تۇڭعىش پرەزيدەنت كۇنىنە ورايلاستىرىلعان ءىس-شاراعا قازاقستان رەپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى, ساياسي عىلىمداردىڭ دوكتورى, پروفەسسور ءامىرحان راحىمجانوۆ, ءال-فارابي اتىنداعى قازۇۋ رەكتورى, اكادەميك عالىمقايىر مۇتانوۆ, ۋنيۆەرسيتەت عالىمدارى, باق جانە قوعام وكىلدەرى قاتىستى. ولار بۇۇ-نىڭ تۇراقتى دامۋ بويىنشا "اكادەميالىق ىقپال" باعدارلاماسىن جۇزەگە اسىراتىن جاھاندىق حابتىڭ جۇمىسىمەن تانىستى.
بۇل حابقا ءال-فارابي اتىنداعى قازۇۋ-دىڭ "ماڭگىلىك ەل" تاريحي-كوركەم كەشەنى جەتەكشىلىك ەتەدى. كەشەنگە ءال-فارابي مۋزەيى, "الاش", "اباي", قازاقستان رەپۋبليكاسىنىڭ تۇڭعىش پرەزيدەنتى – ەلباسى زالدارى, " ۇلى دالانىڭ جەتى قىرى", "ماڭگىلىك ەل" ەكسپوزيتسيالارى كىرەدى. مەيماندار جوعارعى وقۋ ورنىنىڭ عىلىمي كىتاپحاناسىمەن تانىسىپ, XVII عاسىردىڭ سيرەك كەزدەسەتىن باسىلىمدارى مەن بىرەگەي اراب, شاعاتاي قوجازبالارىن تاماشالادى.
ءامىرحان راحىمجانوۆ 300-دەن استام الەمنىڭ ءىرى جوعارعى وقۋ ورىندارىمەن سەرىكتەس بولىپ كەلەتىن, مەملەكەتتىڭ مىقتى كادرلارىن دايىندايتىن ۇستاحانا رەتىندە ءال-فارابي اتىنداعى قازۇۋ-ءدىڭ ءرولىن اتاپ ءوتتى.
"2009 جىلعى 13 قازاندا ن.ءا. نازارباەۆ "قازاقستان داعدارىستان كەيىنگى كەزەڭدە: بولاشاققا قاراي ينتەللەكتۋالدى سەرپىن" ءدارىسىن قازۇۋ-دا وقىعان بولاتىن. بۇل ءدارىس تاياۋدا جارىق كورگەن "قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ الەمنىڭ جەتەكشى ۋنيۆەرسيتەتتەرىندە وقىعان دارىستەرى" كىتابىنا ەنگەن. تۇساۋى كەسىلگەن زال – تاۋەلسىز مەملەكەتتىڭ قۇرىلۋى مەن نىعايۋى تاريحىنان سىر شەرتەتىن ماتەريالداردى توعىستىرعان اعارتۋ ورتالىعى. ەلباسى مۇراسى – ەل كەلەشەگىنىڭ ىرگەتاسى. بۇل زالعا كەلگەن جوعارعى وقۋ ورنىنىڭ كەز كەلگەن ستۋدەنتى مەن قوناعى دامۋعا قاجەتتى سەرپىندى الا الادى", دەدى ءا.راحىمجانوۆ.
ءىس-شارا بارىسىندا ەلباسى كىتاپحاناسى ۋنيۆەرسيتەتكە مەكەمەنىڭ اۆتورلىق 100 كىتابىن سىيعا تارتتى. بۇل باسىلىمداردى دايىنداعان جۇمىس توبىنا ەلباسى كەڭسەسىنىڭ باسشىسى, ساياسي عىلىمداردىڭ دوكتورى, پروفەسسور م.ب.قاسىمبەكوۆ جەتەكشىلىك ەتكەن.
ءال-فارابي اتىنداعى قازۇۋ رەكتورى عالىمقايىر مۇتانوۆ ەلباسى كىتاپحاناسىنىڭ كوپ جىلدىق سەرىكتەستىگىنە ريزاشىلىعىن ءبىلدىرىپ, قازاقستان رەپۋبليكاسى تۇڭعىش پرەزيدەنتى زالىن قۇرۋدا قولداۋ تانىتقانىنا العىسىن ايتتى.
"بۇل زالدىڭ قۇندىلىعى – ماڭىزدى اقپاراتتىڭ ماگيسترانتتارىمىز بەز دوكتورانتتارىمىزعا قول جەتىمدى ەتە تۇسۋىندە. بۇل جەردە ەلىمىزدىڭ جەتەكشى عالىمدارى باستاعان كونفەرەنتسيالار مەن فورۋمدار وتەتىن بولادى. زال ماتەريالدارى ءالى دە تولىعا بەرمەك. بۇل ءىستىڭ شىمىلدىعىن اشىپ, كىتاپحانامىزدىڭ قورىن ۇلت تاريحىمەن سۋسىنداتقان ەلباسى كىتاپحاناسىنا العىسىمىز زور", دەدى ع.مۇتانوۆ.
زال قورى كوبىندە تاۋەلسىزدىكتىڭ العاشقى جىلدارىن قاراستىرعان ەلباسىنىڭ عىلىمي زەرتتەۋلەرى مەن كىتاپتارىنان, وزگە دە ماتەريالداردان قۇرالعان. بۇل جەردە ارحيۆ قۇجاتتارى كوشىرمەلەرى, فوتو, بەينە قۇجاتتار, باسپا ماتەريالدارى, ەلباسىنىڭ بالالىق شاعى مەن ستۋدەنت كەزى, ەڭبەك جولى مەن قوعامدىق-ساياسي قىزمەتى تۋرالى فيلمدەر ۇسىنىلعان.
ستۋدەنتتەر مەن عالىمداردىڭ نازارىنا ۇسىنىلاتىن ەلباسى كىتاپحاناسىنىڭ "قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ الەمنىڭ جەتەكشى ۋنيۆەرسيتەتتەرىندە وقىعان دارىستەرى" كىتابى نۇرسۇلتان نازارباەۆتىڭ ءال-فارابي اتىنداعى قازۇۋ سياقتى ءىرى جوعارعى وقۋ ورىندارىندا وقىعان دارىستەرىن قامتيدى.
زال عىلىمي-پراكتيكالىق كونفەرەنتسيالار مەن سەمينارلاردىڭ ۇيىتقىسىنا, ساراپشىلار قاۋىمداستىعى مەن مادەنيەت, ءبىلىم سالاسىنىڭ ماماندارى مەن ماماندارىنىڭ باسىن قوساتىن وشاققا اينالماق.
