فيزيكا زاڭدارىنا سەنسەك, قارا قۇردىمنىڭ جويقىن اسەرىنەن ەشقانداي ماتەريا قۇتىلا المايدى ەكەن. قارا قۇردىم دەپ اتالاتىنى دا سول, كەڭىستىكتەگى بۇكىل جارىقتى سورىپ الاتىن الىپ ۇڭگىردىڭ ءتۇسى قاپ-قارا, شەت-شەگى كورىنبەيتىن تىم وراسان قۇبىلىس.
جالپى, الەم تاريحىندا بۇل تاقىرىپقا سوقپاعان سانا يەسى بولماعانىن ايتتىق. قارا قۇردىم تۋرالى كوبىنە فانتازيالىق ادەبيەتتە, كينودا ءجيى قاۋزالاتىنىن دا اتاپ كەتتىك. بۇگىن ءبىز سول قارا قۇردىم اينالاسىنداعى كوپ تۋىندىلاردىڭ ىشىنەن ەڭ ءبىر قىسقا وقيعا تۋرالى بايانداعىمىز كەلەدى. اعىلشىن رەجيسسەرى فيليپ سەنسوم مەن ستسەناريست وللي ۋيليامستىڭ «قارا قۇردىم» دەگەن قىسقامەترلى ءفيلمى ادام ساناسىن كەنەت بۇرىلعان كولىكتەي اۋدارىپ جىبەرەتىن ەرەكشە كارتينا رەتىندە الەمدەگى ەڭ ءبىر ەرەكشە سيۋجەتتەردىڭ قاتارىندا دەسەك قاتەلەسپەيمىز.
اسقىنعان ساراڭدىق ادامدى جاقسىلىققا اپارمايدى. ارينە, اڭگىمە جەتى اتاسىنان بەرى جىلىك مايى ۇزىلمەگەن بايدىڭ ساراڭدىعى بولسا تۇسىنىكتى بولار ەدى. قىزىق بولعاندا, بۇل ءسىڭىرى شىققان كەدەي, ومىردە ەشقاشان جولى بولماعان قاراپايىم جۇمىسكەردىڭ اشكوز ساراڭدىعى. ۇزاقتىعى بار-جوعى ءۇش مينۋتتان اسپايتىن قىسقامەترلى بۇل فيلم ساراڭ ادامنىڭ سۇيكىمسىز مىنەزى ءتۇپتىڭ-تۇبىندە ءوزىن ءوزى جۇتىپ تىنادى دەگەندى ايتقىسى كەلەدى.
ۇلكەن يدەيانى جۇك ەتكەن كىشكەنتاي عانا سيۋجەتتى تولىق بايانداي كەتسەك, شارشاپ, جۇمىسىندا كەشكە دەيىن كىدىرگەن كەڭسە قىزمەتكەرى ءبىر كۇنى قىزىق جايتقا تاپ بولادى. ءتۇرى ابدەن قالجىراعان, كۇنى بويى كەڭسەنىڭ ەشقاشان بىتپەيتىن قاعاز جۇمىسىنان قاجىعان قىزمەتكەر ءتۇننىڭ ءبىر ۋاعىندا جالعىز ءوزى قاعاز كوشىرمەسىن جاسايتىن قۇرىلعىمەن جۇمىس ىستەپ تۇرادى. قىرسىققاندا قىمىران ءىريدى دەگەندەي, قۇرىلعى دا بىرەر ساتكە ىستەن شىعادى. ءوزى شارشاپ, تيتىقتاپ تۇرعان الگى بەيشارا ۇلكەن قۇرىلعىنى ىزالانىپ تەۋىپ-تەۋىپ جىبەرەدى. سول-اق ەكەن, جارىعى ءوشىپ-جانعان قۇرىلعى قايتا قوسىلادى دا قىزمەتكەرگە كەرەك قاعازدى ەمەس, ورتاسىندا ۇلكەن قارا دوڭگەلەك سۋرەتى بار ەرەكشە قاعازدى باسىپ شىعارادى. قىزمەتكەر العاشىندا الگى ا2 فورماتىمەن باسىلىپ شىققان قارا دومالاق سۋرەتكە ءمان بەرمەي, جانىنداعى ۇستەلدىڭ ۇستىنە تاستاي سالادى. الايدا قىزىقتىڭ ءبارى سول سيقىرلى قارا دومالاق سۋرەتتە بولىپ شىعادى. باستى كەيىپكەر سالدەن كەيىن قولىنداعى سۋ ىشكەن كەسەسىن الگى قارا دومالاق سۋرەتتىڭ ۇستىنە قويا سالعانى سول ەدى, كەسە سۋرەتتىڭ ىشىنە ءتۇسىپ جوق بولىپ كەتەدى. ءوز كوزىنە ءوزى سەنبەگەن جىگىت قولىن اپارىپ ەدى, قولى قاعازدىڭ ىشىنە وپ-وڭاي كىرىپ كەتتى دە كەسەسىن الىپ شىقتى.
مىنە, عاجاپ. قالجىراعان قىزمەتكەرگە ەندى قانات ءبىتىپ, كوزى شىراداي جانعان بەيشارا الگى قاعازدى الا سالىپ دالىزدە تۇرعان ساۋدا دۇڭگىرشەگىنە قاراي جونەلدى. سيقىرلى قاعازىن جاپسىرىپ, يەسى جوق دۇڭگىرشەكتىڭ ىشىنەن ءتاتتى شوكولادتى وپ-وڭاي الىپ شىعادى. ياعني بۇل قارا قۇردىم قاعازدى كەز كەلگەن جەرگە جاپسىرىپ, ار جاعىنداعى زاتتى الۋعا ابدەن بولادى دەگەن ءسوز.
قىزمەتكەردىڭ كوزى ەندى باسشىسىنىڭ بولمەسىندەگى ەسىككە تۇسەدى. جۇگىرىپ بارىپ سيقىرلى قاعازىن جاپسىرا قويىپ ەسىكتى ىشىنەن اشىپ الادى دا بولمەنىڭ تورىندە تۇرعان تەمىر سەيفكە قاراي بەتتەيدى. بارا سالىپ, «قاراقشى قاعازىن» سەيفتىڭ ەسىگىنە جەلىمدەر-جەلىمدەمەستەن ىشىندەگى قاپ-قاپ اقشانى الىپ شىعا باستايدى. تاۋ بولىپ ۇيىلگەن اقشا بىتەر ەمەس, ءالى دە قالعان سياقتى, قولى جەتكەن جەردىڭ بارىندەگى بايلىقتى تۇگەل سىرتقا شىعارادى. اشكوزدىگى تويات تاپپاي, ەندى الگى قارا دوڭگەلەك سۋرەتتىڭ ىشىنە باسىن كىرگىزىپ الىپ اقشانى ءارى قاراي توناي باستايدى. الايدا سەيفتىڭ تۇبىنە قاراي تاعى ۇمتىلا بەرگەندە جارتىلاي جەلىمدەلگەن قاعاز سىرتقا سىپىرىلىپ تۇسەدى دە, اشكوزدىكتىڭ ارانىنا بەيشارا قىزمەتكەر ماڭگى جۇتىلىپ كەتە بارادى. سوڭعى كادرلاردا قاڭىراعان كەڭسە تورىندە تۇرعان سەيف, ونىڭ ماڭىندا ۇيىلگەن اقشا, جەرگە سىپىرىلىپ تۇسكەن ا2 پاراعى جاتادى.
شىن مانىندە, ول قىزمەتكەر قازىنا تولى قامباعا ەمەس, ءوزىنىڭ اشكوزدىگىنە جۇتىلىپ كەتكەن ەدى.
مىنە, وسىنداي تاماشا يدەيانى وزىنە وزەك ەتكەن ومىرشەڭ كارتينا ءبىزدى بىردەن وي تۇڭعيىعىنا وسىلاي تارتىپ اكەتتى جانە ۇلتتىڭ اقادال قازىناسىنا ۇرى قولدارىن اياماي سۇققان نەبىر اشكوز, جەمقور تيپتەردى كوز الدىمىزعا اكەلدى.
