جاستاردى جاڭاشىلدىققا بەيىمدەپ, ولاردىڭ ءوزىن ءوزى دامىتۋىنا جاعداي جاساۋدى ماقسات ەتكەن جوبانىڭ اشىلۋ سالتاناتىنا نۇرسۇلتان نازارباەۆ قورىنىڭ ديرەكتورى داريعا نازارباەۆا, اقپارات جانە قوعامدىق دامۋ ءمينيسترى ايدا بالاەۆا, قازاقستان جاستار كونگرەسسىنىڭ اتقارۋشى ديرەكتورى توقتار بولىسوۆ قاتىستى.
داريعا نازارباەۆا ەپيدەميانىڭ اياقتالىپ, قالىپتى ومىرگە قايتا ورالاتىنىمىزعا سەنىم بىلدىرە وتىرىپ, پاندەميا كەزىندە جاقىنىنان ايرىلعاندارعا كوڭىل ايتتى. وسىنداي اۋىر كەزەڭدە تىنباي ەڭبەك ەتكەن ۆولونتەرلەردىڭ جۇمىسىن ەرەكشە اتاپ ءوتتى.
«قازاقستان جاستار كونگرەسىنىڭ بەلسەندىلەرىنە, ۆولونتەرلەرگە قيىن كەزەڭدە ادامدارعا ادال نيەتپەن قول ۇشىن بەرىپ, كومەك كورسەتكەنى ءۇشىن العىس ايتامىن. ەلباسىنىڭ باستاماسى Biz Birgemiz جوباسىن ءساتتى ىسكە اسىرۋ ءۇشىن كوپ جۇمىس اتقارىلدى. مىڭداعان مەكەن جايعا ازىق-ت ۇلىك, سانيتارلىق قۇرالدار جەتكىزىلدى. وسى كەزەڭدە ەلىمىزدىڭ بارلىق تۇرعىنىنىڭ بىرلىگىن, ءبىر ەكەنىمىزدى سەزىنۋ ماڭىزدى بولدى. جەكە كومپانيالار دا اتسالىستى. جوبا اياسىندا 850 مىڭ ادامعا كومەك كورسەتىلدى. قازاق ەلى جومارت ادامدارعا باي. ولاردىڭ مارتتىگى ءۇشىن زور ريزاشىلىعىمىزدى بىلدىرەمىز», دەدى ول.
سونىمەن بىرگە پاندەميانى تەز ارادا اياقتالا قويادى دەپ ويلامايتىنىن, ونداي جاعدايدا ءالى ۇزاق ۋاقىت ارەكەت ەتۋگە دايىن بولۋىمىز كەرەكتىگىن اتاپ ءوتتى. «ال بۇل – قولداۋدى قاجەت ەتەتىن ادامدارعا بارىنشا كومەك كورسەتۋدى جالعاستىرۋ كەرەك دەگەن ءسوز. ءوزىمىز بەن جاقىندارىمىزدىڭ دەنساۋلىعىنا جاۋاپكەرشىلىكپەن قاراۋىمىز كەرەك. ونىمەن قوسا ۇزدىك تاجىريبەنى قولداپ, ناسيحاتتاۋ قاجەت», دەدى د.نازارباەۆا.
«باعدارلامانىڭ اتاۋىندا كورسەتىلگەندەي, قازىرگى جاستاردىڭ الدىندا جاڭا مىندەتتەر تۇر. ەلباسى نۇر-سۇلتان قالاسىندا جاسىل بەلدەۋ سالۋ تۋرالى باستاما كوتەردى. قازىر
15 مىڭ گەكتار جەردە 11,5 ملن اعاش ءوسىپ تۇر. استانانىڭ كليماتى وزگەردى, قالا تۇرعىندارى ورمانداردا دەمالا الادى. بۇرىن مەكەندەمەگەن قۇستار كەلدى, جانۋارلار كوبەيدى. مۇنداي بەلدەۋلەر باسقا دا ايماقتارعا قاجەت. وسى جوبانى ءبىزدىڭ ۇزاقمەرزىمدى مىندەتىمىزگە اينالدىرساق دەيمىن. كونگرەسكە قاراستى «جاسىل ەل» ۇيىمى بار. جاستاردىڭ وسى سالادا تاجىريبەسى مول. سونىمەن بىرگە ۇكىمەت پەن اكىمدىكتەردىڭ كومەگىنەن ۇمىتتەنەمىز», دەدى نۇرسۇلتان نازارباەۆ قورىنىڭ ديرەكتورى.
ودان بولەك نۇرسۇلتان نازارباەۆتىڭ اۋىل جاستارىن قولداۋ باعدارلاماسى «مىڭ بالا» جوباسىنا توقتالىپ ءوتتى. داريعا نازارباەۆا كونگرەسس جاستارىن اۋىل بالالارىنا كومەك كورسەتۋگە, ولارعا تالىمگەر بولۋعا شاقىردى. سونىمەن قاتار تاۋەلسىزدىكتىڭ 30 جىلدىعى اياسىندا ىسكە اسىرىلاتىن جوبالاردى تالقىلاۋدى ۇسىندى.
«جاستار ءۇشىن قوعامعا, ياعني ەلىمىزگە قالتقىسىز قىزمەت ەتۋدەن ماڭىزدى ءىس بولۋى مۇمكىن بە؟ وسى قىزمەت ارقىلى سىزدەر تاجىريبە جيناقتايسىزدار, قۇرمەت پەن بەدەلگە يە بولاسىزدار جانە ومىردە كوپ جەتىستىكتەرگە جەتەسىزدەر. مەن سىزدەرگە شىن جۇرەكتەن وسىنى تىلەيمىن. وسىنداي ومىرلىك ۇستانىم جاڭا ۇرپاققا, جاڭا ادامدارعا كەز كەلگەن داعدارىستى جەڭۋگە جانە ۇلتتىق ەگەمەندىگىمiزدى نىعايتۋعا كۇش-قۋات بەرەدى دەپ سەنەمىن», دەپ تۇيىندەدى ءسوزىن داريعا نازارباەۆا.
اقپارات جانە قوعامدىق دامۋ ءمينيسترى ايدا بالاەۆا: «كوروناۆيرۋستىق پاندەميا ءبىزدىڭ جوسپارلارىمىزعا بىرقاتار تۇزەتۋ ەنگىزدى. سونىمەن بىرگە ونلاين رەجىمىندە ءتيىمدى جۇمىس ىستەي الاتىنىمىزدى جانە جۇمىس جاساۋىمىز كەرەگىن كورسەتتى. ەپيدەميا ادامداردىڭ ويلاۋ قابىلەتىن, ومىرگە دەگەن كوزقاراسىن وزگەرتىپ, بارلىعىمىز دا ءوز جۇمىسىمىزدا جانە كۇندەلىكتى ومىردە ۇلكەن جاۋاپكەرشىلىكتى سەزىنەتىن بولدىق», دەپ اتاپ ءوتتى.
مينيستر بۇگىن ەل جاستارى ءۇشىن ماڭىزدى شارانىڭ باستالعالى تۇرعانىن ايتا كەلە, ەلباسىنىڭ ء«بىزدىڭ ماقساتىمىز – جاستارعا جاڭا الەمدە ءومىر ءسۇرۋدى ۇيرەتۋ» دەگەن ءسوزىن ەسكە سالدى. تاۋەلسىزدىك العالى ەلىمىزدە جاڭا دا جاسامپاز جاستاردىڭ قالىپتاسقانىن ايتتى. «بۇل جوبا جاستارعا ءبىلىم بەرۋمەن قاتار, قۇندى پىكىرلەرى مەن كەرەمەت يدەيالارىن قولداۋ ماقساتىندا ۇيىمداستىرىلىپ وتىر», دەدى ا.بالاەۆا.
ۇيىمداستىرۋشىلاردىڭ ايتۋىنشا, جوبا اياسىندا ءبىر ايدىڭ ىشىندە جاس قازاقستاندىقتار ءوز ءبىلىمىن ارتتىرىپ, بىلىكتى جاتتىقتىرۋشىلاردان, ساراپشىلاردان جانە وزگە دە شاقىرىلاتىن قوناقتاردان كوشباسشىلىق جانە ومىرلىك قارىم-قابىلەتتى ۇيرەنۋگە مۇمكىندىك الادى.
جوبا بارىسىندا جاستاردىڭ وزەكتى ماسەلەلەرى بويىنشا الەۋمەتتىك ديالوگتى جانداندىرۋ جانە الەۋمەتتىك سەرىكتەستىك تەتىكتەرىن ازىرلەۋ ءۇشىن, ورتالىق مەملەكەتتىك ورگاندار باسشىلىعىنىڭ قاتىسۋىمەن پىكىرتالاستار جوسپارلانعان.
جوبانىڭ جۇمىسى بەس نەگىزگى باعىت بويىنشا جۇزەگە اسىرىلادى. ولار – ازاماتتىق بەلسەندىلىك, ۆولونتەرلەر, اقپاراتتىق تەحنولوگيالار, جاستار كاسىپكەرلىگى جانە جەكە دامۋ.
ساباقتار ونلاين-فورماتتا جۇزەگە اسىرىلاتىندىقتان وعان ەلىمىزدىڭ تۇكپىر-تۇكپىرىندەگى جاستاردىڭ قاتىسۋعا تولىق مۇمكىندىگى بار.
