كەزدەسۋ بارىسىندا مەديتسينا فاكۋلتەتىنىڭ ستۋدەنتتەرى جاڭا كونستيتۋتسيا جوباسىن جانە الداعى رەفورمالاردى مەديتسينالىق مەكەمەلەر وكىلدەرى مەن ۋنيۆەرسيتەت قىزمەتكەرلەرىمەن تالقىلادى.
پىكىرتالاس الاڭىنا مەديتسينا فاكۋلتەتىنىڭ 20-دان استام ستۋدەنتى قاتىستى. كەزدەسۋدى اشا وتىرىپ, Kozybayev University مەديتسينا فاكۋلتەتىنىڭ ديرەكتورى سەرىك باحتيار جوبا بويىنشا جۇمىس اشىق جۇرگىزىلگەنىن اتاپ ءوتتى: تالقىلاۋ پلاتفورماسىنا مىڭداعان پىكىرلەر مەن ۇسىنىستار تۇسكەن.
ونىڭ ايتۋىنشا, قۇجاتتاعى تۇجىرىمداردىڭ ەداۋىر بولىگى جاڭارتىلىپ, پرەامبۋلادا جانە نورمالاردا العاش رەت ادامعا باعدارلانعان ۇستانىم, عىلىم مەن ءبىلىمنىڭ مەملەكەتتى دامىتۋداعى ءرولى ايقىن كورسەتىلگەن.
جوبادا قاراستىرىلعان ءبىر پالاتالى پارلامەنت-قۇرىلتايعا كوشۋ ماسەلەسىنە ەرەكشە نازار اۋدارىلدى. قۇرىلتاي 145 دەپۋتاتتان تۇرادى. ۇسىنىلىپ وتىرعان وزگەرىستەر بيلىك جۇيەسىنىڭ تەڭگەرىمدى بولۋىن قامتاماسىز ەتىپ, ازاماتتاردىڭ ەل باسقارۋىنا قاتىسۋ تەتىكتەرىن كەڭەيتەتىنى ايتىلدى.
ەڭ كوپ تالقىلانعان ماسەلەلەردىڭ ءبىرى – مەديتسينالىق كومەك تاقىرىبى بولدى. ستۋدەنتتەر «جوبا بىلىكتى مەديتسينالىق كومەككە قۇقىقتى جەتكىلىكتى دەڭگەيدە قامتاماسىز ەتە مە؟» جانە «نەگە ماتىندە بۇرىنعى رەداكتسيامەن سالىستىرعاندا وزگەشە تۇجىرىم قولدانىلعان؟» دەگەن سۇراقتار قويدى.
سپيكەرلەر مەملەكەت تاراپىنان مەديتسينالىق كومەك كورسەتۋ كەپىلدىكتەرى ساقتالاتىنىن ءتۇسىندىردى. اڭگىمە ازاماتتارعا ۇسىنىلاتىن كەپىلدەندىرىلگەن مەديتسينالىق كومەك كولەمى, سونداي-اق ەل اۋماعىندا جۇرگەن بارلىق ادامدارعا, ونىڭ ىشىندە شەتەلدىكتەرگە دە كورسەتىلەتىن شۇعىل كومەك تۋرالى بولىپ وتىر. تۇجىرىمداردىڭ وزگەرۋى مەملەكەتتىك مىندەتتەمەلەردى جويۋ ەمەس, قۇقىقتىق ناقتىلاۋلارمەن بايلانىستى ەكەنى ايتىلدى.
كەزدەسۋ بارىسىندا مەديتسينالىق قىزمەتكەرلەردىڭ قۇقىقتىق قورعالۋى, بولاشاق دارىگەرلەردىڭ تەك كلينيكالىق ەمەس, سونىمەن قاتار كاسىبي قىزمەتىنىڭ قۇقىقتىق قىرلارىن دا مەڭگەرۋ قاجەتتىلىگى تالقىلاندى. ءوز قۇقىقتارى مەن مىندەتتەرىن تۇسىنبەيىنشە, ساۋاتتى كاسىبي قىزمەتتى قالىپتاستىرۋ مۇمكىن ەمەستىگى اتاپ ءوتىلدى.
مەديتسيناداعى ءدىني اسپەكتىلەر تۋرالى دا سۇراقتار قويىلدى. قاتىسۋشىلارعا مەملەكەتتىڭ زايىرلى بولىپ قالا بەرەتىنى, ال كونستيتۋتسيا نورمالارى ازاماتتاردىڭ تەڭدىگىن جانە ار-وجدان بوستاندىعىن بەكىتەتىنى ءتۇسىندىرىلدى. بۇل قولدانىستاعى زاڭناما اياسىندا وسىنداي جاعدايلاردى قۇقىقتىق تۇرعىدا رەتتەۋگە نەگىز بولاتىنى ايتىلدى.
عىلىم مەن ءبىلىمنىڭ ماڭىزىنا دا ەرەكشە توقتالدى. سپيكەرلەر جوبا ادام كاپيتالىن دامىتۋعا, اكادەميالىق ورتا مەن عىلىمي قىزمەتكە باسىمدىق بەرەتىنىن جەتكىزدى. ولاردىڭ پىكىرىنشە, بۇل ۋنيۆەرسيتەت قاۋىمداستىعى مەن بولاشاق ماماندار ءۇشىن ماڭىزدى بەلگى.
كەزدەسۋ سوڭىندا قاتىسۋشىلارعا 15 ناۋرىزدا وتەتىن رەفەرەندۋم تۋرالى ەسكە سالىنىپ, جوبانىڭ ماتىنىمەن ءوز بەتىنشە تانىسىپ, سانالى تۇردە داۋىس بەرۋگە قاتىسۋعا شاقىرىلدى. ۇيىمداستىرۋشىلار قازىرگى كەزەڭ تاريحي ءسات ەكەنىن, وندا جاستار باقىلاۋشى ەمەس, كونستيتۋتسيالىق ۇدەرىستىڭ تولىققاندى قاتىسۋشىسىنا اينالاتىنىن اتاپ ءوتتى.
