الەمدەگى ەڭ تانىمال Coursera ونلاين-وقىتۋ پلاتفورماسى ەڭبەك جانە حالىقتى الەۋمەتتىك قورعاۋ مينيسترلىگىمەن جانە ەڭبەك رەسۋرستارىن دامىتۋ ورتالىعىمەن بىرلەسىپ, قازاقستاندىقتار ءۇشىن تەگىن ونلاين ءبىلىم بەرۋدىڭ اۋقىمدى جوباسىن ىسكە اسىرۋدا. جوبا 31 قازانعا دەيىنگى مەرزىمگە ەسەپتەلگەن ەدى. الايدا جوبانى ۇيىمداستىرۋشىلار اراسىندا كۋرستارعا تىركەلۋ مەرزىمىن 2020 جىلعى 14 جەلتوقسانعا دەيىن جانە وقۋ مەرزىمىن 2021 جىلعى 15 اقپانعا دەيىن وتەۋسىز نەگىزدە ۇزارتۋ تۋرالى ۋاعدالاستىققا قول جەتكىزىلدى.
داعدىلاردى ارتتىرۋ ماقساتىندا تەگىن كۋرستار اشىلعان ساتتەن باستاپ 57 مىڭ ءوتىنىم بەرىلگەن, سونىڭ ىشىندە 24 مىڭنان اسا قاتىسۋشى كۋرستارعا قاتىسىپ جاتىر. وقىتۋدىڭ ەڭ تانىمال باعىتتارىنىڭ ىشىندە ءىت-تەحنولوگيالار, بيزنەس كۋرستارى, تىلدەردى وقىتۋ, جەكە جانە مادەني دامۋ, ونەر, الەۋمەتتىك عىلىمدار بار. قازاقستاندىق ءبىلىم الۋشىلار اراسىنداعى ۇزدىك 5 كۋرس بۇل – «Teach English Now! Technology Enriched Teaching», «Programming for Everybody», «Business English: Basics», «Python-عا ەنۋ», «جوبالار مەن ونىمدەرمەن جۇمىس جاساۋداعى Agile جانە Scrum».
IT-كۋرستاردىڭ ىشىندە Python, باعدارلامالاۋ نەگىزدەرى, Adobe Photoshop, HTML جانە CCS, Android, Big Data نەگىزدەرى ۇلكەن قىزىعۋشىلىق تۋدىردى.
اعىلشىن ءتىلىن ۇيرەنۋ بارىسىندا ازاماتتار وقىتۋ ادىستەمەلەرىنە, سويلەۋ جانە ىسكەرلىك ءتىلدى مەڭگەرۋ داعدىلارىن ارتتىرۋعا, سونداي-اق گرامماتيكاعا باسا ءمان بەرەدى.
سونىمەن قاتار قازاقستاندىقتار كورەي ءتىلىن, جوبالىق مەنەدجمەنتتى, SMM-ءدى, ينتەرنەت-كاسىپكەرلىكتى, سۋرەتكە ءتۇسىرۋ نەگىزدەرىن, سويلەۋ ەتيكەتىن جانە باسقا دا تانىمدىق كۋرستاردى وقۋعا ىنتالى بولدى.
Coursera ءبىلىم بەرۋ پلاتفورماسى GOOGLE, IBM, Facebook, Stanford University, Yale University, Johns Hopkins University, Princeton University سياقتى الەمنىڭ جەتەكشى كومپانيالارى مەن ۋنيۆەرسيتەتتەرىنەن 4 مىڭنان اسا تەگىن كۋرستان وتۋگە بىرەگەي مۇمكىندىك بەرەدى. كۋرستاردى ءساتتى اياقتاعاننان كەيىن ءبىلىم الۋشىلار سەرتيفيكات الادى.
بيىل 14 جەلتوقسانعا دەيىن www.enbek.kz/ru/free-coursera ەلەكتروندىق ەڭبەك بيرجاسى ارقىلى ءوتىنىم بەرگەندەر جانە www.coursera.org پلاتفورماسىندا تىركەلگەنىن راستاعاندار ءۇشىن Coursera الاڭىندا تەگىن وقىتۋ كۋرستارى 2021 جىلعى 15 اقپانعا دەيىن قولجەتىمدى.
