇمىستارىن تياناقتاۋدى اۋىل باسشىسىنا تاپسىردى. ەلدى-مەكەندەگى تازالىق جۇمىستارىن دا سىنعا العان شاھار باسشىسى, ساناۋلى كۇندە اۋىلدىڭ سانيتاريالىق جايى سارالانىپ, ۇدەدەن شىقپاسا وكرۋگ اكىمىنە شارا كورىلەتىنىن دە اتاپ ءوتتى.
قىزىلوزەك اۋىلدىق وكرۋگى اكىمى ساكەن ء ابدىجاپپار جىل اياسىندا ەلدىمەكەندە اتقارىلعان جۇمىستارعا توقتالدى. قىزىلوزەكتە دە كاسىپكەرلىك قارقىن العان. جىل باسىنان بەرى جاڭادان 6 كاسىپكەرلىك سۋبەكتىسى تىركەلىپ, جالپى سانى 129-عا جەتىپ, وتكەن جىلمەن سالىستىرعاندا 5 %-عا وسكەن. مەملەكەتتىك باعدارلامالاردى ءتيىمدى تۇتىنعان اۋىل تۇرعىندارىنىڭ 45 ملن 900 مىڭ تەڭگە بولاتىن 11 جوباسى قارجىلاندىرىلعان. جىل باسىندا اۋىل تۇرعىندارىمەن وتكىزىلگەن ەسەپتى كەزدەسۋدە كوتەرىلگەن ماسەلەنىڭ ءبارى شەشىمىن تاۋىپ, «جۇمىسپەن قامتۋ جول كارتاسى» اياسىندا بيۋدجەتتەن قارالعان قاراجاتقا قاراوزەك بەكەتى-1 جانە جامبىل كوشەلەرىنە ورتاشا جول جوندەۋ جۇمىستارى جۇرگىزىلگەن. باعدارلاما بويىنشا, جول جوندەۋ جۇمىستارىنا اۋىلدىڭ 25 جۇمىسسىز ازاماتى جۇمىسپەن قامتىلدى. اۋىلدا اۋىز سۋ ماسەلەەسى دە تولىق شەشىلگەن. الايدا اۋىل كورسەتكىشىن ارتقا تارتىپ تۇرعان ماسەلە ەلدى مەكەن تازالىعى مەن وكرۋگتە تىركەلگەن قىلمىستار سانى. جىل باسىنان بەرى قىزىلوزەكتە 9 قىلمىس تىركەلگەن. دەگەنمەن 100 پايىز اشىلىپ, ايىپتىلارعا اكىمشىلىك حاتتاما تولتىرىلىپ, جازاعا تارتىلعان.
الاقانداي اۋىلدا قىلمىس مۇلدە بولماۋى كەرەك دەگەن قالا اكىمى قوعامدىق ءتارتىپتى كۇشەيتىپ, قۇقىق بۇزۋشىلىقتىڭ الدىن الۋدى, تۇرعىنداردىڭ قاۋىپسىزدىگىن قامتاماسىز ەتۋدى جاۋاپتىلارعا جۇكتەدى.
سونىمەن قاتار قالاعا قاراستى بارلىق كەنت, اۋىل اكىمدەرىنە جىل كولەمىندە قاراجاتتىڭ باسىم بولىگى قالاعا ەمەس اۋىلدارعا ءبولىنىپ, ول قاراجات تۇرعىندار تاراپىنان كوتەرىلگەن ماسەلەلەردى شەشۋگە باعىتتالعانىن, كورسەتىلگەن قولداۋعا ساي جۇمىس اتقارۋ كەرەكتىگىن قاتاڭ ەسكەرتتى. سونداي-اق, شاھار باسشىسى بەرىلگەن تاپسىرمالاردىڭ مەرزىمىندە جانە ناتيجەلى ورىندالۋى تىكەلەي ءوز باقىلاۋىندا بولاتىنىن جەتىكىزدى.
