بۇگىندە وبلىستا كارانتيندىك شارالاردىڭ ساقتالۋىن باقىلايتىن ءموبيلدى 158 مونيتورينگ توبى قۇرىلعان ەكەن. مۇنىڭ 20-سى – وبلىس ورتالىعىندا بولسا, 138-ءى اۋدانداردا قىزمەت ەتەدى. وسى توپتار 2 قاراشاعا دەيىن كارانتين شەكتەۋ تالاپتارىنىڭ 348 مارتە بۇزىلعانىن انىقتاعان. پوليتسيا دەپارتامەنتى قىزمەتكەرلەرى 2 534 زاڭبۇزۋشىلىقتى تىركەگەن. ءتارتىپ بۇزعانداردىڭ 2 578-ءى جەكە ادامدار بولسا, 304 زاڭدى تۇلعا دا شەكتەۋ تالاپتارىن بۇزىپ, كوزگە تۇسكەن.
وتكەن اپتادا باتىسقازاقستاندىق اۋىل اكىمى ۇلىنىڭ ۇيلەنۋ تويىن ورال قالاسىندا مەيرامحانادا تويلاعانى تۋرالى اقپارات جاريا بولعان ەدى. شتاب وتىرىسىندا اۋىل اكىمىنىڭ ماسەلەسى دە قارالدى.
– اقجايىق اۋدانى اقجول اۋىلدىق وكرۋگىنىڭ اكىمى ءتاتجان وتەمىسوۆ 9 قازان مەن 9 قاراشا ارالىعىندا كەزەكتى ەڭبەك دەمالىسىندا بولعان. لاۋازىمدىق مەرزىمى اياقتالۋىنا بايلانىستى ول 10 قاراشادان باستاپ قىزمەتىنەن بوساتىلادى, – دەدى وبلىس اكىمى اپپاراتىنىڭ جەتەكشىسى بەرىك باتاەۆ.
سونداي-اق ت.وتەمىسوۆتىڭ ماسەلەسى «مەملەكەتتىك قىزمەتشىلەردى تارتىپتىك جاۋاپكەرشىلىككە تارتۋ ەرەجەلەرى تۋرالى» پرەزيدەنت جارلىعىنا سايكەس مەملەكەتتىك قىزمەت ىستەرى دەپارتامەنتىنىڭ ارنايى كەڭەسىندە قارالماق.
باتىس قازاقستان وبلىستىق تۇتىنۋشى قۇقىعىن قورعاۋ باسقارماسى كارانتيندىك شەكتەۋ شارالارىن بۇزعانى ءۇشىن ءتاتجان وتەمىسوۆكە 41 670 تەڭگە اكىمشىلىك ايىپپۇل سالعانى دا بەلگىلى بولدى.
ارينە, مۇنداي قاتاڭ شارالاردىڭ ءبارى دە وبلىس تۇرعىندارىنىڭ دەنساۋلىعى ءۇشىن جاسالىپ جاتىر. ەگەر ۆيرۋس جاپپاي تاراپ, كارانتين ءتارتىبى قاتاڭدايتىن بولسا, حالىققا دا, ءوڭىر ەكونوميكاسىنا دا اۋىر تيەتىنى ءسوزسىز. باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى عيزاتۋللا لياموۆتىڭ ايتۋىنشا, سوڭعى اپتادا وبلىستا كوۆيدتىق پنەۆمونيامەن اۋىرۋ كورسەتكىشى كوبەيگەن. ءدال قازىر 148 ناۋقاس سovid-19 دەرتىنەن ەم الۋدا. سوندىقتان ساقتىقتى كۇشەيتپەسە بولمايدى.
