114 مىڭنان استام وتباسى باسپانامەن قامتىلدى
تاۋەلسىزدىك جىلدارى بىرنەشە مەملەكەتتىك باعدارلاما جۇزەگە اسىرىلدى. اتاپ ايتقاندا 2005-2011 جىلدارى تۇرعىن ءۇي قۇرىلىسىن دامىتۋ, «قولجەتىمدى باسپانا-2020», «نۇرلى جول» جانە وڭىرلەردى دامىتۋ مەملەكەتتىك باعدارلامالارى. وسى كەزەڭدە 114 مىڭنان استام وتباسى الەۋمەتتىك تۇرعىن ۇيمەن قامتىلىپ, 63 مىڭنان استام ۇلەسكەردىڭ تۇرعىن ءۇي ماسەلەلەرى شەشىلدى.
«2017 جىلدان باستاپ «نۇرلى جەر» مەملەكەتتىك باعدارلاماسى ىسكە اسىرىلۋدا. باعدارلاما ىسكە قوسىلعان 3 جىلدىڭ ىشىندە 36,8 ملن شارشى مەتر نەمەسە 330 مىڭ تۇرعىن ءۇي سالىندى. قولجەتىمدى تۇرعىن ءۇي جانە جەڭىلدەتىلگەن نەسيە بەرۋ ارقىلى مەملەكەتتىك قولداۋ شارالارىمەن 89 مىڭعا جۋىق وتباسى قامتىلدى», دەدى م.جايىمبەتوۆ.
بۇل جىلدار ارالىعىندا تۇرعىن ءۇي قۇرىلىسىنا 3,6 ترلن تەنگەدەن استام جەكە ينۆەستيتسيا تارتىلدى. كوميتەت باسشىسىنىڭ ايتۋىنشا, سالىنعان مەملەكەتتىك ينۆەستيتسيالاردىڭ 1 تەڭگەسىنە جەكە ينۆەستيتسيالاردان 6 تەڭگەدەن كەلەدى.
ۆەدومستۆونىڭ اقپاراتىنا سەنسەك, قازاقستاندا تۇرعىن ۇيگە قولجەتىمدىلىكتىڭ ساتىلى جۇيەسى قاراستىرىلعان.
«مەملەكەت باسشىسى تۇرعىن ءۇي باعدارلامالارىنا قاتىسۋ ءۇشىن ناقتى باعالاۋدى قاراستىرۋدى تاپسىردى. بيىلدان باستاپ باعدارلاما بويىنشا ءاربىر وتباسى مۇشەسىنىڭ تابىسىن ەسكەرە وتىرىپ, تۇرعىن ۇيگە قولجەتىمدىلىكتىڭ ساتىلى جۇيەسى قاراستىرىلعان. تابىسى ەڭ تومەنگى كۇنكورىس دەڭگەيىنەن اسپايتىن الەۋمەتتىك وسال توپقا جاتاتىندار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي – 32 700 تەڭگە. تابىسى ەكى اەك-تەن اسپايتىن كوپبالالى, تولىق ەمەس, مۇگەدەك بالالارى بار وتباسىلار ءۇشىن جىلدىق 2%-بەن جەڭىلدىكتى نەسيەلەر, تابىسى 3,1 اەك-تەن اساتىن كەزەكتە تۇرعاندار ءۇشىن «5-10-20» باعدارلاماسى, «7-20-25» باعدارلاماسى جانە بانكتەر مەن تۇرعىن ءۇي جيناقتاۋ جۇيەسىنىڭ وزگە دە نارىقتىق باعدارلامالارىن پايدالانۋ مۇمكىندىگى بار. ەلباسىنىڭ جانە مەملەكەت باسشىسىنىڭ تاپسىرماسىنا سايكەس, ءبىرىنشى كەزەكتە كوپبالالى وتباسىلاردى ساتىپ الۋسىز جالعا بەرىلەتىن تۇرعىن ۇيمەن قامتاماسىز ەتەمىز», دەدى كوميتەت توراعاسى.
باعدارلامالاردى ىسكە اسىرۋ كەزەڭىندە 30 مىڭ وتباسىنا تۇرعىن ءۇي بەرۋ كوزدەلگەن, ونىڭ ىشىندە بيىل 4 835 وتباسى قونىس تويىن تويلاماق.
باسپانا قورى جەتكىلىكتى
قۇزىرلى ورگاننىڭ مالىمەتىنە سايكەس, ەلىمىزدە باسپانا قورى جەتكىلىكتى. سوندىقتان تاپشىلىق بولمايدى دەپ سەندىردى مينيسترلىك وكىلدەرى.
«جاڭا تۇرعىن ءۇي قورىن قۇرۋىمىز كەرەك. مەملەكەت بولگەن قاراجاتتى ءتيىمدى پايدالانۋ كەرەك. وسى ارقىلى جاڭادان قۇرىلىس سالاسىن دامىتۋعا, جۇمىس ورىندارىن اشۋعا باسىمدىق بەرىلۋى ءتيىس. سوندىقتان باعدارلاما جاڭا تۇرعىن ءۇي الۋعا باعىتتالىپ وتىر. پاتەر جەتكىلىكتى» دەدى سپيكەر.
جاۋاپتى ۆەدومستۆونىڭ اقپاراتى بويىنشا «شاڭىراق» باعدارلاماسى ارقىلى 390 ملرد تەڭگە ءبولىنىپ, ونىڭ 180 ملرد تەڭگەسى نەسيەلىك پاتەرلەر سالۋعا اكىمدىكتەرگە بەرىلدى. 210 ملرد تەڭگە 17 مىڭ جەڭىلدەتىلگەن نەسيە بەرۋگە باعىتتالدى.
بيىل باس شاھاردا 5 مىڭعا جۋىق, الماتىدا شامامەن 4 مىڭ, سونداي-اق وڭىرلەردە 200-600 پاتەر تاپسىرۋ جوسپارلانعان.
مەملەكەتتىك قولداۋ 1,5 ەسەگە ءوستى
بىلتىرعى سايكەس كەزەڭمەن سالىستىرعاندا وسى جىلى تۇرعىن ءۇي قۇرىلىسىن مەملەكەتتىك قولداۋ كولەمى 1,5 ەسەگە ءوستى.
«2020 جىلى 15 ملن شارشى مەتر تۇرعىن ءۇي سالۋ بويىنشا مىندەتتەمە الدىق. بۇل 150 مىڭنان استام وتباسىنىڭ تۇرعىن ءۇي جاعدايىن جاقسارتۋعا مۇمكىندىك بەرىپ, 40 مىڭعا جۋىق وتباسى مەملەكەتتىك ينۆەستيتسيالار شەڭبەرىندە تۇرعىن ۇيمەن قامتاماسىز ەتىلەدى. مەملەكەتتىك قولداۋ كولەمى 2019 جىلمەن سالىستىرعاندا 1,5 ەسەگە ارتىپ وتىر», دەدى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى.
پرەزيدەنت ق.توقاەۆتىڭ تاپسىرماسى بويىنشا شالعاي ەلدى مەكەندەرگە دە نازار اۋدارىلىپ, اۋىلشارۋاشىلىق سالاسىنىڭ قىزمەتكەرلەرىن قولجەتىمدى تۇرعىن ۇيمەن قامتاماسىز ەتۋ تەتىگى ازىرلەنىپ جاتىر.
«جۇمىس بەرۋشى بەلگىلەنگەن جوباعا سايكەس, ءوز قاراجاتى ەسەبىنەن تۇرعىن ءۇي سالادى. مەملەكەت ءوز تاراپىنان ءۇيدىڭ تىركەلگەن قۇنىنىڭ 50%-ىن رەسپۋبليكالىق بيۋدجەتتەن سۋبسيديالاۋ مىندەتىن الادى. بۇل اۋىلدىق جەرلەرگە بىلىكتى مامانداردى تارتۋعا جانە ەڭبەك رەسۋرستارىن ساقتاپ قالۋعا مۇمكىندىك بەرەدى», – دەدى م.جايىمبەتوۆ.
«قازاقستاننىڭ تۇرعىن ءۇي قۇرىلىس جيناق بانكى» اق ورتالىق فيليالىنىڭ ديرەكتورى جانسۇلتان ماتاەۆتىڭ ايتۋىنشا, نارىقتىق ەكونوميكادا تۇرعىن ءۇي باعاسىن سۇرانىس پەن ۇسىنىس رەتتەيدى. سول سەبەپتى, قايتالاما نارىقتا باسپانانىڭ قۇنىن بەلگىلەۋ مۇمكىن ەمەس. ال مەملەكەتتىڭ ەسەبىنەن سالىنىپ جاتقان ۇيلەردىڭ شارشى مەترىنە ناقتى باعالار بەكىتىلدى.
«الماتى جاستارى» سىندى مەملەكەتتىك باعدارلاما اياسىندا قايتالاما نارىقتان باسپانا الۋعا رۇقسات بەرىلگەن كەزدە باعالار شارىقتاپ كەتەدى. قازىر «نۇرلى جەر» باعدارلاماسى ارقىلى تۇرعىن ءۇيدىڭ شارشى مەترى ءۇشىن باعالار بەكىتىلگەن. ماسەلەن, نۇر-سۇلتان قالاسىندا – 220 مىڭ تەڭگە, الماتى قالاسىندا – 240 مىڭ تەڭگە, شىمكەنتتە – 200 مىڭ تەڭگە جانە وڭىرلەردە 160 000-180 000 تەڭگە ارالىعىندا», دەدى ج.ماتاەۆ.
