اتالعان ورتالىقتىڭ جەتەكشىسى اندرەي ماتۆەەۆ تالىمباقتاعى كوشەتتەردى وسىرۋگە بالالاردىڭ بەلسەندى تۇردە اتسالىسىپ جۇرگەنىن ماقتانىشپەن ايتادى.
– بالالار تۇقىم جيناۋ مەن ولاردى وتىرعىزۋدان باستاپ وسىرىلگەن كوشەتتەردى كۇتۋگە دەيىنگى ارالىقتاعى جۇمىستاردىڭ ءبارىن ءوز قولدارىمەن, زور ىنتامەن ىستەيدى, – دەيدى ول.
ورتالىقتاعى تالىمباقتا اعاشتىڭ ادەمى ساناعاش (كاتالپا), كيىز پاۆلوۆنيا جانە قاراپايىم ورىك سىندى ءۇش ءتۇرى وسىرىلەدى. بۇل وسىمدىكتەر جەزقازعان ءوڭىرىنىڭ كليماتتىق ەرەكشەلىكتەرى ەسكەرىلىپ تاڭدالعان. بيىلدىڭ وزىندە قالادا وتىرعىزىلعان 500 كوشەتتىڭ 90%-دان استامى تامىر الىپ, جەرسىنىپ كەتكەن ەكەن.
تالىمباقتاعى جۇمىس مىناداي ۇدەرىس بويىنشا ۇيىمداستىرىلادى: كوكتەمدە بارلىق كوشەت جىلىجايدا وتىرعىزىلادى. تامشىلاتىپ سۋارۋ, گيدروگەل, ۆەرميكومپوست سىندى تاسىلدەر سۋارۋعا قاجەت سۋدىڭ مولشەرىن ۇنەمدەپ قانا قويماي, وسىمدىكتەردىڭ ءوسۋى مەن دامۋىن ەداۋىر جىلدامداتادى. ەگەر قالىپتى جاعدايدا كاتالپا كوشەتتەرىن وسىرۋگە 2-3 جىل ۋاقىت كەتسە, مۇندا 9 ايدان 1,5 جىلعا دەيىن, ال پاۆلوۆنيا اعاشىن جارتى جىلدان كەيىن وتىرعىزا بەرۋگە بولادى.
بۇگىنگى تاڭدا تالىمباقتىڭ كولەمىن كەڭەيتۋ بويىنشا جۇمىستار قولعا الىنعان. Birgemiz: Taza alem جوباسىنىڭ شاعىن گرانتىنىڭ ارقاسىندا بالالار مەن جاسوسپىرىمدەر سارايىندا تاعى 220 شارشى مەتر قۇرعاق توپىراق تامشىلاتىپ سۋارۋ تاسىلىمەن قامتاماسىز ەتىلمەك. بۇدان بولەك قالاداعى №26 گيمنازيانىڭ بازاسىندا قوسىمشا الاڭ پايدا بولادى.
الداعى ۋاقىتتا جەزقازعاننىڭ شاپ-شاعىن «جەرۇيىعىنا» اينالعان تالىمباقتا وسىمدىك تۇرلەرى كوبەيتىلىپ, ەمەن, قايىڭ, ارشا سياقتى اعاش كوشەتتەرى وسىرىلمەكشى. ماماندار وزدەرى اينالىسىپ جۇرگەن بەرەكەلى ءىستىڭ جەزقازعاندى عانا ەمەس, باسقا دا وڭىرلەردى جاسىل جەلەككە بولەۋ جوباسىنا يگى اسەرىن تيگىزەتىنىنە بەك سەنىمدى.
قاراعاندى وبلىسى,
جەزقازعان قالاسى
