وسى كۇنگە دەيىن «لۋگوۆايا ستانساسى» اتالىپ كەلگەن بەكەتكە تۇركسىبتىڭ 90 جىلدىعىنا وراي «تۇركسىب» اتاۋى قايتارىلىپ وتىر. وسىدان تۋرا 90 جىل بۇرىن تۇركسىب بويىنشا وتپەلى جۇمىسشىلاردىڭ قوزعالىسى باستالعان. جاڭا سالىنعان بولات جول ارقىلى الماتى ۋەزدىك قالاسى رەسپۋبليكانىڭ اكىمشىلىك جانە مادەني ورتالىعىنا اينالدى. سونىمەن قاتار جاڭاسەمەي, چارسك, اقتوعاي, لەپسى, ماتاي, سارىوزەك, شۋ, اياگوز جانە وتار سياقتى كوپتەگەن جاڭا قالالار مەن ستانسالار پايدا بولدى.
تاريحي دەرەكتەر بويىنشا 1927 جىلى 21 قاراشا كۇنى وسى لۋگوۆايا ستانساسىندا تەمىر جولدىڭ العاشقى رەلستەرى سالىنعان. ال اتالعان ستانسا 1930 جىلى پايدالانۋعا بەرىلگەن. وسى جەردە سول كەزدەگى حالىق كوميسسارلارى كەڭەسى توراعاسىنىڭ ورىنباسارى, كورنەكتى الاش قايراتكەرى تۇرار رىسقۇلوۆتىڭ قاتىسۋىمەن قۇرىلىس الاڭىنىڭ رەسمي اشىلۋى وتكەن. تۇركسىبتىڭ بولات ماگيسترالى 1 500 شاقىرىمعا دەيىن سوزىلعان. سول 1930 جىلى تۇركسىب رەلستەرى قوسىلىپ, وتپەلى قوزعالىس ءۇشىن جول اشىلدى. لۋگوۆوي ستانساسىنان سول كەزدەگى جامبىل, شۋ جانە بىشكەك قالالارىنا پويىزدار ءجۇردى. بۇل كۇندە اتى اڭىزعا اينالعان ماگيسترال سول كەزدە ەكونوميكانىڭ دامۋىندا ماڭىزدى ءرول اتقارىپ قانا قويماي, ۇلكەن اۋماقتىڭ تابيعي رەسۋرستارىن يگەرۋگە, ونەركاسىپ جانە اۋىلشارۋاشىلىق الەۋەتىن ىسكە اسىرۋعا دا مۇمكىندىك الدى. قاراپايىم حالىقتىڭ ەرلىگىنىڭ ناتيجەسىندە دۇنيەگە كەلگەن تۇركسىبتى ەل «جاڭا ءومىر جولى» دەپ اتادى. كەيىن ماگيسترال بويىندا قالالار مەن جۇمىسشى پوسەلكەلەرى پايدا بولدى. سول كەزەڭدە بۇگىنگى ت.رىسقۇلوۆ اۋدانىنىڭ اۋماعىنا قارايتىن لۋگوۆوي اۋىلى دا قۇرىلدى.
بۇگىندە تۇركسىب ستانساسى تەك قازاقستاننىڭ عانا ەمەس, ورتالىق ازيانىڭ دا بارلىق ەلدەرىنىڭ ەكونوميكاسىندا ماڭىزدى ورىن الادى. تاسىمالدى قىتايدان باستاپ, رەسەي, ورتالىق ازيا, تاياۋ شىعىس ەلدەرى ارقىلى جانە ەۋروپاعا دەيىنگى بىرىڭعاي جىبەك جولىنا بىرىكتىرەتىن ورتالىققا اينالدى. لۋگوۆوي اۋىلدىق وكرۋگىنىڭ اكىمى مۇرات سىبانوۆتىڭ ايتۋىنشا, ستانسادا بۇگىندە 10 385 ادام تۇرادى. تەمىر جول سالىنعاندا قۇرىلعان اۋىلدىڭ تۇرعىندارى دا ستانسانىڭ «تۇركسىب» دەپ اتالۋىن دۇرىس كورىپ جاتىر ەكەن. ال تۇركسىب ستانساسىنىڭ باسشىسى تيمۋر قۋانىش ۇلى بۇل جەردەن كۇن سايىن 35 جولاۋشىلار جانە جۇك تاسىمالداۋشى پويىز وتەتىنىن ايتتى. سونداي-اق اتالعان ستانسا قىرعىزستاننان 5 پويىزدى قابىلداپ الىپ, 5 پويىزدى جىبەرەدى ەكەن.
جامبىل وبلىسى
