سانيتاريالىق-ەپيدەميولوگيالىق دەپارتامەنتتىڭ ءباسپاسوز قىزمەتىنىڭ مالىمەتىنشە, 30 ادامدا COVID-19-دىڭ بەلگىلەرى بار بولسا, قالعان 12 تۇرعىندا ەشقانداي سيمپتوم بايقالماعان.
ينفەكتسياعا شالدىققانداردىڭ كوبى, ياعني 19 ادام – پەتروپاۆلدا, قىزىلجار جانە م.جۇماباەۆ اۋداندارىندا سەگىز ادامنان, مامليۋت اۋدانىندا – بەس, سونداي-اق اققايىڭ اۋدانىندا 2 ادام تىركەلگەن.ينفەكتسيا جۇقتىرعان 30 سولتۇستىكقازاقستاندىقتىڭ پتر-تالداۋىن ەپيدەميولوگيالىق كورسەتكىش بويىنشا العان. بەسەۋى پروفيلاكتيكالىق ماقساتتا جانە جەتەۋى ەپيدەميالىق باقىلاۋ كەزىندە انىقتالدى.
"قىركۇيەك باستالعالى 40 وقۋشىنىڭ COVID-19 جۇقتىرعانى بەلگىلى بولدى. ولاردىڭ 22-ءى شتاتتىق رەجيمدە ءبىلىم السا, 18-ءى قاشىقتان وقىپ جاتقان. ەكى جاعداي مەكتەپكە دەيىنگى ءبىلىم بەرۋ مەكەمەلەرىندە تىركەلدى. بالالار توپقا كۇندەلىكتى بارىپ جۇرگەن", دەپ مالىمدەدى ءباسپاسوز قىزمەتى.
وبلىستا كوروناۆيرۋستىڭ بار-جوعىن انىقتاۋ ءۇشىن تەست تاپسىرۋعا بولاتىن ءتورت زەرتحانا جۇمىس ىستەيدى. ناۋرىزدان بەرى ايماقتا 137,5 مىڭ تالداۋ الىنعان. جۇقتىرعاندار سانى جالپى تەست تاپسىرعانداردىڭ 3,4%-ى. وتكەن تاۋلىكتە 667 پتر-تالداۋ الىنعان. جالپى وبلىستا 4730 ادام كوروناۆيرۋس دەرتىنە شالدىقتى.
ولاردىڭ 2988-ىندە COVID-19 بەلگىلەرى بولسا, 1742 ادامدا ەشقانداي سيمپتوم بايقالماعان. ينفەكتسيا جۇقتىرعانداردىڭ 296-ى نەمەسە 6,2%-ى – سىرتتان اكەلىنگەن. 9 قاراشادان باستاپ پەتروپاۆل مەن قىزىلجار اۋدانىندا كارانتين ءتارتىبى ەنگىزىلدى.
