قىزىلوردا وبلىسى اۋماعىندا ورمان جانە جانۋارلار دۇنيەسىن قورعاۋ بويىنشا 8 مەملەكەتتىك مەكەمە ورنالاسقان. وسى مەكەمەلەردىڭ قورىندا 6,6 ملن. گا جەر كولەمى بولسا, ونىڭ 3,1 ملن. گا ورماندى جانە توعايلى القاپتار الىپ جاتىر.
2014-2020 ج.ج. ارالىعىندا وبلىس بويىنشا مەملەكەتتىك ورتكە قارسى قىزمەتى جوق ەلدى مەكەندەردە كەزەڭ-كەزەڭىمەن بارلىعى 22 ءورت ءسوندىرۋ بەكەتى قۇرىلدى.
جىل باسىنان مەملەكەتتىك ورمان قورىندا 48 ءورت وقيعاسى ورىن الىپ, بۇل وتكەن جىلدىڭ وسى كەزەڭىمەن سالىستىرعاندا 8 ەسەگە كوبەيگەن. كەلتىرىلگەن زالال كولەمى 9,4 ملن. تەڭگەنى قۇراپ وتىر.
جالپى ءورتتىڭ شىعۋىنا سەبەپ - كوكتەمگى جانە كۇزگى كەزەڭدەگى اۋىلشارۋاشىلىعى جەرلەرىندەگى شوپتەردى ورتەۋ بولىپ وتىر.
ەسكە سالايىق, 21 قازاندا جاڭاقورعان اۋدانى, تۇگىسكەن اۋىلىنداعى ەگىستىك القاپتا شامامەن 30 گەكتار جەرىندە ءورت وقيعاسى ورىن الدى. ءورتتىڭ سالدارىنان وسى القاپتا جايىلىپ جۇرگەن 1 300 باس ۋاق مالىنىڭ 261 باسى ءولىپ, 686 باسىن كۇيىك شالعان.
وسى رەتتە, ايماق باسشىسى قىزىلوردا قالاسى مەن اۋدان اكىمدەرىنە, كوكتەمگى ەگىسكە دايىندىق جانە كۇزگى ەگىن جيناۋ ناۋقانىنان كەيىن ەگىن القاپتارىن ورتەۋ كەزىندە ءوز تاراپتارىنان كەزەكشىلىك ۇيىمداستىرۋدى جانە ورتەۋ الدىندا وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنان رۇقسات الۋدى قاتاڭ تاپسىردى.
«2021-2025 جىلدارعا مەملەكەتتىك ورتكە قارسى قىزمەتى جوق ەلدى مەكەندەردە كەزەڭ-كەزەڭمەن ءورت بەكەتتەرىن قۇرۋ» جوسپارىن ىسكە اسىرۋ بارىسىندا بولەك عيماراتتار مەن قاجەتتى ءورت ءسوندىرۋ قۇرال-سايماندارىمەن جاراقتاندىرۋدى, قولدانىستاعى زاڭدىلىقتارعا سايكەس ەرىكتى ءورت ءسوندىرۋ قۇرىلىمدارىنىڭ قوعامدىق بىرلەستىكتەر نىسانىندا قۇرىلۋىن قاراستىرۋدى, ءوز اۋماقتارىنداعى شارۋا قوجالىقتارىنا 2021 جىلعى كوكتەمگى دالا جۇمىستارىنا دايىندىق بارىسىندا ءورت قاۋىپسىزدىگى تالاپتارىن ساقتاۋ جانە ونىڭ جاۋاپكەرشىلىگى جونىندە تۇسىندىرمە جۇمىستارىن جۇرگىزىپ, قاجەت بولعان جاعدايدا ءتيىستى قۇزىرلى ورگانداردى قاتىستىرا وتىرىپ, كىنالىلەردى جاۋاپكەرشىلىككە تارتۋدى ۇيىمداستىرۋدى جانە الداعى 2021 جىلعى ءورت قاۋىپتى كەزەڭدە اۋىل شارۋاشىلىعى القاپتارىن ورتەۋ كەستەسىن ازىرلەۋدى جۇكتەدى.
وبلىس اۋماعى بويىنشا 2642 شاقىرىم قاتتى جابىندى اۆتوموبيل جولدار جۇيەسى وتەدى. رەسپۋبليكالىق ماڭىزى بار جولداردىڭ جالپى ۇزىندىعى 1112 شاقىرىم جانە جەرگىلىكتى ماڭىزى بار اۆتوجولدار 1530 شاقىرىم قۇرايدى.
2020-2021 جىلعى قىسقى كەزەڭدەگى توتەنشە جاعدايلاردى جويۋعا وبلىستىق ازاماتتىق قورعاۋ قىزمەتتەرىنىڭ بارلىعى 1324 ادام جانە 383 بىرلىك ءار ءتۇرلى تەحنيكالارى دايىندىققا كەلتىرىلگەن.
الايدا, جىل سايىن قىسقى مەزگىلدە اۋا رايىنىڭ قولايسىز جاعدايلارىنا بايلانىستى رەسپۋبليكالىق جانە وبلىستىق ماڭىزداعى اۆتوجولداردا كولىك قۇرالدارىنىڭ جولاۋشىلارىمەن بىرگە ءتۇرلى سەبەپتەرمەن جولدا تۇرىپ قالۋ فاكتىلەرى ورىن الىپ كەلەدى.
ناقتىراق ايتساق, 2018-2019 جىلدارى قىزىلوردا-جەزقازعان اۆتوجولىندا 107 كولىك 208 جولاۋشىسىمەن قار قۇرساۋىندا قالعان. سونداي-اق, اقتوبە وبلىسىندا جولدىڭ جابىلۋىنا بايلانىستى, ترانزيتتىك كولىكتەر ارال اۋدانىنىڭ تەرريتورياسىندا ۇزاق ۋاقىتقا توقتاپ, جولاۋشىلار مەن جۇرگىزۋشىلەر جىلىتۋ پۋنكتەرىنە كوشىرىلدى.
وعان قوسا, ازاماتتاردىڭ قىسقى ۋاقىتتاعى قاۋىپسىزدىك شارالارىن ساقتاماۋى سالدارىنان بالىق اۋلاۋ كەزەڭدەرىندە مۇز استىنا ءتۇسىپ, قازا بولۋ جاعدايلارى دا تىركەلۋدە.
وبلىس اكىمى گۇلشارا ابدىقالىقوۆا كۇردەلى مەتەورولوگيالىق جاعدايلاردا كۇتىپ-ۇستاۋشى مەكەمە جول بويى مونيتورينگ جۇمىستارىن جۇرگىزىپ, كۇندەلىكتى اۋا-رايى بولجامىن ەسكەرىپ, قاۋىپتى دەگەن جول ۋچاسكەلەرىنە قار تازالايتىن تەحنيكالارىن جاقىن ورنالاستىرۋى كەرەك ەكەنىن ەسكەرتتى.
سونداي-اق, جولاۋشىلار تاسىمالداۋ كولىكتەرىنىڭ جولعا شىعۋ جاعدايلارىن جانە قىستىق ديزەل وتىنىمەن قامتاماسىز ەتىلگەنىن قاتاڭ باقىلاۋعا الۋدى, جول بويى ورنالاسقان جىلىتۋ بەكەتتەرىنىڭ ۇزدىكسىز جۇمىس جاساۋلارىن قامتاماسىز ەتۋدى, جولدىڭ جابىلعانى جونىندەگى دابىلدى ەسكەرتۋ الىسىمەن, ساناتىنا قاراماستان كولىك قۇرالدارىنىڭ جولعا شىعۋىنا قاتاڭ تۇردە شەكتەۋ قويۋدى, 2020-2021 جىلدىڭ كۇز جانە قىس ايلارىندا وبلىستىق جانە اۋداندىق ماڭىزداعى جول قاۋىپسىزدىگىن قامتاماسىز ەتۋ ماقساتىندا كوكتايعاققا قارسى ماتەريالدار, جانار-جاعار ماي قورلارىن جاساقتاۋدى تاپسىردى.
