جيىندا بايانداما جاساعان ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى قۇدايبەرگەن قورعانباەۆ 1 قاراشاداعى جاعداي بويىنشا باسپانا كەزەگىندە 28 766 ادام تۇرعانىن ايتتى. جىل باسىنان بەرى كەزەكتە تۇرعان 543 ازامات مەملەكەتتىك تۇرعىن ءۇي قورىنان پاتەر العان.
"كەزەكتە تۇرعاندار سانى جىل سايىن ارتىپ كەلە جاتقانىنا قاراماستان, اۋدانداردا قۇرىلىس قارقىنى تومەن كۇيىندە قالىپ وتىر. ماسەلەن, سوڭعى ءۇش جىلدا مەركى جانە مويىنقۇم اۋداندارىندا كەزەكتە تۇرعاندارعا بىردە-ءبىر پاتەر بەرىلمەگەن. بايزاق جانە جۋالى اۋداندارىندا تەك ەكى ۇيدەن, ت.رىسقۇلوۆ اۋدانىندا ءتورت ءۇي پايدالانۋعا بەرىلگەن", دەدى ق.قورعانباەۆ.
اۋدان اكىمدەرى ءتۇرلى سەبەپ ايتىپ, اقتالۋعا تىرىسقانىمەن, ايماق باسشىسى ەگەر ناتيجە بولماسا, ەشقانداي سىلتاۋ كومەكتەسپەيتىندىگىن باسا ايتتى.
"جامبىلدىقتاردىڭ تۇرعىن ءۇي جاعدايىن جاقسارتۋ ءبىر قۇرىلىمنىڭ عانا مىندەتىنە كىرمەيدى. بۇعان جەرگىلىكتى اكىمدىكتەر دە, ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى دا جاۋاپتى. بارلىعى اتسالىسۋى كەرەك. اۋدانداردا بوس ۇيلەر كوپ. باسقارما اكىمدىكتەرمەن بىرلەسىپ, ولاردى رەكونسترۋكتسيالاۋ ءۇشىن ينۆەستورلاردى تارتۋعا ءتيىس. ماسەلەنى شەشۋدىڭ ءتۇرلى جولدارىن ۇسىنىڭىزدار", دەدى بەردىبەك ساپارباەۆ.
ق.قورعانباەۆتىڭ ايتۋىنشا, جىل باسىنان بەرى "شاڭىراق" پيلوتتىق جوباسى بويىنشا تۇرعىن ءۇي ساتىپ الۋعا 68 تۇرعىن, «باقىتتى وتباسى» بويىنشا – 343 تۇرعىن, «7-20-25» بويىنشا - 175 تۇرعىن نەسيەگە قول جەتكىزگەن.
"كورسەتكىشتەر كوڭىل كونشىتپەيدى. "7-20-25" باعدارلاماسىن ىسكە اسىرۋ ناتيجەسى بويىنشا ءبىزدىڭ وبلىس سوڭعى ورىندا تۇر. بۇل ءبىرىنشى كەزەكتە تاراز قالاسى اكىمىنىڭ ولقىلىعىنان دەر ەدىم. ويتكەنى, كەزەكتە تۇرعانداردىڭ باسىم بولىگى وبلىس ورتالىعىنان تىركەلگەن. قالا اكىمى بۇل ماسەلەنى دەر كەزىندە شەشە المادى. اكىمدىكتەر بانكتەرمەن بىرلەسىپ تۇرعىن ءۇي باعدارلامالارىنىڭ بارلىق تەتىكتەرى مەن ارتىقشىلىقتارى تۋرالى جان-جاقتى ءتۇسىندىرۋى ءتيىس", دەپ تاپسىردى وبلىس اكىمى.
اپپاراتتىق كەڭەستىڭ كۇن تارتىبىندەگى ەكىنشى ماسەلە رەتىندە ينجەنەرلىك ينفراقۇرىلىممەن قامتاماسىز ەتۋ جانە جەكە تۇرعىن ءۇي قۇرىلىسى ءۇشىن جەر تەلىمدەرىن بەرۋ جايى قارالدى. اعىمداعى جىلدىڭ 1 قازانىنداعى جاعداي بويىنشا جەر تەلىمىن الۋ ءۇشىن 124 698 ادام كەزەكتە تۇر.
جەر قاتىناستارى باسقارماسىنىڭ باسشىسى باقتيار كوپبوسىنوۆ ولار بويىنشا قۇرىلعان بىرىڭعاي بازا تۋرالى حابارلادى "اۋدانداردا بىرنەشە جىل قاتارىنان جوبالىق-سمەتالىق قۇجاتتامالار ۋاقىتىلى ازىرلەنبەيدى. جەكە تۇرعىن ءۇي قۇرىلىسىن دامىتۋدىڭ 2022 جىلعا دەيىنگى كارتاسىنا سايكەس كەلەر جىلعا 76 ينفراقۇرىلىمدىق جوبا بويىنشا جۇمىس جۇرگىزۋ جوسپارلانعان بولاتىن, بىراق قازىرگى تاڭدا ونىڭ تەك 15-ءى عانا دايىندالعان. ءبىز مۇنداي قارقىنمەن بۇل ماسەلەنى جۋىق ارادا شەشە المايمىز. تۇرعىندار 2006-2007 جىلداردان بەرى ءالى كۇنگە دەيىن كەزەكتە تۇرعاندارىن ايتىپ, شاعىمدانۋدا. ولاردىڭ نارازىلىعى ورىندى. تۇرعىندار وزدەرى ءۇي سالعىسى كەلەدى, بىراق ءبىز ول ءۇشىن ءتىپتى جەر ءبولىپ بەرە الماي وتىرمىز. اكىمدەر بۇل ماسەلەگە نەمقۇرايلى قارايدى, ولارعا ءبارىبىر. ولاردان وسى ىسكە دەگەن تالپىنىس كورىنبەيدى. رەسپۋبليكالىق بيۋدجەتتەن از قارجى ءبولىنىپ جاتقان جوق. تەك ونى ۋاقىتىلى ءارى ساپالى يگەرۋ قاجەت. قۇرىلىس باسقارماسى بۇل جۇمىستاردى ۇيلەستىرە الماۋدا", دەدى وبلىس اكىمى. جەر تەلىمىنە كەزەكتە تۇرعانداردىڭ كوپشىلىگى (70 مىڭنان استام) تاراز قالاسىندا تىركەلگەن.
ول سونداي-اق بۇعان دەيىن تۇرعىن ءۇي سالۋ ءۇشىن ينۆەستورلاردى تارتۋ قاجەتتىلىگى تۋرالى بىرنەشە رەت ايتىلعانىن, ال ءتيىستى باقىلاۋدىڭ جوقتىعىنان پايدالانۋسىز جاتقان جەرلەردى قايتارۋ جۇمىستارىنىڭ السىزدىگىن ەسكە سالدى. بۇل ماسەلەنى جان-جاقتى تالداۋ وبلىس اكىمىنىڭ ورىنباسارلارى ۇلان جازىلبەك پەن بەرىك نىعماشەۆكە ارنايى تاپسىرىلدى.
"وكىنىشكە وراي, جۇمىستار ءالسىز جۇرگىزىلۋدە. 28 مىڭنان استام ادام باسپانا كەزەگىندە, 120 مىڭنان استام ادام جەر تەلىمى كەزەگىندە تۇر. وبلىس حالقىنىڭ جالپى سانىمەن ەسەپتەسەك, بۇل وتە كوپ. مەنىڭ اتىما كەزەكتە تۇرعانداردان شاعىمدار كۇن سايىن كەلىپ تۇسەدى. مەن ولاردى دا تۇسىنەمىن. اكىمدەر قۇجاتتارمەن ۇزاق ۋاقىت اينالىسىپ قانا قويماي, ينفراقۇرىلىمى بار دايىن ۋچاسكەلەردى دە تۇرعىندارعا ۇلەستىرىپ بەرۋدە سىلبىرلىق تانىتۋدا. ولار ىستەلمەگەن جۇمىس ءۇشىن سان ءتۇرلى سىلتاۋ ويلاپ تابادى. سىزدەردىڭ باستى مىندەتتەرىڭىز – حالىقتىڭ ءومىر سۇرۋىنە قولايلى جاعداي جاساۋ ەكەنىن ۇمىتپاڭىزدار", دەدى ايماق باسشىسى قالا جانە اۋدان اكىمدەرىنە ەسكەرتۋ جاساپ.
سونداي-اق, بەردىبەك ساپارباەۆ كەزەكتە تۇرعان ادامدار ءوز نومىرلەرىن جانە تۇرعىن ءۇي ماسەلەسىنە قاتىستى باسقا دا اقپاراتتاردان حاباردار بولا الۋى ءۇشىن ەلەكتروندى بازانىڭ جۇمىسىن جۇيەگە كەلتىرۋدى تاپسىردى. سونىمەن قاتار, ءتيىستى باقىلاۋدىڭ جوقتىعىنان, پايدالانۋسىز جاتقان جەرلەردى قايتارۋ جۇمىستارىنىڭ السىزدىگىن اتاپ وتكەن وبلىس اكىمى بۇل باعىتتاعى جۇمىستاردى جۇيەلەۋدى جۇكتەدى.
