كەشە ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ ءداستۇرلى بريفينگتە وسى اپتانىڭ اتاۋلى شارالارىمەن تانىستىردى.
كەشە ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ ءداستۇرلى بريفينگتە وسى اپتانىڭ اتاۋلى شارالارىمەن تانىستىردى.
وسى اپتانىڭ باستى وقيعاسى – 1 جەلتوقساندا اتاپ وتىلەتىن قازاقستان رەسپۋبليكاسى تۇڭعىش پرەزيدەنتىنىڭ كۇنى. بۇل اتاۋلى كۇن 2012 جىلدىڭ 1 جەلتوقسانىنان باستاپ جالپىۇلتتىق دەڭگەيدە اتاپ وتىلە باستادى. قازاقستاننىڭ باستى جەتىستىكتەرى ەلىمىزدىڭ تۇڭعىش پرەزيدەنتى نۇرسۇلتان نازارباەۆپەن تىكەلەي بايلانىستى. قازاقستانداعى تۇڭعىش پرەزيدەنت كۇنى – تاريحي تاڭداۋ جاسالعان كۇن, حالىقتىڭ بىرلىك جانە كەلىسىم كۇنى. جالپىۇلتتىق تۇڭعىش پرەزيدەنت كۇنى اياسىندا ەلىمىزدە بىرقاتار ماڭىزدى شارالار ۇيىمداستىرىلادى, دەگەن ا.ابيبۋللاەۆ, سونداي-اق, جوسپارلانىپ وتىرعان الەۋمەتتىك-ساياسي وقيعالارمەن دە تانىستىرىپ ءوتتى.
رەسمي وكىل 28 قاراشا مەن 7 جەلتوقسان ارالىعىندا سەنات جانە ءماجىلىس دەپۋتاتتارىنىڭ قابىلدانعان زاڭداردى ءتۇسىندىرۋ ماقساتىندا وڭىرلەرگە ساپارعا شىعاتىنىن جانە ونىڭ بارىسىندا دەپۋتاتتاردىڭ سايلاۋشىلارمەن كەزدەسۋلەر وتكىزەتىنىن قاپەرگە سالدى. جانە ول 28-29 قاراشادا قاسىم-جومارت توقاەۆ باستاعان سەنات دەلەگاتسياسىنىڭ ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەياسىنىڭ, تاۋەلسىز مەملەكەتتەر دوستاستىعى پارلامەنتتىك اسسامبلەياسى مەن ەۋرازيالىق ەكونوميكالىق قوعامداستىق پارلامەنتارالىق اسسامبلەياسىنىڭ ءىس-شارالارىنا قاتىسۋ ماقساتىندا سانكت-پەتەربۋرگتە بولاتىنىن ايتتى.
سونداي-اق, بريفينگتە الداعى ۇكىمەت وتىرىسىندا تالقىلاناتىن ماسەلە دە ءمالىم بولدى. رەسمي وكىلدىڭ سوزىنە قاراعاندا, كولىك جانە كوممۋنيكاتسيا ءمينيسترى اسقار جۇماعاليەۆ كولىك جۇيەسى ينفراقۇرىلىمىن دامىتۋدىڭ 2020 جىلعا دەيىنگى مەملەكەتتىك باعدارلاماسىنىڭ جوباسىن تانىستىراتىن كورىنەدى. ال وسى اپتانىڭ سوڭىنا قاراي, ياعني 29 قاراشادا پرەمەر-مينيستر سەرىك احمەتوۆ تاشكەنتتەگى شىۇ ۇكىمەت باسشىلارى كەڭەسىنىڭ وتىرىسىنا قاتىسىپ, ونىڭ اياسىندا بىرقاتار ەلدەردىڭ ۇكىمەت باسشىلارىمەن ەكىجاقتى كەزدەسۋلەر وتكىزەتىنى بەلگىلى بولدى.
اپتا ىشىندە ەلىمىزدىڭ ىشكى جانە سىرتقى ساياساتى مەن جالپى ومىرىندە بولاتىن قاداۋ-قاداۋ وقيعالاردى ايتىپ وتكەن رەسمي وكىل ءبىلىم جانە عىلىم مينيسترلىگى «حالىقارالىق باعدارلامالار ورتالىعىنىڭ» پرەزيدەنتى عاني نىعمەتوۆتى جۋرناليستەر الدىنا شاقىردى. ول ءوز سوزىندە اتالعان باعدارلاما جۇزەگە اسىرىلىپ جۇرگەن مەزگىلدە, 20 جىلدىڭ ىشىندە 10 025 ازاماتقا ستيپەنديا تاعايىندالىپ, سونىڭ ىشىندە 6015 تۇلەك بۇگىندە ەل يگىلىگى ءۇشىن قازاقستاندىق ەكونوميكانىڭ ءتۇرلى سالالارىندا ەڭبەك ەتىپ جاتقانىن ايتتى. باعدارلاما ارقاسىندا تولىققاندى ءبىلىم العان تالاپتى دا تالانتتى جاستاردىڭ ءومىردىڭ ءبىر كىرپىشى بولىپ قالانعانىن تىلگە تيەك ەتكەن ع.نىعمەتوۆ: «2500 تۇلەك بۇگىندە الەمنىڭ 33 ەلىنىڭ 200 جوعارى وقۋ ورنىندا ءبىلىم الۋدا. ءبىر مىڭعا جۋىق ادامنىڭ باسىن بىرىكتىرىپ وتىرعان «بولاشاق» تۇلەكتەرى مەن ستيپەندياتتارىنىڭ قاۋىمداستىعى جۇمىس ىستەيدى. «بولاشاق» باعدارلاماسى و باستا مەملەكەتتىك مىندەتتەردى اتقارۋعا باعىتتالعان بولاتىن. 90-شى جىلداردىڭ باسىندا, ەل پرەزيدەنتى وسىنداي باعدارلاما قابىلداۋ تۋرالى كورەگەن جانە ستراتەگيالىق شەشىم قابىلدانعان كەزدە, مەملەكەتتىك باسقارۋ, حالىقارالىق قاتىناستار, ديپلوماتيا سياقتى ماماندىقتار بويىنشا, ياعني تاۋەلسىزدىگىن ەندى العان قازاقستاننىڭ قالىپتاسۋىنا قاجەتتى ماماندىقتار بويىنشا 700-گە تارتا ادام وقۋعا جىبەرىلگەن بولاتىن. كەيىننەن مەملەكەت باسشىسى ەلىمىزدىڭ ورتا مەرزىمدىك دامۋىن انىقتاعان 2030 جىلعا دەيىنگى ستراتەگيانى قابىلدادى جانە سول ستراتەگيانى ىسكە اسىرۋ بارىسىندا «بولاشاق» باعدارلاماسى جاڭارتىلىپ, ەلىمىزدىڭ بارلىق تۇرعىندارى قول جەتكىزە الاتىن ناعىز حالىقتىق جوباعا اينالدى», دەدى.
بريفينگ بارىسىندا مەملەكەت باسشىسى نۇرسۇلتان نازارباەۆتىڭ قاتىسۋىمەن «بولاشاق» باعدارلاماسى ءتۇلەكتەرى مەن ستيپەندياتتارىنىڭ مەرەيتويلىق فورۋمى وتەتىنى دە ءمالىم بولدى.
انار تولەۋحانقىزى,
«ەگەمەن قازاقستان».
