عازيز بايتاسوۆ سول كۇنى ارنايى كولىكپەن كەزەكشىلىكتە جۇرگەن بولاتىن. قازىبەك بي كوشەسىندەگى ورتالىق گاسترونومنىڭ جانىنا قىلمىسكەر توقتاي قالىپ, قورشاعانداردىڭ بارىنە وق جاۋدىرا باستادى. كولىكتى توقتاتقان عازيز, ودان شىعا سالا قارسى وق اتىپ, قىلمىسكەردى كەرى شەگىندىرەدى. ءدجيپتىڭ ارتىنا جاسىرىنىپ, كولىكتەردى بوگەت رەتىندە پايدالانا وتىرىپ, قاسكۇنەم كەنەتتەن عازيزدىڭ كەۋدەسىنەن وق اتتتى – قۇقىق قورعاۋشى دا قاراپ قالمادى.
ول قىلمىسكەردىڭ قولىندا گراناتا بارىن ءبىلدى, بەيبىت حالىققا قاۋىپ-قاتەردىڭ تونگەنىن انىق سەزىندى. ول كەزدە سەكۋندتاردىڭ ءوزى التىنعا بەرگىسىز ءسات بولدى. اۋىر جارالانعانىنا قاراماستان, پوليتسيا كاپيتانى تەرروريستپەن بەتپە-بەت كەلىپ, قىلمىسكەردىڭ قولىنداعى گراناتانى حالىققا قاراي لاقتىرۋعا جول بەرمەي, ءوز دەنەسىمەن جاۋىپ قالدى. وسى كەزدە قىلمىسكەردىڭ قولىنداعى گراناتا جارىلدى.
بار بولعانى بىرنەشە ساعاتتىڭ ىشىندە قالانى اياعىنان تىك تۇرعىزعان قاندىقول قاراقشىنى جول پوليتسياسىنىڭ قىزمەتكەرى ءوز ءومىرىنىڭ قۇنىمەن توقتاتتى. ەل ءۇشىن مەرت بولعان ازاماتقا «حالىق قاھارمانى» اتاعى بەرىلدى. ورىن العان وقيعاعا توعىز جىل تولىپ وتىرسا دا, وتە جاۋاپتى ءارى قيىن ساتتە ءوز ىسىنە ادال بولعان, ونىڭ ەرلىگى ەشقاشان ۇمىتىلماق ەمەس.
ماڭعىستاۋ وبلىسى بويىنشا قاج دەپارتامەنتىنىڭ جەكە قۇرامى حالىق قاھارمانىن ءبىر مينۋت ۇنسىزدىكپەن ەسكە الدى. دەپارتامەنت باستىعى ادىلەت پولكوۆنيگى جاستالاپ باساروۆ «حالىق قاھارمانى» عازيز ابدىبەك ۇلى بايتاسوۆتىڭ ەرلىگى تۋرالى جەكە قۇرامعا بايانداپ, ەلىنە, قىزمەتىنە ادال بولعان ازاماتتىڭ ومىرلىك تاريحىمەن تانىستىردى. ەلىنىڭ ناعىز پاتريوتى بولىپ, قىزمەتىن ادال اتقارعان ادام ەشقاشان ۇمىتىمايتىنىن ەرەكشە اتاپ ءوتتى.
ماڭعىستاۋ وبلىسى
