ەسىمى انسۇيەر قاۋىمعا ەتەنە تانىس ءانشى قالتالى كاسىپكەر ەمەس. تاماشا تالانتىمەن تۋعان ەلىنە تالماي قىزمەت ەتىپ جۇرگەن ونەرپاز. وسى ۋاقىتقا دەيىن سۇلۋ سازدى ۇنىمەن كوپ كوڭىلىن باۋراپ, رۋحاني بايلىق سىيلاپ كەلسە, بۇل جولى ىندەتتى سەيىلتۋگە قول ۇشىن بەرىپ وتىر.
"قىتايدان جەتكىزىلگەن اقىلدى اپپارات قازىرگى زامانعا ساي تەحنولوگيامەن جاساقتالعان. دەنە قىزۋىنىڭ ولشەمىن ءبىر سەكۋندتىڭ ىشىندە انىقتاۋعا مۇمكىندىگى بار. ەءشبىر جۋ قۇرالىنسىز, توزاڭداندىرۋ ارقىلى قولدى زارارسىزداندىرۋ تەتىگى دە بار. اپپاراتتىڭ ىشكى دالىزىنە كىرگەندە ادامدى باسىنان اياعىنا دەيىن توزاڭمەن دەزينفەكتسيالاپ شىعارادى. قازىر باسقا مەملەكەتتەردە ىندەت قاتتى دەندەپ بارادى. ءبىزدىڭ وبلىستا دا ىندەت بىرتىندەپ بەلەڭ الىپ كەلەدى, جاعداي كۇردەلەنە ءتۇسىپ جاتقانىن ەستىپ, ءبىلىپ ءجۇرمىز. سوندىقتان, شامام جەتكەنشە وسى ءبىر اپپاراتتى اكەلدىم. ەگەر ەلىم دەگەن قالتالى ازاماتتار وسىنداي پايدالى اپپاراتتى ءبىلىم جانە دەنساۋلىق ساقتاۋ مەكەمەلەرىنە ورناتۋعا الىپ بەرگىسى كەلسە, وندا مەن قىتايدان جەتكىزىپ بەرۋگە كومەكتەسۋگە دايىنمىن", دەدى توكەن ءىلياسوۆ اڭگىمەگە تارتقانىمىزدا. اتالعان اپپارات 2 ميلليون تەڭگە كولەمىندە تۇرادى ەكەن.
ءسوز اراسىندا اسقاق داۋىستى ءانشى كوكشە توپىراعىنا وسىدان 18 جىل بۇرىن قىتايدان كوشىپ كەلگەندىگىن ايتا كەتەلىك. ابايشا ايتقاندا, "سەن دە ءبىر كىرپىش دۇنيەگە, كەتىگىن تاپ تا بار قالان" دەمەكشى, قازىرگى قيىن كەزەڭدە ەلىنە پايدام تيسە دەگەن نيەتپەن وسى اقىلدى اپپاراتتى ساتىپ اپەرىپوتىر. ءانشىنىڭ ايتۋىنا قاراعاندا, مۇنداي اپپارات قىتايدىڭ بارلىق ءبىلىم جانە مەديتسينا مەكەمەلەرىندە جاپپاي ورناتىلىپ جاتىر ەكەن.
ەت جۇرەگى ەلىم دەپ سوعاتىن ءار ازامات قىسىلتاياڭ كەزەڭدە ءدال وسىلاي كومەك قولىن سوزاتىن بولسا, تورتكۇل دۇنيەنى تەگىس تۇرشىكتىرىپ تۇرعان ىندەتتىڭ ءىزى سۇيىلار ەدى.
كوكشەتاۋ قالاسى
