قارابالىق كەنتىندەگى مادەنيەت سارايى كورەرمەندەرگە لىق تولدى. ەلدىڭ اۋزىنان تۇسپەيتىن «جۇلدىزدار» ونەرىن تاماشالايتىنداي, كونتسەرتكە ۇلكەن-كىشى قالماي كەلىپتى. بۇل اۋدان ورتالىعىنداعى كوركەم ايتباەۆا باسقاراتىن №1 ورتا مەكتەپتىڭ پەداگوگيكالىق ۇجىمى, وقۋشىلار جانە اتا-انالار بىرلەسىپ قوياتىن قايىرىمدىلىق كونتسەرتى بولاتىن.
قارابالىق كەنتىندەگى مادەنيەت سارايى كورەرمەندەرگە لىق تولدى. ەلدىڭ اۋزىنان تۇسپەيتىن «جۇلدىزدار» ونەرىن تاماشالايتىنداي, كونتسەرتكە ۇلكەن-كىشى قالماي كەلىپتى. بۇل اۋدان ورتالىعىنداعى كوركەم ايتباەۆا باسقاراتىن №1 ورتا مەكتەپتىڭ پەداگوگيكالىق ۇجىمى, وقۋشىلار جانە اتا-انالار بىرلەسىپ قوياتىن قايىرىمدىلىق كونتسەرتى بولاتىن.
700 بيلەت ساتىلعان, ونىڭ سىرتىندا مادەنيەت سارايىنىڭ كىرە بەرىسىنە قويىلعان قايىرىمدىلىق جاشىگىنە جۇرتشىلىق قولدا بارىن تاستاپ جاتىر. ەڭ باستىسى, قايىرىمدىلىق شاراسى دەسە, اۋدان ورتالىعىنان باستاپ, الىس, شالعايداعى اۋىلدار تۇرعىندارىنا دەيىن تيىن-تەبەنىن ايامايدى. وسىنىڭ بارلىعى دا اۋدان كولەمىندەگى تۋماي جاتىپ, تاعدىر تالكەگىن كورگەن, اۋرۋدىڭ ازابىن شەككەن ءبۇلدىرشىن بالالار ءۇشىن ەدى. ءبىر كونتسەرتتىڭ وزىنەن قورعا 150 مىڭ تەڭگە ءتۇستى.
وسىدان ءتورت جىل بۇرىن اۋداندىق «اينا» گازەتىنىڭ رەداكتورى, وبلىسقا بەلگىلى جۋرناليست, قازاقستاننىڭ قۇرمەتتى ءجۋرناليسى ماريا ساپاروۆا «مەيىرىمدىلىك پەن ءۇمىت» قايىرىمدىلىق قورىن قۇرعان بولاتىن. سان ۇلتتىڭ وكىلىنەن تۇراتىن اۋدان تۇرعىندارى قوردى بىردەن قولدادى. گازەت بەتىندە ۇنقوسۋلار كوبەيدى.
– اۋداندا ناۋقاسى اۋىر, مۇگەدەك 68 بالا بار. ولاردىڭ تاعدىرى تەك اتا-اناسىنىڭ عانا ەمەس, بۇكىل اۋدان تۇرعىندارىنىڭ جۇرەگىن اۋىرتاتىنىنا ىلعي كوزىم جەتىپ كەلەدى. ءبىز اۋرۋ بالا تۋرالى ماقالا جاريالاعان كۇننەن باستاپ كومەگىن ۇسىنعان حاتتار كوبەيدى, تەلەفون شالىپ حابارلاساتىندار قانشاما! وسىنداي قايىرىمدىلىق ىستە ادامداردىڭ ەشقانداي ۇلتقا, ۇلىسقا بولىنبەيتىنىنە مەن ىشتەي شۇكىرشىلىك ەتەمىن. توننىڭ ىشكى باۋىنداي ادامدار بۇرىنعىدان دا دوستاسىپ, جۇدىرىقتاي بىرىگىپ كەتكەندەي بولادى, – دەيدى ماريا ابۋتالىپقىزى.
ءتورت جىلدىڭ ىشىندە قور بىرنەشە بالانىڭ استاناعا, رەسەيگە بارىپ, ەم الىپ كەلۋىنە كومەكتەستى. ون ەكى جاسار اقجان نۇريەۆانىڭ جۇرەگى ىشتەن اقاۋ بولىپ تۋعان. وعان ءبىر ەمەس, بىرنەشە رەت وپەراتسيا جاسالۋى كەرەك. استانا قالاسىنداعى انا مەن بالا ۇلتتىق عىلىمي ورتالىعىندا وعان العاشقى وپەراتسيا جاسالعاندا, قارابالىقتىقتار 120 مىڭ تەڭگە جيناپ بەردى.
– ءار بالانىڭ اۋىر ءحالىن ەستىگەندە كەيدە تۇنگى ۇيقىم بۇزىلادى. ءبارىمىز دە بالانىڭ, نەمەرەنىڭ بەتىنە قاراپ وتىرمىز. اقجاننىڭ جۇرەگىنە وپەراتسيا جاساۋعا استاناعا باراتىن كەزدە نەمەرەمدى ەرتىپ الىپ, قورعا 1 مىڭ تەڭگە اكەلىپ تاپسىردىم. اڭگىمە بەرگەن اقشاڭنىڭ از-كوپتىگىندە دە ەمەس شىعار, بالا ءتاۋىر بولىپ كەلسىن دەگەن تىلەكتەستىگىمدى ءبىلدىرىپ, ىرىمداپ اكەلىپ بەردىم, – دەيدى قارابالىق كەنتىنىڭ تۇرعىنى يۋليا فومەنكو. ءبىر يۋليا ياروسلاۆوۆنا ەمەس, اۋدانداعى ءار وتباسى, ءار ادام اۋرۋ بالالار ەمدەلۋگە اتتانعان سايىن, از-كوپتىگىنە قاراماي, قولعا تۇسكەندەرىن وزدەرى وسىلاي اكەلىپ بەرىپ جاتادى.
جۇرەك اقاۋىنان زارداپ شەگەتىن 8 جاسار ناستيا سپەناكيدى كارديولوگيالىق كلينيكاعا جىبەرۋ ءۇشىن ول تۇراتىن شاعىن سۆياتوسلاۆ اۋىلىنىڭ تۇرعىندارى, «قارابالىق» عىلىمي-تاجىريبە شارۋاشىلىعىنىڭ جۇمىسشىلارى 80 مىڭ تەڭگە جيناپ بەردى. التى جاسار جەنيا تسىگانوۆتىڭ تاعدىرىنا جازعان مۋكوۆيستسيدوز اۋرۋى, دارىگەرلەردىڭ ايتۋىنشا, وتە سيرەك كەزدەسەدى ەكەن. بالا ونىڭ اۋىر تۇرىنەن زارداپ شەگەدى. استاناداعى انا مەن بالا ۇلتتىق عىلىمي ورتالىعىنا بارىپ ەم الۋى ءۇشىن وعان قوردان 100 مىڭ تەڭگە كومەك بەرىلدى. ال 11 جاسار ناستيا اندريانەتستىڭ اۋرۋى جۇرەك اقاۋىنىڭ ءبىر ءتۇرى – تەترا-فاللو دەپ اتالادى, ياعني جۇرەگى وڭ جاعىنا ورنالاسقان. ونىڭ ۇستىنە قىز بالانى تەك جالعىز اجەسى عانا تاربيەلەيدى. اۋداننىڭ ءبىر تۇكپىرىندەگى ستانتسيوننىي اۋىلىندا تۇرادى. جاقىندا ول دا جۇرەگىنە وپەراتسيا جاساتۋ ءۇشىن استانا قالاسىنا جۇرگەلى وتىر. ناستياعا ارناپ اۋىلداستارىنىڭ, سول جەردەگى شارۋاشىلىق ۇجىمىنىڭ, قاراپايىم ادامداردىڭ تيىنداپ جيناعان قارجىسى 150 مىڭ تەڭگە بولدى.
– سايبولات نۇكەەۆ دەگەن كىسى ناستياعا ارناپ 10 مىڭ تەڭگە اكەلىپ بەردى. «مىنا بالانىڭ جاعدايىن ەستىگەن سوڭ قاراپ وتىرا المادىم. ءبىر كەمپىرگە اۋرۋ بالانى باعۋ قالاي قيىن دەسەڭشى. امان-ەسەن ءتاۋىر بولىپ كەلىپ, اجەسىن قۋانتسىن», دەگەن تىلەگىن دە ايتىپ كەتتى, – دەيدى قور ءتورايىمى ماريا ابۋتالىپقىزى. قايىرىمدىلىق اكتسيالارىنان اۋدانداعى مايل تورويان, امانجول ەلۋباەۆ, ولگا كەللەر, پاۆەل چالىح, ۆلاديمير پۋگاچەۆ سەكىلدى بەلگىلى كاسىپكەرلەر, شارۋاشىلىق باسشىلارى دا قالىسپايدى. جاڭا جىل مەن بالالار كۇنى مەرەكەسىندە «مەيىرىمدىلىك پەن ءۇمىت ساۋلەسى» قايىرىمدىلىق قورى اۋدانداعى مۇگەدەك بالالارعا سىيلىقتار تاراتادى. سونداي كەزدەردە اۋدان تۇرعىندارى اقشاسىن اقشالاي, ءتاتتىسىن, كيىم-كەشەگىن ءۇيىپ تاستايدى.
اۋرۋدىڭ شەڭگەلىندەگى ءار بالا – قارابالىقتىقتاردىڭ ورتاق مۇڭى, ولار وپەراتسيادان امان قالىپ, ءتاۋىر بولىپ كەلسە, ورتاق قۋانىشى. قازىر قارابالىقتاعى ءار كىسىدەن وسى اۋدانداعى اۋرۋ بالانى سۇراساڭ, اتىن ايتىپ بەرۋگە دايار. ويتكەنى, ولاردىڭ بارلىعى دا وسى بالالاردىڭ ەمدەلۋى ءۇشىن وتەتىن قايىرىمدىلىق اكتسياسىن قۇر جىبەرمەي قاتىسقان بولاتىن. بىرلىك بار جەردە – قايىرىمدىلىق بار. دوستىق مەيىرىم مەن ادامگەرشىلىك بار جەردە سالتانات قۇرادى. بۇل – قارابالىقتىقتار ءۇشىن دالەلدەۋدى, ارتىق ايتۋدى قاجەت ەتپەيتىن تۇسىنىك, كۇندەگى قالىپتاسقان تىرشىلىك.
ءنازيرا جارىمبەتوۆا,
«ەگەمەن قازاقستان».
قوستاناي وبلىسى,
قارابالىق اۋدانى.
