مامانداردىڭ ايتۋىنشا باتىس قازاقستان وبلىسىنىڭ كوروناۆيرۋستىق ينفەكتسيا بويىنشا ەپيدەميولوگيالىق احۋالى كۇن ساناپ ناشارلاپ كەلەدى.
وسى كەزگە دەيىن ايماقتا COVID-19 جۇقتىرعان 7142 ادام تىركەلسە, ونىڭ 3130-ى اۋرۋحانادان ەم الدى. ناۋقاستاردىڭ 97 پايىزى جازىلىپ شىققان. 121 ادام كوروناۆيرۋستان قايتىس بولعان. «اۋرۋدىڭ جالپى دەڭگەيى باتىس قازاقستان وبلىسى بويىنشا 100 مىڭ تۇرعىنعا شاققاندا 1083,1 قۇرادى» دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
سوڭعى تاۋلىكتە وڭىردە 39 ادام كوروناۆيرۋس جۇقتىرعانى انىقتالعان. ال 149 ادام پنەۆمونيا دياگنوزىمەن ەم قابىلداۋدا.
گۇلنار ماقسوتقىزىنىڭ ايتۋىنشا, بلوكبەكەتتەر جانىندا ورنالاسقان 4 كارانتيندىك اۋرۋحانادا قازىر 41 ادام جاتىر. ال جالپى سانى 333 توسەكتىك 6 جۇقپالى اۋرۋلار اۋرۋحاناسىندا 138 ادام ەمدەلۋدە. ءوڭىر بويىنشا 2044 توسەككە ارنالعان رەزەرۆتىك ورىن دايىندالعان.
قازان ايىنىڭ باسىنان بەرى كوروناۆيرۋس ينفەكتسياسىمەن تىركەلگەن 161 ادامنىڭ 73-ءى – زەينەتكەرلەر ەكەن. 15 ادام – مەديتسينا قىزمەتكەرلەرى, 9 ادام – مەكتەپ پەن مەكتەپكە دەيىنگى مەكەمەلەر مۇعالىمدەرى بولىپ شىققان.
سوڭعى ءبىر اي ىشىندە (06.10.2020-06.11.2020) رەسەي فەدەراتسياسى اۋماعىنان مەملەكەتتىك شەكارا ارقىلى باتىس قازاقستان وبلىسىنا 18983 ادام وتكەن. بۇلاردىڭ ىشىندە COVID-19-عا تەكسەرىلگەن انىقتاماسى جوق 831 قازاقستاندىق بلوكبەكەت جانىنداعى كارانتيندىك اۋرۋحاناعا 2 كۇنگە جاتقىزىلعان. تەكسەرىس كەزىندە ولاردىڭ 19-ىنان ۆيرۋس تابىلعان. ال پتر-تەست انىقتاماسى جوق 104 شەتەل ازاماتىنا شەكارادان وتۋگە تيىم سالىنعان.
17 تامىزدان باستاپ مونيتورينگ توپتارى كارانتيندى السىرەتكەننەن باستاپ قازاقستان رەسپۋبليكاسى مەن وبلىستىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس سانيتارلىق-دەزينفەكتسيالىق رەجيم تالاپتارىنىڭ بۇزىلۋىن توقتاتۋ جۇمىستارى جالعاسۋدا.
نۇرلىبەك مۇستاەۆ وڭىردە كارانتين تالاپتارىن بۇزۋشىلاردى انىقتايتىن 158 مونيتورينگتىك توپ قۇرىلىپ, ولار 475 نىساندا شەكتەۋ تالاپتارىن بۇزۋشىلىقتى انىقتاعانىن ايتادى. وسى كەزگە دەيىن كوتەرىلگەن 360 اكىمشىلىك ءىس بويىنشا تالاپتى بۇزۋشىلارعا 18 ملن تەڭگەدەن استام ايىپپۇل سالىنعان.
