– سىرتقى نارىقتارداعى جاعداي سياقتى, وتكەن ايدا تەڭگە سەرپىنى ءارتۇرلى باعىتتا بولدى, قۇبىلمالىق ورتاشا سيپاتتا بولدى. الايدا, قازاننىڭ سوڭعى كۇندەرىندە ەنەرگيا تاسىعىشتار باعاسىنىڭ كۇرت تومەندەۋى اياسىندا تەڭگەگە ايتارلىقتاي قىسىم ءتۇستى. ايدىڭ سوڭعى اپتاسىندا مۇناي قۇنىنىڭ تومەندەۋى قارقىندى بولدى, جالپى 2020 جىلعى ساۋىردەن باستاپ بارىنشا ناشار بولدى, باعا 10,3%-عا تومەندەدى. وسى كەزەڭدە ۆاليۋتا نارىعىندا ۆاليۋتا ۇسىنىسىنىڭ كۇرت تومەندەۋى جانە وتىمدىلىكتىڭ تومەندىگى بايقالدى. وسىعان بايلانىستى ۇلتتىق بانك ۆاليۋتالىق ينتەرۆەنتسيا جۇرگىزدى, ونىڭ كولەمى 91,3 ملن دوللاردى قۇرادى. ۇلتتىق بانكتىڭ قاتىسۋى جالپى نارىقتىق سەرپىنگە كەدەرگى كەلتىرمەدى, – دەدى ءاليا مولدابەكوۆا.
ۆاليۋتا نارىعى ءۇشىن قولايلى فاكتورلاردىڭ ىشىندە مەملەكەتتىك باعالى قاعازدار نارىعىنا بەيرەزيدەنتتەردىڭ كەلۋى قايتا باستالعانىن اتاپ ءوتۋ قاجەت. قازاندا ونىڭ كولەمى 71,8 ملرد تەڭگەنى نەمەسە شامامەن 167 ملن دوللاردى قۇرادى.
ۇلتتىق بانك توراعاسىنىڭ ورىنباسارى ەلدەگى التىن-ۆاليۋتالىق اكتيۆتەردىڭ جاعدايى مەن التىن نارىعىنداعى جاي-كۇيىنە دە توقتالدى. ونىڭ ايتۋىنشا, قازان ايىندا التىننىڭ ارزانداۋ تراەكتورياسى جالعاسىپ, ءبىر ايدا ۋنتسياسى 1883,4 دوللاردان 1875,8 دوللارعا نەمەسە 0,4%-عا تومەندەدى.
– باعالى مەتالدار نارىعىنداعى نەگىزگى انىقتاۋشى فاكتور اقش-تاعى سايلاۋعا قاتىستى بەلگىسىزدىك بولدى. التىن باعاسىنىڭ تومەندەۋى ءىس جۇزىندە ۇلتتىق بانكتىڭ التىن پورتفەلىنە اسەر ەتپەگەنىن ايتا كەتكەن ءجون, ويتكەنى ول باسىم قۇقىقتى ىسكە اسىرۋ شەڭبەرىندە وتاندىق التىندى ساتىپ الۋمەن رەتتەلگەن بولاتىن. قازاننىڭ سوڭىندا ۇلتتىق بانكتىڭ التىن پورتفەلى 23,2 ملرد دوللاردى قۇرادى, – دەدى ول.
دەگەنمەن, الدىن الا دەرەكتەر بويىنشا التىن-ۆاليۋتا اكتيۆتەرى ءبىر ايدا 200 ملن دوللارعا قىسقارىپ, قازاننىڭ سوڭىندا 33,6 ملرد دوللاردى قۇرادى. ونىڭ تومەندەۋى نەگىزىنەن شامامەن 90 ملن دوللار كولەمىندە مەملەكەتتىك بورىشتى تولەۋگە جانە 91,3 ملن دوللار كولەمىندە ۆاليۋتالىق ينتەرۆەنتسيا جۇرگىزۋگە بايلانىستى بولدى.
