ۋنيۆەرسيتەت رەكتورى گۇلزادا شاكۋليكوۆانىڭ ايتۋىنشا, تالاپتى جاستاردى ىنتالاندىرۋعا باعىتتالعان جۇمىستار جالعاسىن تاۋىپ كەلەدى. بيىل 250 ستۋدەنتكە كورپوراتيۆتىك گرانت تاعايىنداۋ قولعا الىندى. سونىمەن قاتار, وقۋ ورنىنىڭ العاشقى رەكتورى, اكادەميك تولەۋىش سەرىكوۆ, مەملەكەت جانە قوعام قايراتكەرى راۆيل شىرداباەۆ اتىنداعى ستيپەنديالار تابىستالدى.
"ەندى مەملەكەت جانە قوعام قايراتكەرى, بەلگىلى مۇنايشى نۇرلان وتەپ ۇلى بالعىمباەۆ اتىنداعى اتاۋلى ستيپەنديا تاعايىنداۋعا كونكۋرس جاريالانىپ وتىر. مەملەكەتتىك باسقارۋ مەن وتاندىق ەكونوميكانى دامىتۋ ءىسىنىڭ قايراتكەرى نۇرلان وتەپ ۇلى ءبىلىمى مەن مول تاجىريبەسىن مۇناي-گاز سالاسىنىڭ وركەندەۋى مەن قالىپتاسۋىنا جۇمسادى. سول سەبەپتەن, ۋنيۆەرسيتەت باسشىلىعى ستۋدەنتتەردىڭ وقۋ, عىلىمي جانە شىعارماشىلىق قابىلەتىن ىنتالاندىرۋ ماقساتىندا بەلگىلى مەملەكەت قايراتكەرى اتىنداعى ارناۋلى ستيپەنديانى تاعايىنداۋدى ءجون كوردى. اتاۋلى ستيپەنديا بەس ۇزدىك ستۋدەنتكە بەرىلەدى. اي سايىن بەرىلەتىن 50 مىڭ تەڭگەلىك ستيپەنديانى يەلەنۋ ءۇشىن ستۋدەنتتىڭ وقۋدا وزات, ومىرلىك ۇستانىمى بەلسەندى, ءبىلىم-عىلىمعا قابىلەتتى, دارىندى, جاۋاپكەرشىلىگى جوعارى بولۋىنا باسا ءمان بەرىلەدى", دەيدى رەكتور گۇلزادا شاكۋليكوۆا.
