«قازسۋشار» مكم اقمولا وبلىستىق فيليالىنىڭ ديرەكتورى ءۋالي ءدالى اتالعان سۋ قويماسىن تىلشىلەرگە تانىستىرىپ, ونىڭ الداعى كوكتەمگى سۋ تاسقىنى كەزەڭىنە دايىن ەكەنىن مالىمدەدى. دەگەنمەن ءتيىستى شارالاردى تالاپ ەتەتىن ماسەلەلەر دە بارشىلىق ەكەن.
«ەسىل وزەنىندە ورنالاسقان استانا سۋ قويماسى 1970 جىلى سالىنعان. سۋ وتكىزۋ قۋاتى – سەكۋندىنا 1910 تەكشە مەتر. قازىر 328 ملن تەكشە مەتر سۋ جينادىق, ياعني 80%-عا تولعان. پايدالانۋعا بەرىلگەنىنە 50 جىل بولدى دەسەك, سۋ قويماسى ءۇشىن بۇل – كوپ ۋاقىت. جىبەك جولى اۋىلى مەن 42-رازەزد اۋماعىنداعى ەسىل وزەنى ارناسىنىڭ سۋ وتكىزۋ قۋاتى ەداۋىر تومەندەپ كەتتى. بۇعان ۋاقىتشا سالىنعان قۇبىرلى وتكەلدەر مەن سۋدىڭ بالدىرلارعا تولىپ كەتۋى سەبەپ. سوندىقتان جەرگىلىكتى اتقارۋشى ورگان وزەن ارناسىن تازالاپ, اۋىلداردىڭ اينالاسىنا بوگەت سالۋى كەرەك», دەدى ۋ.ءدالى.
سۋ تاسقىنى كەزەڭىندەگى توتەنشە جاعدايلاردىڭ الدىن الۋ ءۇشىن قازسۋشاردىڭ اقمولا وبلىستىق فيليالى جىل سايىن «قازگيدرومەتتىڭ» بەرگەن مالىمەتتەرى بويىنشا ەسىل باسسەيندىك سۋ ينسپەكتسياسىنىڭ بەكىتۋىمەن قالاعا سۋ جىبەرۋدىڭ بولجامدى كەستەسىن جاسايدى. بۇل نۇر-سۇلتان قالاسى اكىمدىگىمەن كەلىسىلەدى.
«كۇن سايىن سۋ كولەمىن ەسەپتەپ وتىرامىز. «استانا سۋ ارناسى» مەكەمەسى نۇر-سۇلتان قالاسى ءۇشىن جىلىنا 80-90 ملن تەكشە مەتر كولەمىندە سۋ الادى. ال ارشالى اۋدانىنداعى بىرنەشە اۋىلعا ايىنا 40 مىڭ تەكشە مەتر سۋ بەرىلەدى. سونىمەن قاتار ەلورداداعى ەسىل وزەنىنىڭ دەڭگەيىن ۇستاپ تۇرۋ ءۇشىن سانيتارلىق سۋ جىبەرەمىز», دەدى فيليال باسشىسى.
«قازسۋشار» ركم اقمولا وبلىستىق فيليالى بالانسىندا 7 سۋ قويماسى بار. ولار – استانا, ەسىل, سىلەتى, چاگلينسكوە جانە پودلەسنەنسكوە سۋ قويمالارى. ەلوردانى سۋ تاسقىنىنان قورعاۋ ءۇشىن 2010 جىلى قورعانىس بوگەتى سالىنعان.
