ال قازىر دەپارتامەنت باسشىسى باتىربەك اليەۆتىڭ ايتۋىنشا, ماۋسىمدىق ەپيدەميانى بولدىرماس ءۇشىن تۇرعىنداردى ەگۋ جۇمىستارى جۇزەگە اسىرىلۋدا. ماسەلەن, قىركۇيەكتەن باستاپ وبلىس بويىنشا 81 164 ادام تۇماۋعا قارسى ۆاكتسينا العان.
بىراق قازىرگى كۇز ايلارىندا وبلىس تۇرعىندارى تۇماۋ مەن كوروناۆيرۋستى قاتار جۇقتىرۋى دا مۇمكىن. بيىلعى ەپيدەميالىق ماۋسىمنىڭ ەرەكشەلىگى سول – اۋادا جاڭا كوروناۆيرۋس ينفەكتسياسى جەدەل رەسپيراتورلىق-ۆيرۋستىق ينفەكتسيالارى مەن تۇماۋمەن بىرگە تارالادى.
– تۇماۋمەن بىرگە كوروناۆيرۋس ينفەكتسياسىمەن اۋرۋ قاۋپى بار. ويتكەنى ەكى ۆيرۋس تا جەدەل رەسپيراتورلىق-ۆيرۋستىق ينفەكتسياسى. ۇيرەنشىكتى تۇماۋ جوعارى تىنىس جولدارىن قابىندىرسا, ال ەكىنشىسى وكپەگە قاۋىپ توندىرەدى. سوندىقتان تۇرعىندارعا قوعامدىق ورىنداردان اۋلاق بولىپ, قولدى ءجيى جۋىپ, بولمەلەردى جەلدەتىپ وتىرۋ كەرەك. كوشەگە شىعار الدىندا مۇرىن قۋىسىنا وكسولين جاقپا مايىن جاعىپ, بەتپەردە تاعۋ قاجەت, – دەيدى ب.اليەۆ.
دەنساۋلىق ساقتاۋ باسقارماسىنىڭ ليتسەنزيالاۋ جانە ءدارى-دارمەكپەن قامتاماسىز ەتۋ ءبولىمىنىڭ مالىمەتىنشە, قازىر وڭىردە مەديتسينالىق قىزمەتكەرلەردىڭ دە قاۋىپسىزدىگى ءۇشىن بارلىق شارا جاسالعان. وبلىستا ىندەتتتىڭ تارالماۋىنا وراي جاسالعان 2 ايلىق ءدارى قورى بار. مەديتسينالىق ۇيىمداردا دا ءدارى-دارمەك جەتكىلىكتى.
– بيىل وبلىستاعى مەديتسينالىق ۇيىمدار مەن «سك-فارماتسيا» كومپانياسى اراسىندا ءدارى جەتكىزۋگە 6 ملرد تەڭگەدەن استام قارجىعا كەلىسىمشارت جاسالدى. بۇگىندە 4,6 ملرد تەڭگەگە ءدارى اكەلىندى. مامىر-شىلدە ايلارىندا كۆي جۇقتىرعان ناۋقاستاردى ەمدەۋ ءۇشىن دارىگە قوسىمشا وتىنىشتەر بەرىلدى, – دەيدى ءبولىم باسشىسى انار وماروۆا.
ونىڭ ايتۋىنشا, وڭىردەگى ءدارى باعاسىن تۇراقتاندىرۋعا ارنالعان قور بار. ءدارىحانالاردىڭ بەرگەن وتىنىشتەرى بويىنشا قاجەتتى پرەپاراتتار اكەلىنەدى. تۇراقتاندىرۋ قورى 2,869 ملن قاپتاما ءدارى اكەلدى. قازىر وڭىردەگى 212 دارىحاناعا بۇل دارىلەر جەتكىزىلدى. بارلىق ءدارى-دارمەك دەنساۋلىق ساقتاۋ مينيسترلىگىنىڭ ىندەت پەن ماۋسىمدىق تۇماۋدى ەمدەۋگە ارنالعان حاتتاماسىنا ساي كەلەدى.
وڭىردە مەديتسينالىق ۇيىمدارداعى, اۋرۋحانالارداعى, تۇراقتاندىرۋ قورىنداعى دارىلەر تۇرعىنداردى دەر كەزىندە ەمدەۋ ءۇشىن جەتكىلىكتى. ياعني كوروناۆيرۋستان باسقا اۋرۋلار بويىنشا دارىمەن قامتاماسىز ەتۋ بويىنشا ماسەلە جوق. ءبارى جوسپارداعىداي وتۋدە.
– ءيا, ارينە, دارىلەرگە قاتىستى وتىنىشتەر مەن شاعىمدار دا تۇسەدى. الايدا ول ماسەلەنىڭ ءمان-جايىن اشىپ قاراۋ كەرەك. كەيدە دۇرىس دارىگەرگە قارالماعان, ەمدەلۋگە ءدارى تاعايىندالماعان جاعدايلار كەزدەسەدى. ەگەر دە ەمحانالار ءدارى-دارمەك بەرمەگەن نەمەسە وزگە دە دارىمەن قامتاماسىز ەتۋگە قاتىستى ماسەلەلەر تۋىنداعان جاعدايدا وبلىستىق دەنساۋلىق ساقتاۋ باسقارماسىنىڭ 32-00-17 جانە 32-00-18 نومىرلەرى بويىنشا حابارلاسۋعا بولادى, – دەيدى ا.وماروۆا.
ال وبلىس ورتالىعىنداعى «109» قىزمەتىنىڭ باسشىسى ابزال قابدراش ورتالىق قىزمەتى ىسكە قوسىلعان 1 ناۋرىزدان بۇگىنگە دەيىن 85 مىڭ ءوتىنىش قابىلداعان. ولاردىڭ 25 مىڭى كوروناۆيرۋس ماسەلەسىنە قاتىستى تۇسكەن. تۇرعىندار, اسىرەسە ىندەت تاراعان ءساۋىر-مامىر كەزىندە ەڭ كوپ قوڭىراۋ شالىپتى. قازىر كۇن سايىن 500-1500 شاماسىندا ءوتىنىش كەلىپ تۇسەدى ەكەن.
– الداعى ۋاقىتتا «تسيفرلى قازاقستان» باعدارلاماسى بويىنشا 101, 102, 103 جانە 109 ديسپەتچەرلىك قىزمەتتەر «112» ءبىرتۇتاس جۇيەسىنە قوسىلادى. بۇل امەريكالىق «911» قىزمەتىنىڭ بالاماسى سەكىلدى, – دەدى ورتالىق باسشىسى.
سونداي-اق وڭىرگە جۇمىس ساپارىمەن كەلگەن قوعامدىق باقىلاۋ توبىنىڭ ۇيلەستىرۋشىسى سايدا تاۋەكەلەۆا دا اۋرۋحانالاردىڭ جابدىقتالۋىن, مەديتسينالىق قۇرالدار مەن ءدارى-دارمەكتەردىڭ دايىندىعىن تەكسەرىپ قايتتى.
مىسالى, اقسۋ قالاسىندا ىندەت ورشىگەن ۋاقىتتا 230 ادام سىيىمدىلىعى بار پروۆيزورلىق ورتالىق جۇمىس ىستەيدى. بۇگىندە ورتالىقتا 26 وكپەنى جاساندى جەلدەتۋ اپپاراتى بار. ونىڭ 13-ءى ىندەتتىڭ بولجامدى ەكىنشى تولقىنىنا دايىندىق جاعدايىنا الىنعان.
قالالىق №2 اۋرۋحانانىڭ باس دارىگەرى ماقسات مۇقاشەۆتىڭ ايتۋىنشا, ىندەت ورشىگەن ۋاقىتتا 922 ناۋقاس ەمدەلىپ شىققان. وعان 98 مەديتسينالىق قىزمەتكەر قىزمەت كورسەتكەن. جەرگىلىكتى بيۋدجەت ەسەبىنەن قوسىمشا وتتەگى كونتسەنتراتورلارى, رەانيماتسيالىق بولىمشەلەدىڭ قۇرىلعىلارمەن قامتىلۋىنا, سونداي-اق ينتەنسيۆتى تەراپيانىڭ قوسىمشا 18 ادامعا ارنالعان پالاتالارىنا قارجى بولىنگەن.
– ءبىزدىڭ ماقسات – وڭىردەگى ءار مەديتسينالىق ورتالىقتى تەكسەرۋ ارقىلى ءدارى-دارمەك قورىمەن, جالپى جۇمىس جاعدايىمەن تانىسۋ قاجەت. اۋرۋحانا مەنشىگىندە نە بار, نە جوقتىعىن ءبىلۋ ماڭىزدى. وڭىردەگى اقسۋ قالالىق ەمحاناسىن, قالالىق جەدەل جاردەم ستانساسىنىڭ جۇمىسىنا كوڭىلىمىز تولدى. ءبىز ەلىمىز بويىنشا مونيتورينگ جۇرگىزىپ جاتقاندىقتان, سالىستىرمالى تۇردە باعا بەرۋىمىزگە نەگىز بار, – دەدى س.تاۋەكەلوۆا.
پاۆلودار وبلىسى
