كومپانيا باسشىسىنىڭ ايتۋىنشا, مۇنداي كۇرەس تەز وزگەرۋدى تالاپ ەتەدى.
"كىشكەنتاي عانا مىسال: وزدەرىڭىز جاقسى بىلەتىندەي كارانتين شارالارىنا بايلانىستى بيىلعى جىلدىڭ ناۋرىز ء–ساۋىر ايلارىنان باستاپ الەم بويىنشا 1,6 ملرد وقۋشى قاشىقتان وقىتۋ فورماتىنا كوشتى. ءبىزدىڭ ەلدە دە سولاي بولدى. بۇعان قازاقستان دا, سول سەكىلدى باسقا دا مەملەكەتتەر دايىن بولعان جوق. ويتكەنى مۇنداي كولەمدە قاشىقتان وقىتۋعا دايىن بىردە-ءبىر پلاتفورما, بىردە-ءبىر كومپانيا دا, مەملەكەت تە بولعان ەمەس", دەدى راۋان كەنجەحان ۇلى.
"Bilim Media Group" كومپانياسىنىڭ ديرەكتورىنىڭ ايتۋىنشا, بۇعان دەيىن ءبىلىم بەرۋ سالاسىنداعى اقپاراتتاندىرۋ قۇرالدارى, پلاتفورمالارى جاسالىپ جاتقانىمەن ولار مەكتەپ مۇعالىمدەرىنە كومەكشى قۇرال رەتىندە عانا بولعان.
"وسىنداي جاعدايدا شۇعىل دايىندىق جاساپ, مۇلدە بولەك تەحنولوگيالىق قۇرالداردى يگەرىپ, جاڭا كونتەنت جاساۋ ارقىلى بۇعان دەيىن مەڭگەرىلمەگەن دەڭگەيلەرگە شىعۋعا مۇمكىندىك الدىق. سەبەبى ءبىز قۇراستىرىپ جاتقان پلاتفورمالارعا كۇن سايىن 1,5 ملن ادام كىرىپ وتىر. مۇنداي ترافيگى بار قازاقستاندا جۇيە جوق دەۋگە بولادى. قازاقستاندىق ينتەرنەت ترافيكتى ولشەۋشىلەر مەن زەرتتەۋشىلەردىڭ بەرگەن مالىمەتى بويىنشا 30 جىلدىق تاريحىمىزعا مۇنداي ترافيك بولعان ەمەس", دەدى ول.
راۋان كەنجەحان ۇلى ءوز سوزىندە مۇنداي ترافيك ءبىر جاعىنان ۇلكەن مۇمكىندىك بولعانىمەن, ەكىنشى جاعىنان وتە ۇلكەن تالاپ ەكەنىن دە ەسكە سالدى.
ء"بىز تەز بەيىمدەلە الۋىمىز كەرەك. ءبىز ۆەب-سايتتىڭ ءموبيلدى نۇسقاسىن شۇعىل دامىتۋعا ءماجبۇر بولدىق. سەبەبى 1,5 ميلليون ادامنىڭ 80 پايىزى ءموبيلدى تەلەفوندار ارقىلى كىرەدى. قازىر بالالاردىڭ دا, مۇعالىمدەردىڭ دە قولىندا سمارتفون بار. ودان بولەك وزىمىزگە عانا تاۋەلدى بولماي, YouTube سەكىلدى پلاتفورمالاردىڭ مۇمكىندىگىن كەڭىنەن پايدالانۋ ءۇشىن ءبىز ءبىراز كونتەنتتى سوندا سالىپ, ونىڭ دا مۇمكىندىگىن كورەيىك دەگەن تاجىريبەلەردى ەنگىزدىك. بۇل دا وتە قىزىق بولدى, سەبەبى قازاق تىلىندەگى ساباقتاردى كورسەتەتىن YouTube-ارناعا 7 كۇننىڭ ىشىندە 100 مىڭ ادام جازىلىپ, تۇراقتى تۇردە كورە باستادى", دەدى راۋان كەنجەحان ۇلى.
ايتا كەتسەك, ەلورادادا Astana Media Week 2020 شاراسى وتكىزىلۋدە. ءىس-شارانىڭ نەگىزگى ماقساتى – وتاندىق مەدياسالانى دامىتۋ مەن يندۋسترياداعى ىسكەرلىك قارىم-قاتىناستى ايماقتىق جانە حالىقارالىق دەڭگەيدە ىلگەرىلەتۋ.
مەديا اپتالىق ءتورتىنشى جىل قاتارىنان الەمنىڭ تۇپكىر-تۇپكىرىنەن جەتەكشى ساراپشىلاردى ءداستۇرلى تۇردە جيناپ كەلەدى جانە وزەكتى تاقىرىپتار تالقىلانادى.
