جۇمىسىن ۋاقىت تالابىنا ساي جەتىلدىرىپ جاتقان كلينيكانىڭ مۇمكىندىگى مول. ۋنيۆەرسيتەت رەكتورى بولاتبەك ابدراسيلوۆ قازىر كلينيكادا 24 مىڭ ادامعا قىزمەت كورسەتىلەتىنىن, بۇل كورسەتكىشتى 40 مىڭعا دەيىن كوبەيتۋگە مۇمكىندىك بارىن ايتادى. الداعى ۋاقىتتا تۇرعىنداردىڭ كلينيكاعا قارالۋىنا بارلىق جاعداي جاسالعانى جونىندە حابارلاندىرۋلار تاراتىلىپ, ورتالىقتىڭ قىزمەت اياسى كەڭەيتىلمەك.
ۋنيۆەرسيتەت كومەگىنە وبلىس اۋماعىنداعى مەكتەپتەردەن دە سۇرانىس تۇسۋدە. ستۋدەنتتەردىڭ تەوريانى پراكتيكامەن ۇشتاستىرعانى جاقسى مامان بولىپ شىعۋىنا سەپتىگىن تيگىزەتىنىن ايتقان تۇركىستان وبلىسى ادامي الەۋەتتى دامىتۋ باسقارماسى باسشىسىنىڭ ورىنباسارى ارداق سادىقوۆا «پەداگوگ ماماندار دايىنداۋ جۇيەسىندەگى وزەكتى ماسەلەلەر» تاقىرىبىندا ۇيىمداستىرىلعان جيىن بارىسىندا ۋنيۆەرسيتەت رەكتورىنا ءوز ۇسىنىسىن جەتكىزدى.
«الەمدەگى پاندەميانىڭ زاردابىنان ءبىلىم وشاقتارىنىڭ بارلىعى قاشىقتان ءبىلىم الىپ جاتقانى بارشاعا ايان. سول سەبەپتى ءبىز مەكتەپ باعدارلاماسىنا ءبىرشاما وزگەرىس ەنگىزدىك. ءبىر سىنىپتى ەكىگە ءبولىپ, 15 بالادان وقىتىپ جاتىرمىز. ال وعان بىلىكتى ماماندار تاپشى بولىپ وتىر. وسىعان بايلانىستى ۋنيۆەرسيتەتتىڭ جوعارعى كۋرستاعى پەداگوگ ستۋدەنتتەرىنىڭ پراكتيكالارىن سوزعانىن قالاعان ەدىك. الايدا بۇل مۇمكىن بولمادى. مەملەكەتتىك باعدارلاما بويىنشا ولار تەك بەلگىلى ءبىر مەرزىمدە عانا مەكتەپ بازاسىندا پراكتيكادان وتەدى ەكەن. وسىعان بايلانىستى سىزدەردەن مەملەكەتكە ۇسىنىس تاستالسا, بالالاردىڭ ءبىلىم الۋلارىنا جاس ماماندارىڭىز ۇلەس قوسسا ەكەن دەگەن تىلەگىمىز بار», دەدى ا.سادىقوۆا.
بۇل ورايدا ۋنيۆەرسيتەت جانە ادامي الەۋەتتى دامىتۋ باسقارماسى اراسىندا جۇمىس باعىتتارى نەگىزىندە كەلىسىم جاسالىپ, سالالار بويىنشا جۇمىس توبىن قۇرۋ تۋرالى شەشىم قابىلداندى.
ال تۇركىستان پەداگوگيكالىق كوللەدج ديرەكتورى ايدوس اپپازوۆ ۋنيۆەرسيتەتتىڭ مۇمكىندىكتەرىن ايتا وتىرىپ, كوللەدج مۇعالىمدەرىنىڭ ءبىلىمىن ارتتىرۋ ماقساتىندا ماگيستراتۋرادا وقىتۋ ءۇشىن كۆوتا قاراستىرۋدى سۇرادى. سونىمەن بىرگە ۋنيۆەرسيتەتتىڭ ءىت ماماندارى سوڭعى تسيفرلى تەحنولوگيالاردى يگەرۋگە كوللەدج ماماندارىنا كومەك بەرۋ جونىندە ءوتىنىشىن ءبىلدىردى. رەكتور بۇل ۇسىنىستاردى قولداپ, ۋنيۆەرسيتەت تاراپىنان كومەك كورسەتۋگە دايىن ەكەنىن جەتكىزدى.
ماماندارى مەن قىزمەتى سۇرانىسقا يە ۋنيۆەرسيتەتتە 10 مىڭنان اسا ستۋدەنت, ينتەرندەر, ماگيسترانتتار, رەزيدەنتتەر مەن دوكتورانتتار, سونداي-اق دايىندىق فاكۋلتەتىنىڭ تىڭداۋشىلارى ءبىلىم الادى. وقىتۋشىلار ءداستۇرلى وقۋ باعدارلاماسىنىڭ ونلاين كونتەنتىن قىسقا مەرزىم ىشىندە دايارلاپ, ستۋدەنتتەردىڭ ءبىلىم ساپاسىنىڭ تومەندەمەۋىن باستى نازاردا ۇستاۋدا.
ء«بىزدىڭ ۋنيۆەرسيتەتىمىز – رەسمي حالىقارالىق ستاتۋسى بار ءبىرىنشى جوعارى وقۋ ورنى. سونىمەن بىرگە بيىلدىڭ قانتارىنان باستاپ جوعارى وقۋ ورنى پرەزيدەنت قاسىم-جومارت توقاەۆتىڭ جارلىعىمەن «ەرەكشە مارتەبەگە» يە بولدى. ءبىزدىڭ تۇلەكتەردىڭ جۇمىسقا ورنالاسۋ دەڭگەيى دە جىل سايىن جوعارىلاپ كەلەدى. بۇعان شەتەلدىك وقۋ ورىندارىمەن تىعىز بايلانىستا بولۋىمىز دا اسەر ەتۋدە. اتاپ ايتقاندا, تۇركيا, رەسەي, انگليا, گەرمانيا, يسپانيا, يتاليا, قىتاي, پولشا, وزبەكستان ەلدەرىنىڭ جوعارى وقۋ ورىندارىمەن سەرىكتەستىك بايلانىستامىز», دەيدى ۋنيۆەرسيتەت رەكتورى ب.ابدراسيلوۆ.
مەملەكەت باسشىسى جارلىعىمەن بەرىلگەن مارتەبە ۇلكەن اكادەميالىق جانە باسقارۋشىلىق دەربەستىك بەرە وتىرىپ, Ph.D. فيلوسوفيا دوكتورى مەن سالا بويىنشا دوكتور دارەجەسىن دايىنداۋعا, ءبىلىم بەرۋ باعدارلامالارىنىڭ مازمۇنىن انىقتاۋعا جانە جەكە ۇلگىدەگى ديپلومداردى بەرۋگە جول اشتى. سونداي-اق پروفەسسورلىق-وقىتۋشىلىق قۇرامنىڭ جالاقىسىن 75%-عا, قىزمەتكەرلەردىڭ جالاقىسىن 30%-عا ارتتىرۋعا جانە ماتەريالدىق-تەحنيكالىق بازانى جاڭارتۋعا مۇمكىندىك بەردى. جۋىردا اتقارىلعان جۇمىستار بويىنشا حالىققا ەسەپ بەرگەن ۋنيۆەرسيتەت رەكتورى قاشىقتان ءبىلىم بەرۋ جۇيەسىنىڭ ۇيىمداستىرىلۋى, عىلىم سالاسى جانە تاعى باسقا دا اۋقىمدى ىستەر تۋرالى باياندادى. كەلەسى جىلى ستۋدەنتتىك ۋنيۆەرسيادا وتكىزۋ جوسپارلانىپ وتىرعانىن جەتكىزدى. وقۋ ورنىندا جاڭا ءبىلىم بەرۋ باعدارلامالارى سوڭعى ەكى جىلدا 72%-عا ارتقان. بۇرىن 100 ماماندىق بولسا, قازىرگى تاڭدا ۋنيۆەرسيتەت ستۋدەنتتەردى 172 ماماندىق بويىنشا دايارلايدى. سولاردىڭ قاتارىندا روبوت تەحنيكا, تسيفرلى جۋرناليستيكا, تسيفرلى قارجى اناليتيكاسى, كومپيۋتەرلىك مودەلدەۋ جانە دەرەكتەردى ۆيزۋاليزاتسيالاۋ, كومپيۋتەرلىك ينجەنەريا, جوبالاردى باسقارۋ, ءبىلىم سالاسىنداعى مەنەدجمەنت سەكىلدى ماماندىقتار اشىلىپ, دايىندىقتار جۇرگىزىلىپ جاتىر.
ۋنيۆەرسيتەتتە 19 ەلدەن كەلگەن 40 اسا ۇلىس پەن ۇلتتاردىڭ وكىلدەرى, ياعني 1 500-گە جۋىق شەتەل ازاماتى وقيدى. تۇركيا, بولگاريا, ماجارستان, البانيا, بوسنيا, گەرتسەگوۆينا, كوسوۆو, Əزەربايجان, رەسەي ەلدەرىنىڭ ستۋدەنتتەرى ەش كەدەرگىسىز ۋنيۆەرسيتەتتىڭ قاشىقتان وقىتۋ جۇيەسى ارقىلى ءبىلىم الۋدا. ناۋرىزدان باستاپ ۋنيۆەرسيتەتتىڭ وقۋ پروتسەسى تولىقتاي قاشىقتان وقىتۋ جۇيەسىنە كوشىرىلگەن.
«اتا-انالاردىڭ, قوعامنىڭ قاشىقتان وقىتۋعا دەگەن پىكىرى كۇمانعا تولى بولدى. «ستۋدەنت ونلاين وقۋدا جاۋاپكەرشىلىكتى قانشالىقتى سەزىنەدى, قالاي قاتىسادى, نە ۇيرەنەدى, وقۋ ساپاسى تومەندەمەي مە؟» سارىنداعى ساۋالدار سانسىز. ونلاين وقىتۋدا ءاربىر ستۋدەنتتىڭ وقۋ ۇلگەرىمى ونلاين بازا ارقىلى باقىلاندى. قاشىقتان ءبىلىم بەرۋ بارىسىندا ستۋدەنتتەرمەن قاتار اتا-انالارمەن دە بايلانىسىپ وتىردىق. قاشىقتان ءبىلىم بەرۋ جۇيەسىنە, اتقارىلعان جۇمىستار جونىندە ساۋالداما جۇرگىزىپ, باعاسىن الدىق. ساۋالداما بويىنشا ۋنيۆەرسيتەتتىڭ قاشىقتان ءبىلىم بەرۋ اقپاراتتىق جۇيەسىنە ستۋدەنتتەردىڭ 95 پايىزى وڭ باعا بەردى. ال ەمتيحاننىڭ ءادىل وتكەنىن 94,4 پايىزى راستادى. ەمتيحاندى ۇيىمداستىرۋ دەڭگەيىن 94,3 پايىز دەگەن كورسەتكىشكە يە بولدى», دەيدى رەكتور.
ۋنيۆەرسيتەتتىڭ ەندىگى ماقساتى دا ايقىن. بۇل – حالىقارالىق رەيتينگتە 500 ۋنيۆەرسيتەتتىڭ قاتارىنا كىرىپ, ۇلتتىق رەيتينگتە العاشقى بەستىككە ەنۋ, ماتەريالدىق بازانى جەتىلدىرىپ, وڭىرگە قاجەتتى ماماندىقتاردى اشۋ. تۇرعىندار ءۇشىن دە, ۋنيۆەرسيتەت وقىتۋشىلارى مەن ستۋدەنتتەرىنە دە قاجەتتى كلينيكانى زاماناۋي قۇرال-جابدىقتارمەن قامتاماسىز ەتۋ جولعا قويىلعان. سونىمەن بىرگە قازىرگى ۋاقىتتا بىلىكتى مامانداردى باسپانامەن قامتاماسىز ەتۋ ماسەلەسىن شەشۋ باعىتىندا جۇمىستار جۇرگىزىلۋدە.
تۇركىستان وبلىسى
