ماقالادا ايتىلعانداي, كەڭەس ارمياسىنا قاراستى 66-بريگادانىڭ 2-باتالونى 7-روتاسىنداعى 1 جانە 2-ۆزۆودتاعى 17 جاۋىنگەردىڭ گاندجگالدا ەرلىكپەن قازا تاپقانى جايلى دەرەكتەر اشىلعان سوڭ, ەلەۋسىز قالعان ەرلەردى ىزدەۋشىلەردىڭ ارقاسىندا 17 ەردىڭ ەرلىكتەرى لايىقتى باعالارىن العان ەكەن. رەسەي ەلى ءوزىنىڭ جاۋىنگەرلەرىنىڭ بارىنە دەرلىك رەسەي فەدەراتسياسىنىڭ باتىرى اتاعىن بەرگەن. وكىنىشتىسى, وسى توپتاعى قازاقستاندىقتار سەرىكباي تۇرلىباەۆ, ۆلاديمير پروحورەنكو, بوريس بوچكيننىڭ ەرلىكتەرى ەسكەرىلمەي قالعان. كەزىندە ول جونىندە بەلگىلى جۋرناليست قاينار ولجايدىڭ دا «تابىت – بىرەۋ, تاعدىر – ەكەۋ» ماقالاسىندا ءسوز بولعانىن وقي وتىرىپ, ءوز ۇلىمىزدىڭ, ءوز ەرلەرىمىزدىڭ ەرلىكتەرى قاشان لايىقتى باعاسىن الادى دەگەنگە ءبىز دە قوسىلامىز.
وسى ورايدا, شىنىندا دا اۋعان سوعىسىنداعى ەرلىكتەردى باعالاۋعا كەلگەندە, قازاقستاندىق بيلىكتىڭ نەگە مويىندارى جار بەرمەيتىنىن ءتۇسىنۋ قيىن. قانشاما جىل بويى جوعارىعا جازىپ ءجۇرىپ, اۋعان سوعىسىنا قاتىسقاندار «ارداگەرلەر تۋرالى» زاڭىنا سايكەس كەيبىر جەڭىلدىكتەرگە ەندى عانا ىلىكتى. اتى اڭىزعا اينالعان «قارا مايور» بوريس تۇكەن ۇلى كەرىمباەۆتىڭ ەرلىگى تۋرالى قانشا جازىلسا دا, «حالىق قاھارمانى» دەگەن اتاققا قول جەتكىزە الماي, دۇنيەدەن ءوتتى. وتە وكىنىشتى.
ەندى مىنە, تاعى ءبىر ەرىمىز, قازاقستاندىق جاۋىنگەر سەرىكباي تۇرلىباەۆتىڭ وشپەس ەرلىگى تۋرالى بايان قۋاندىققىزى بارلىق ايعاق دەرەكتەردى العا تارتىپ, «حالىق قاھارمانى» اتاعىنا لايىقتى ەكەندىگىن جەرىنە جەتكىزە جازعان ەكەن. ءيا, ۇلى دالا باتىرلارىنىڭ ەرلىك ءداستۇرى بۇگىنگى جاستار ءۇشىن دە, ەرتەڭگە بولاشاق ءۇشىن دە ماڭىزدى نارسە.
ەلىمىزدىڭ جاقىندا اتاپ وتەتىن تاۋەلسىزدىك مەرەكەسىنە وراي نەمەسە 2021 جىلدىڭ 15 اقپانىندا كەڭەس اسكەرلەرىنىڭ اۋعان ەلىنەن شىعارىلعانىنا 32 جىل تولۋى قارساڭىندا وتان الدىنداعى ءوز بورىشتارىن ادال اتقارعان, جاۋىنگەرلىك نامىستى جانكەشتىلىكپەن قورعاعان بوريس كەرىمباەۆ پەن سەرىكباي تۇرلىباەۆقا «حالىق قاھارمانى» اتاعى بەرىلىپ جاتسا, ەلدىكتىڭ, ەرلىك پەن باتىرلىقتىڭ ونەگەلى ءداستۇرى تولىعا تۇسەتىنى ءسوزسىز.
ەلى ءۇشىن وشپەس ەرلىكتىڭ اسقان ۇلگىسىن كورسەتكەن ەرلەرىمىز وسىلاي لايىقتى باعالارىن الىپ جاتسا, كەڭەس ەلىندە ەسكەرىلمەي قالعان ادىلەتسىزدىكتىڭ ورنى تولار ەدى, ساپەن اپاي سياقتى باتىر ۇل وسىرگەن انالار الدىنداعى پارىزىمىزدىڭ ءبىر وتەۋى قايتار ەدى.
سادۋاقاس جۇباتوۆ,
اسكەري جۋرناليست,
زاپاستاعى پولكوۆنيك
