قۇقىقتىق تارتىپكە قۇرمەت كەرەك. سەبەبى, زاڭدى بىلمەۋ ەشكىمدى دە زاڭنىڭ زاۋالىنان قۇتقارا المايدى. جاقىندا قىزىلوردا وبلىسى جاڭاقورعان اۋدانى پروكۋراتۋراسىنىڭ قىزمەتكەرلەرى جەرگىلىكتى تۇرعىندار اراسىندا ۇيىمداستىرعان «حالقىم, زاڭدى ءبىل» اتتى قۇقىقتىق شاراcى وسىنى تۇسىندىرۋگە ارنالدى.
قۇقىقتىق تارتىپكە قۇرمەت كەرەك. سەبەبى, زاڭدى بىلمەۋ ەشكىمدى دە زاڭنىڭ زاۋالىنان قۇتقارا المايدى. جاقىندا قىزىلوردا وبلىسى جاڭاقورعان اۋدانى پروكۋراتۋراسىنىڭ قىزمەتكەرلەرى جەرگىلىكتى تۇرعىندار اراسىندا ۇيىمداستىرعان «حالقىم, زاڭدى ءبىل» اتتى قۇقىقتىق شاراcى وسىنى تۇسىندىرۋگە ارنالدى.
ايتا كەتۋ كەرەك, اتالمىش اكتسيا ازاماتتاردى جەكە قابىلداۋ تۇرىندە ەمەس, جۇرتشىلىقپەن كەزدەسۋ سيپاتىندا جۇرگىزىلدى. پروكۋراتۋرا قىزمەتكەرلەرى بەلگىلەنگەن ەكى اپتا مەرزىم ىشىندە «نۇر وتان» پارتياسى, قۇقىق قورعاۋ ورگاندارى, جەرگىلىكتى اتقارۋشى, ۋاكىلەتتى ورگاندار جانە بۇقارالىق اقپارات قۇرالدارى وكىلدەرىنىڭ قاتىسۋىمەن اۋداننىڭ بارلىق ەلدى مەكەندەرىن ارالاپ شىعىپ, جەرگىلىكتى تۇرعىندار اراسىندا اتالمىش اكتسيانى وتكىزىپ قايتتى.
اكتسيا «سۋناقاتا» اۋىلىنان باستالدى. جيىندى اۋىلدىق وكرۋگ اكىمى ءازيا قىستاۋباەۆا اشىپ, ونىڭ ماقساتىن قىسقاشا ءتۇسىندىرىپ ءوتتى. سودان كەيىن اۋدان پروكۋرورى مۇرات دوسماعانبەتوۆ ءسوز الىپ, ادام قۇقىقتارى مەن مىندەتتەرى جايلى جان-جاقتى اڭگىمە قوزعادى.
– ءاربىر ادام ءوزىنىڭ قۇقىقتارىن قورعاي بىلەتىن بولۋى كەرەك. بۇل ءۇشىن وعان زاڭدى ءبىلۋدىڭ ماڭىزى ەرەكشە, – دەدى ول. – بىزدە كوپ جاعدايدا ازاماتتاردىڭ زاڭدى بىلمەۋشىلىكتەرى, سول ارقىلى قۇقىقتارىن قورعاۋدا قابىلەتسىزدىك تانىتاتىندارى ولاردىڭ وزىنە تيەسىلى نارسەنىڭ وزىنە قول جەتكىزە الماۋلارىنا اپارىپ سوقتىرادى. ال قازىرگى كەزدە ءبىزدىڭ قوعامدا جۇرت ەڭبەك قۇقىعىنا بايلانىستى كوپتەگەن قيىندىقتارعا تاپ بولىپ جاتادى.
اۋدان پروكۋرورى ءوز سوزىندە سونداي-اق جۇكتى جانە 3 بالاسى بار ايەلدەردى جۇمىستان قىسقارتۋعا بولمايتىنىن ايتتى. اليمەنت الۋ ماسەلەسىندە دە كوپ كۇردەلىلىك جوق. ول ەرلى-زايىپتىلار اجىراسقاننان كەيىن, ولاردان تۋعان بالالاردىڭ كىمنىڭ قولىندا قالعانىنا بايلانىستى بەلگىلەنەدى. اليمەنتتى بالانى نەمەسە بالالاردى باعۋىندا الىپ قالعان جاق الادى. مۇنداعى ءبىر ەرەكشەلىك, اليمەنت تولەۋگە مىندەتتى ادام جۇمىسسىز جۇرگەن بولسا, ونىڭ اكە-شەشەسى, ياعني بالالاردىڭ اتا-اجەسى تولەۋلەرىنە دە بولادى.
كەلەسى كەزەكتە اڭگىمە اۋانى مەنشىك قۇقىعىنا ويىستى. اۋىل اكىمىنىڭ شەشىمى شىققانىمەن, مەنشىك تىركەۋگە الىنعان بولىپ سانالمايدى. مەنشىك قۇقىعى ادىلەت ورگاندارىندا تىركەلگەننەن كەيىن عانا ءوزىنىڭ زاڭدى كۇشىنە ەنەدى. ال جەكە جانە زاڭدى تۇلعالاردىڭ بۇل جونىندەگى وتىنىشتەرىن قاراۋ 15 كۇننىڭ ىشىندە جۇزەگە اسىرىلادى. الايدا, قوسىمشا تەكسەرۋ قاجەت بولعان جاعدايدا بۇل مەرزىم 1 ايعا دەيىن سوزىلادى.
كەزدەسۋ سوڭىندا اۋدان پروكۋرورى اۋىل تۇرعىندارى تاراپىنان بەرىلگەن كوپتەگەن سۇراقتارعا جاۋاپ بەردى.
ەرجان بايتىلەس,
«ەگەمەن قازاقستان».
قىزىلوردا وبلىسى.
