ونىڭ ايتۋىنشا, حالىق اۋە بيلەتتەرىن تەمىرجول بيلەتىنىڭ قۇنىمەن ساتىپ الا باستادى. وسىلايشا, 21 ماۋسىمنان باستاپ ەلىمىزدىڭ تۇڭعىش وتاندىق لوۋكوستەرى – "FlyArystan" اۋە كومپانياسى اقتاۋعا شىمكەنت, الماتى, نۇر-سۇلتان, اتىراۋ, اقتوبە مەن ورال قالالارىنان 4999 تەڭگەدەن باستاپ ساتا باستادى. اتالعان لوۋكوستەر بىرنەشە اي ىشىندە كاسپي ءوڭىرىنىڭ 140 مىڭداي جولاۋشىسىنا ءوز قىزمەتىن ۇسىندى. كەلەشەكتە باعىتتاردىڭ سانى كوبەيگەن سايىن, ۇسىنىلاتىن قىزمەتتەردىڭ سانى دا ارتادى.
قازىرگى تاڭدا تۇراقتى رەيستەردى "Airbus A 320" اۋە لاينەرلەرى ورىنداپ ءجۇر. لوۋكوستەر فلوتىندا ولاردىڭ سانى 7 بولسا, ونىڭ ەكەۋى اتىراۋدان باتىس قالالاردى ءوزارا بايلانىستىرادى. ۇشاقتار ەكونوم-كلاسستى 180 ورىندىقپەن جابدىقتالعان. ولاردى 10 جىلدىق تاجىريبەسى بار كاسىبي ۇشقىشتار جۇرگىزەدى.
"ەلىمىزدىڭ لوۋكوستەرى – وتاندىق اۋە كومپانيانىڭ ەنشىلەس كومپانياسى بولعاندىقتان, "FlyArystan" قاۋىپسىزدىك ستاندارتتارىنا اسا جوعارى كوڭىل بولەدى جانە "Air اstana" كومپانياسىنىڭ ينجەنەرلىك توبىنىڭ قىزمەتتەرىنە جۇگىنەدى. قولجەتىمدى ءارى جوعارى ساپالى قىزمەتتەردى ۇسىنا وتىرىپ, بيۋدجەتتىك كومپانيا بيلەتتەردى ەرتەرەك flyarystan.com سايتىندا نەمەسە كومپانيانىڭ ءموبيلدى قوسىمشاسىندا برونداۋعا كەڭەس بەرەدى. سەبەبى ساتىلىم 2021 جىلدىڭ 27 ناۋرىزىنا دەيىنگى ساپارلارعا اشىق. سوندىقتان مەيرام جانە دەمالىس كۇندەرگە ارزان بيلەتتەر تاۋسىلۋى مۇمكىن. سونداي-اق مينيمالدى باعا قۇنىنا اۋە ساپار مەن 5 كگ قولجۇگى عانا كىرەتىنىن ەسكەرتەمىز. بارلىق قوسىمشا قىزمەتتەردى جولاۋشىلار بولەك ساتىپ الۋلارى قاجەت", دەدى ءلاززات نابيەۆا.
ماڭعىستاۋ وبلىسى
