"بيىل ايتارلىقتاي وزگەرىستەر كۇشىنە ەندى. ءبىز ستيپەنديانى تاعايىنداۋ ءۇردىسىن اۆتوماتتاندىرۋ مەن اشىقتىقتى ارتتىرۋ ءۇشىن بارلىق نورماتيۆتىك قۇقىقتىق قۇجاتتى پىسىقتادىق. مەملەكەت باسشىسى وتكەن جىلى وسىنداي مىندەت قويدى. قاسىم-جومارت كەمەل ۇلى بۇل باعدارلامانى ودان ءارى دامىتۋعا جانە ونى قولداۋعا ەرەكشە كوڭىل بولەدى", دەپ اتاپ ءوتتى ۆەدومستۆو باسشىسى.
ءمينيستردىڭ ايتۋىنشا, "بولاشاق" باعدارلاماسىنىڭ تەرەڭ ترانسفورماتسياسى جۇرگىزىلىپ, حالىقارالىق ستيپەندياعا ۇمىتكەرلەردى ىرىكتەۋدىڭ جاڭا ەرەجەلەرى بەكىتىلدى. كۆوتالىق ساناتتار جويىلىپ, بۇل ءوز كەزەگىندە كونكۋرستىق ىرىكتەۋ بارىسىندا بارلىق ۇمىتكەر ءۇشىن تەڭ مۇمكىندىكتەر بەرەدى.
ۇسىنىلاتىن شەتەلدىك جەتەكشى جوعارى وقۋ ورىندارى تىزىمىندەگى وقۋ ورنىنان شاقىرتۋدىڭ بولۋى – ستيپەنديا تاعايىنداۋ بويىنشا كونكۋرسقا قاتىسۋ ءۇشىن قويىلاتىن نەگىزگى تالاپ. اۋىلدىق ەلدى مەكەندەردەن قاتىسىپ جاتقان ۇمىتكەرلەر ءۇشىن قازاقستان رەسپۋبليكاسى اۋماعىندا 6 ايعا دەيىنگى مەرزىمدى قامتيتىن تىلدىك كۋرستار ساقتالادى.
"تەك اۋىلدىق جەرلەردەن كەلگەن ۇمىتكەرلەردىڭ ساناتى ءۇشىن تىلدىك كۋرستاردى ساقتاۋ ەسەبىنەن ءبىز جىل سايىن 1,3 ملرد تەڭگەدەن استام قاراجات ۇنەمدەيمىز. سونداي-اق ىرىكتەۋ كەزەڭدەرىنىڭ سانىن 6-دان 3-كە دەيىن ازايتىپ, جالپى قۇجاتتاردى قابىلداۋ پروتسەسىن تسيفرلاندىردىق. ۇمىتكەرلەردى ىرىكتەۋ ءۇردىسىنىڭ بارلىق كەزەڭى ۆيدەو قۇرالدارىنىڭ كومەگىمەن تىركەلەدى. ءبىز تولىق اشىقتىقتى قامتاماسىز ەتتىك جانە جاڭا سىن-تەگەۋرىندەرگە يكەمدى ارەكەت ەتەتىن بولامىز", دەدى اسحات ايماعامبەتوۆ.
"بولاشاق" باعدارلاماسىن ىسكە اسىرۋ باستالعاننان بەرى 13 978 ستيپەنديا تاعايىندالعان, ونىڭ ىشىندە 1994 جىلدان 2004 جىلعا دەيىن – 785 ستيپەنديا, 2005 جىلدان 2020 جىلعا دەيىن – 13193 ستيپەنديا. 13193 ستيپەنديانىڭ 3379-ى باكالاۆريات بويىنشا, 7231 – ماگيستراتۋرا, 35 – اسپيرانتۋرا, 87 – كلينيكالىق ورديناتۋرا, 347 – دوكتورانتۋرا, 2114 – تاعىلىمداما باعدارلاماسى بويىنشا تاعايىندالدى.
