تانىمال سۋرەشى-مونۋمەنتاليست ميحايل انتونيۋكتىڭ كەسكىندەمەلىك مۇرالارىنىڭ اراسىنداعى «زامانالار جالعاستىعى» دەگەن بۇل كارتينانىڭ قاسىنان ەشكىم بەي-جاي ءوتىپ كەتپەۋى كەرەك دەر ەدىك. تۇتاس ۇلتتىڭ تراگەدياسىن كەيۋانا كوزدەرىمەن ايتۋدىڭ ءوزى ازاماتتىق بەرىك ۇستانىمدى اڭعارتادى. سۋرەتشىگە سۇيسىنبەسكە شارا جوق. كەسكىندەمە تاريحىن بىلگەندە الاش تاعدىرىنىڭ اقتاڭداق جىلدارىن اشىق كورسەتكەن ونەر يەسىنە تاعى رازى بولدىق.
حح عاسىردىڭ 30-شى جىلدارى جاپپاي قىرىلعان قازاق تراگەدياسى قانداي شىعارماشىلىق يەسىن بولسىن قاسىرەت شەكتىرمەي قويمايدى. بۇل قىلقالام شەبەرى دە اتالعان اپاتتى ءوزىنىڭ شىعارماشىلىق زەرتحاناسىندا اينالىپ وتپەپتى. وتپەۋىنە جانە ەڭ ۇلكەن سەبەپ – سۋرەتتەگى كەيىپكەر كەيۋانانى اۆتور جەكە تانىعان. كەسكىندەمەدە كورىنىپ تۇرعانداي, بۇل انانىڭ كوزىندەگى كىسى شوشىرلىق ۇرەيدىڭ ار جاعىندا اشارشىلىق جىلدارى ءوزىنىڭ بالالارى مەن جاقىندارىن جوعالتقان قالىڭ قايعى جاتىر. قىلقالام شەبەرىن بۇل تاقسىرەت قاتتى قينايدى. الايدا قارت انا جۇرەگىندەگى ىستىق مەيىرىم كەيىن كورشى اۋىلداعى جەتىم قالعان بالالاردى قامقورلىعىنا الىپ, اشتان ولۋدەن ساق-
تاپ قالىپتى. قارت انا اجىمدەرىندەگى قاسىرەت تابىمەن سۋرەتشى وسى وقيعانى ايتقىسى كەلگەن. قايعى مەن كوز جاسىنان بوزارىپ كەتكەن كوزدەردە كۇللى قازاق حالقىنىڭ مۇڭى مەن زارىنىڭ تەرەڭ ارناسى بار. سۋرەتشى الدىڭعى پلانعا اۋىر ەڭبەكتەن ەتى قاشقان, تارامىس ۇلكەن قولدى ادەيى شىعارعان.
انتونيۋك بۇل ارقىلى وسى قولدار بەسىكتى دە تەربەتتى, بەينەتتى دە كوتەردى, وسى قولدار جەتىم-جەسىرلەردىڭ ماڭدايلارىنان دا سيپادى, قارالى حاتتاردى دا اشتى, وسى قولدار ءبىر ءۇزىم ناندى دا ەكىگە ءبولدى, وسى قولدار ءبىزدى بۇگىنگە دە جەتكىزدى دەپ تۇرعانداي.
