2020 جىلدىڭ 9 ايىندا اۋداندا «اسىل تۇقىمدى مال شارۋاشىلىعىن دامىتۋدى, مال شارۋاشىلىعىنىڭ ونىمدىلىگى مەن ءونىم ساپاسىن ارتتىرۋدى سۋبسيديالاۋ» باعدارلاماسى بويىنشا 167 956 ملن تەڭگە سۋبسيديا بەرىلگەن. اتاپ ايقاندا, مال بورداقىلاۋ ءۇشىن – 25,9 ملن, ءسۇت ءوندىرۋ, ءىرى قارا مالدى سەلەكتسيالىق جانە اسىلداندىرۋ جۇمىستارىنا – 67,5 ملن, قۇس شارۋاشىلىعىنا – 23,7 ملن, بال ارا شارۋاشىلىعىنا – 44,7 ملن تەڭگە سۋبسيديا بەرىلدى.
قالا اكىمى م. ايتەنوۆ اۋداندا اۋىلشارۋاشىلىعى كلاستەرىن دامىتۋ, تۇرعىنداردى ءوز-ءوزىن جۇمىسپەن قامتۋ بويىنشا ناقتى تاپسىرمالار بەردى.
– اۋداندا ءىرى قارا مال, جىلقى سانى ارتىپ, ەت-ءسۇت ونىمدەرى كوبەيگەن. ءوز-ءوزىن جۇمىسپەن قامتۋدىڭ وسكەنىن كورىپ وتىرمىز. بۇگىن اۋداندى ارالاۋ بارىسىندا اسار - 1, اسار - 2 شاعىناۋداندارىندا جىلىجاي سالىپ, ءوز-ءوزىن جۇمىسپەن قامتىعان قالا تۇرعىندارىنىڭ كاسىبىن ارالاپ كوردىك. بۇنى ءارى قاراي دامىتۋ قاجەت. اۋدان اكىمدەرىنىڭ الدىندا تۇرعان ءبىرىنشى باستى ماقسات – ازاماتتاردى جۇمىسپەن قامتۋ. قالادا اۋىلشارۋاشىلىعى سالاسىنا ماماندانعان شاعىناۋدانداردى كوبەيتىپ, جۇمىسسىزدىق ماسەلەسىن شەشۋگە بولادى. بىزدە مال شارۋاشىلىعىن كلاستەر رەتىندە دامىتۋعا بارلىق مۇمكىندىك بار. ينفراقۇرىلىمى بار شالعايداعى ەلدىمەكەندەردە تۇرعىنداردى مال شارۋاشىلىعى كاسىبىنە ۇيرەتەتىن سەمينار-ترەنينگ وتكىزۋدى قولعا الايىق. اۋدان اكىمدەرىنە, اۋىل شارۋاشىلىعى جانە ۆەتەريناريا, كاسىپكەرلىك جانە يندۋستريالدى-يننوۆاتسيالىق دامۋ باسقارماسى باسشىلارىنا وسىنى جۇزەگە اسىرۋدى تاپسىرامىن. قالانى وتاندىق مال ەتىمەن, قۇس ەتىمەن قامتاماسىز ەتۋ كەرەك. ءارى ەكسپورت الەۋەتىن دامىتۋعا مۇمكىندىك بار, دەدى مۇرات دۇيسەنبەك ۇلى.
