بۇل تۋرالى شىعىس قازاقستان وبلىسى بويىنشا ءبىلىم بەرۋ سالاسىندا ساپانى قامتاماسىز ەتۋ دەپارتامەنتىنىڭ باسشىسى زەينەپ ماقسۇتوۆا حابارلاعان. اتالعان دەپارتامەنت جىل باسىنان بەرى جالپى ءبىلىم بەرەتىن مەكتەپتەرگە پروفيلاكتيكالىق باقىلاۋ جۇرگىزىپ, ءبىلىم بەرۋ ۇيىمدارىن جوسپاردان تىس تەكسەرگەن. دەپارتامەنت ماماندارى ءبىلىم بەرۋ قىزمەتىنە ليتسەنزيا بەرۋ جانە ءبىلىم تۋرالى قۇجاتتارعا اپوستيل قويۋ بويىنشا مەملەكەتتىك قىزمەتتەر كورسەتەدى.
قازىرگى ۋاقىتتا شىعىس قازاقستان وبلىسىنىڭ 19 كوللەدجى كەيبىر ماماندىقتار بويىنشا ليتسەنزياعا قوسىمشانى ءوز ەرىكتەرىمەن قايتارىپ بەرگەن. ونىڭ 10-ى – مەملەكەتتىك, قالعان 9-ى – جەكەمەنشىك وقۋ ورىندارى. اتاپ ايتساق, فەرمەر شارۋاشىلىعى, ەسەپتەۋ تەحنيكاسى, باعدارلامالىق قامتاماسىز ەتۋ, ىشكى سانيتارلىق قۇرىلعىلاردى, جەلدەتكىشتەردى جانە ينجەنەرلىك جۇيەلەردى مونتاجداۋ, مەتاللۋرگياداعى ماشينالار مەن جابدىقتار, مەحانيكالىق وڭدەۋ, توكارلىق پەن مەتالل وڭدەۋ, ساندىك قولدانبالى ونەر, ءىس قاعازدارىن جۇرگىزۋ جانە مۇراعاتتاۋ سىندى ماماندىقتاردىڭ ليتسەنزيالارى قايتارىلعان. بۇل ماماندىقتاردىڭ كەيبىرەۋى تسيفرلانعان قوعامدا اسا قاجەت بولماعانىمەن, توكارلاردىڭ تاپشى ەكەنى ءسوزسىز.
– باس تارتۋ سەبەپتەرى نەگىزىنەن مەملەكەتتىك باج سالىعىنىڭ دۇرىس تولەنبەۋىمەن جانە تاڭدالعان ەلدەردىڭ گااگا كونۆەنتسياسىنا كىرمەۋىمەن بايلانىستى, – دەيدى ءبىلىم بەرۋ سالاسىندا ساپانى قامتاماسىز ەتۋ دەپارتامەنتىنىڭ باسشىسى.
ءبىلىم تۋرالى قۇجاتتارعا اپوستيل قويۋ قىزمەتى بويىنشا بيىل قاڭتار-قازان ايلارىندا 561 ءوتىنىش كەلىپ تۇسكەن ەكەن. دەپارتامەنت باسشىسىنىڭ ايتۋىنشا, بارلىعى 497 قۇجاتقا اپوستيل قويىلدى. ونىڭ ىشىندە 394-ءى – جوعارى ءبىلىم تۋرالى, 94-ءى – كاسىپتىك-تەحنيكالىق ءبىلىم تۋرالى جانە 94-ءى – جالپى ورتا ءبىلىم تۋرالى قۇجات. ال 64 قۇجات بەلگىلى سەبەپتەرگە بايلانىستى قابىلدانباعان.
– بيىل ءبىزدىڭ دەپارتامەنتكە ليتسەنزيالاۋ ماسەلەلەرى بويىنشا 114 ءوتىنىش كەلىپ ءتۇستى. ونىڭ ىشىندە 62 ءوتىنىش قاناعاتتاندىرىلدى, 46 ءوتىنىش قايتارىلدى, ال 6 ءوتىنىش قارالۋدا, – دەدى زەينەپ ماحسۋتوۆا.
شىعىس قازاقستان وبلىسى بويىنشا ءبىلىم بەرۋ سالاسىندا ساپانى قامتاماسىز ەتۋ دەپارتامەنتىنىڭ بيىلعى باستى مىندەتتەرىنىڭ ءبىرى كوللەدجدەر مەن جوعارى وقۋ ورىندارىنىڭ ستۋدەنتتەرى ءۇشىن قاشىقتان ءبىلىم بەرۋ تەحنولوگيالارىنا قولجەتىمدىلىكتىڭ بولۋىنا مونيتورينگ جۇرگىزۋ ەدى. ەلدەگى ىندەتكە بايلانىستى 14 ناۋرىزدان باستاپ دەپارتامەنت وقۋ ورىندارىنىڭ قاشىقتان وقىتۋىن ۇنەمى قاداعالاۋلارىندا ۇستاپ وتىردى.
– مونيتورينگ 71 كوللەدج جانە 7 جوعارى وقۋ ورنىن قامتىدى. اتقارىلعان جۇمىستاردىڭ قورىتىندىسى بويىنشا ستۋدەنتتەردىڭ باسىم بولىگى قاشىقتان ءبىلىم بەرۋ تەحنالوگياسىنا قول جەتكىزە الاتىنى انىقتالدى. بىراق كەيبىر كوللەدجدەردە ينتەرنەت جىلدامدىعىنىڭ تومەندىگى انىقتالدى. بىراق وسى ماسەلەلەردىڭ بارلىعى شەشىلدى. كوللەدجدەرگە جۇمىستى جاقسارتۋ بويىنشا ۇسىنىستار ۋاقتىلى جىبەرىلىپ, قاجەتتى كومەك كورسەتىلەدى, – دەپ قوستى ز.ماحسۋتوۆا.
الايدا «شىعىس قازاقستان تەحنيكالىق-ەكونوميكالىق كوللەدجى» جانە «سەمەي قالاسىنىڭ ەۋرازيالىق كوپسالالى كوللەدجى» جشس-دە قاشىقتان وقىتۋ پلاتفورماسى جوق بولعاندىقتان, وقىتۋ «WhatsApp» جەلىسى ارقىلى جۇرگىزىلگەن ەكەن.
مونيتورينگ مەكتەپتەردى كۇردەلى جوندەۋ, وقۋلىقتاردى جەتكىزۋ, مەكتەپ دارەتحانالارىن پايدالانۋعا بەرۋ, بەينەباقىلاۋمەن جابدىقتاۋ جۇمىستارىنا دا جۇرگىزىلدى. انىقتالعانداي, 304 ورتا ءبىلىم بەرۋ ۇيىمدارىندا دارەتحانالار ورناتىلعان, 40 مەكتەپتە كۇردەلى جوندەۋ جۇرگىزىلدى, بارلىق وقۋشى جاڭا مازمۇنداعى وقۋلىقتارمەن جانە ادىستەمەلىك كەشەندەرمەن تولىق قامتاماسىز ەتىلگەن.
سونىمەن قاتار دەپارتامەنتتىڭ قىزمەتكەرلەرى ۇبت جانە وبلىستاعى پەداگوگتەردىڭ ۇلتتىق بىلىكتىلىك تەستىلەۋىن وتكىزۋ كەزىندە باقىلاۋشى رەتىندە دە تارتىلعان. تەستىلەۋ كەزىندە ستۋدەنتتەر مەن وقىتۋشىلار تاراپىنان ەرەجە بۇزۋشىلىق فاكتىلەرى تىركەلدى. ۇيالى تەلەفونداردى پايدالانعان 21 تۇلەك تەستىلەۋگە جىبەرىلمەدى. تىيىم سالىنعان زاتتاردى الىپ كىرۋگە بايلانىستى 47 تەست ناتيجەسىنىڭ كۇشى جويىلدى. پەداگوگتەر تاراپىنان ۇيالى تەلەفونداردى پايدالانۋدىڭ 26, شپارگالكالاردى پايدالانۋدىڭ 31 جاعدايى جانە تەست سۇراقتارىن الىپ شىعۋدىڭ 4 فاكتىسى تىركەلدى. ناتيجەسىندە, تەست تاپسىرعانداردىڭ قورىتىندىلارى جوققا شىعارىلعان. بۇدان باسقا 24 پەداگوگ تارتىپتىك جاۋاپكەرشىلىككە تارتىلىپتى.
شىعىس قازاقستان وبلىسى
